Bhadrawahi Bible
न्यायी 16
शिमशोन ते दलीला
एक्सां शिमशोन पलिश्ती गाज़ा नगरे जो जेव, ते तैड़ी अक वेश्या हेरतां तैसेरे घरे रात गुज़ारनेरे लेई जेव। ज़ैखन गाज़ा नगरेरे लोकन इस गल्लरी खबर मैल्ही कि शिमशोन इड़ी एवरोए, तैखन तैनेईं तै घेरो, ते पूरी राती नगरेरे फाटके पुड़ तैसेरे ताकी मां लग्गोरे राए; ते एन ज़ोइतां पूरी राती च़ुपच़ारे राए, कि झ़ेझ़ भोंते अस तैस मैरी छ़डमेले। पन शिमशोन पूरे राती तैड़ी न रुको, ते अध्धी राती उठतां, तैनी नगरेरे फाटकेरे दूईये पल्ले ते दूईये बाज़ू ट्लेइतां बेंड़न समेत पुट्टी छ़डे, ते अपने कंधन पुड़ रेखतां तैना तैस पहाड़ेरी च़ोटी पुड़ ने, ज़ैन हेब्रोन नगरेरे सामने। किछ दिहाड़ना बाद तै सोरेक नंव्वेरी वैदी मां रानेबाले दलीला नंव्वेरी एक्की पलिश्ती कुइये सेइं प्यार केरने लगो। तैखन पलिश्ती लोकां केरे राज़ेईं तैस कौन्शी कां गेइतां ज़ोवं, “तू तैस बल्हे च़ारे पुछ़ कि तैसेरे बड़े ताकतरू राज़ कुने, ते कोस तरीके सेइं अस तैस पुड़ एन्च़रे सेइं कब्ज़ो केरम, कि तैस बेन्धतां दबेइतां रखम; तैखन असन मरां हर कोई तीं 1100-1100 चैंदरे टुक्ड़े1 देलो।” तैखन दलीला शिमशोने कां गेइतां ज़ोवं, “मीं सेइं ज़ो कि तेरे बड़े ताकतरू कुन राज़े, ते कोस तरीके सेइं तीं कोई बेन्धतां रेखी सखते।” शिमशोने तैस सेइं ज़ोवं, “अगर अवं सत एरी नेव्वीं-नेव्वीं रेस्सन सेइं बन्धो गेईं ज़ैना शुकेवरी न भोन, त मेरी ताकत घेटी गाली, ते अवं आम मैन्हेरो ज़ेरो भोइ गालो।” तैखन दलीलारे ज़ोने मुताबिक पलिश्ती लोकां केरे राज़े दलीला कां एरी नेव्वीं-नेव्वीं सत रेस्सी घिन्तां आए, ज़ैना शुकेवरी न थी, ते तैसां तैन सेइं शिमशोन बन्धो। तैसां त किछ मैन्हु घरे मां एक्की कमरे मां छ़ेइपतां रखोरे थिये। तैखन तैसां शिमशोने सेइं ज़ोवं, “हे शिमशोन, पलिश्ती तीं पुड़ हमलो केरनेबालन!” तैखन तैनी डोरी एन्च़रे ट्लोड़ी ज़ेरू सनेरू सूट्ल अग हुरते ट्लुटी गाते। ते तैसेरे ताकतरो भेद न खुल्लो।
तैखन दलीला शिमशोने सेइं ज़ोवं, “शुन, तीं त मीं सेइं धोखो कियो, ते झूठ ज़ोवरूए; हुनी मीं ज़ो कि तू कोस चीज़ी सेइं बेन्धोई सकतस।” शिमशोन तैस सेइं जुवाब दित्तो, “अगर अवं एरी नेव्वीं-नेव्वीं रेस्सन सेइं ज़ैन सेइं कोई कम न कियोरू भोए ज़ोरे सेइं बन्धो गेईं, ते मेरी ताकत घेटी गानीए, ते अवं आम मैन्हु केरे ज़ेरो भोइ गानोईं।” तैखन दलीला तै नेव्वीं-नेव्वीं रेस्सन सेइं बन्धो ते ज़ोवं, “हे शिमशोन, पलिश्ती लोक फिरी तीं पुड़ हमलो केरतन!” केत्रे मैन्हु तैस घरे मां छ़ेपतां बिश्शोरे थिये। तैखन तैनी तैना सूट्लेरी ज़ेरि अपनि पैखड़न पुड़ ट्लोड़ी छ़ेडी। फिरी दलीला शिमशोने सेइं ज़ोवं, “तीं फिरी मीं धोखो दित्तोरोए, ते झूठ ज़ोतो एवरोस; हुनी मीं सेइं ज़ो तू कोस सेइं बेन्धोई सकतस?” तैनी जुवाब दित्तो, “अगर तू मेरे दोग्गेरी सत्ते च़ोटां ताने मां बुनस त बेन्धोई गालो।” आखर तैसां तै खीले सेइं बन्धो। तैखन तैसां ज़ोवं, “हे शिमशोन, पलिश्ती लोक तीं पुड़ हमलो केरतन!” तैखन तै बींझ़ो, ते खीले पुटतां तैस ताने समेत घिन्तां जेव।
तैखन दलीला तैस सेइं ज़ोवं, “तेरो मन त मीं सेइं नईं लगोरो, फिरी तू किजो ज़ोतस, कि अवं तीं सेइं प्यार केरताईं? तीं एन ट्लाई फेरेईं मीं सेइं धोखो कियो, ते मीं सेइं न ज़ोवं कि तेरे बड़े ताकतरू कुन राज़े।” एन्च़रां सेइं ज़ैखन तैसां रोज़ गल्लां केरते-केरते तै तंग कियो, ते इड़ी तगर जिद की, कि तैसेरे नक्के मां दम अव, तैखन तैनी अपने मनेरो सारो भेद खोलतां तैस सेइं ज़ोवं, “मेरे दोग्गे पुड़ छ़ुरो कधे नईं लेवरो, किजोकि अवं अम्मरे पेटे मरां परमेशरेरो नाज़ीर आईं, अगर अवं दोग केट्टी, त मेरी ताकत एत्री घेटी गाली, कि अवं आम मैन्हेरो ज़ेरो भोइ गानोईं।”
एन हेरतां, कि तैनी अपने मनेरो सारो भेद मीं सेइं ज़ोवरोए, दलीला पलिश्ती लोकां केरे राज़ेईं कां बिस्तार भेज़ो, “इस फेरे फिरी एज्जा, किजोकि तैनी अपने मनेरो सारो भेद मीं सेइं ज़ोवरोए।” तैखन पलिश्ती लोकां केरे राज़ेईं हथ्थे मां चैंदरे टुक्ड़े नेइतां तैस कां जे। तैखन तैसां तै अपने कुम्मे मां च़ांनेइतां रख्खो; ते अक पलिश्ती मैन्हु कुजेइतां तैसेरे दोग्गेरी सत्ते च़ोटां कटेई। ते तै तैस दबाने लगी, ते तै कमज़ोर भोइ जेव। तैखन तैसां ज़ोवं, “हे शिमशोन, पलिश्ती लोक तीं पुड़ हमलो केरने लगोरेन!” तैखन तै बींझ़तां सोचने लगो, “अवं पेइलेरे ज़ेरो बेइर गेइतां झटकेलो।” तै त न थियो ज़ानतो, कि यहोवा तैस करां च़लो जेवरोए। तैखन पलिश्ती लोकेईं ट्लेइतां तैसेरी एछ़्छ़ी केढी छ़ेडी: ते तै गाज़ा नगरे जो नेइतां पितलरे बेड़न सेइं बेन्धी छ़डो; ते तै कैदखाने मां ढ्लाट च़लाने लगो। तैसेरे दोग्गेरे बाल कटनेरे बाद फिरी बेडोने लगे। किछ वक्तेरां बाद पलिश्ती लोकां केरे राज़ेईं अपने दागोन2 नंव्वेरे देबतेरे लेई बड़ू जग, ते जशन मनानेरे लेई एन ज़ोइतां अकोट्ठे भोए, “इश्शे देबते इश्शो दुश्मन शिमशोन इश्शे कब्ज़े मां कियोरोए।” ते ज़ैखन बाकी पलिश्ती लोकेईं तै लव, तैखन एन ज़ोइतां अपने देबतेरी तारीफ़ केरने लगे, “इश्शे देबते इश्शो दुश्मन ते इश्शे मुल्खेरो नाश केरनेबालो, ज़ैनी असन मरां बड़े मैन्हु मैरी भी छ़डे, इश्शे कब्ज़े मां कियोरोए।” ज़ैखन तैन केरो मन मसत भोइ जेव, तैखन तैनेईं ज़ोवं, “शिमशोने कुजेइतां बेइर आनां, कि तै इश्शे लेई तमाशो केरे।” एल्हेरेलेइ शिमशोन कैदखाने मरां कुजव, ते तैन केरे लेई तमाशो केरने लगो, ते दागोन देबतेरे मन्दरेरे खम्भां केरे मझ़ाटे खड़ो कियो। तैखन शिमशोने तैस मट्ठे सेइं ज़ोवं, ज़ैनी तैसेरो हथ ट्लावरो थियो, “मीं उन खम्भन सेइं हुरने दे, ज़ैन सेइं घर टिकोरूए, कि अवं तैस पुड़ टेक लेईं।” तैन मन्दर तैस वक्ते त कौन्शन मड़दन सेइं भेरतां थियूं; पलिश्ती लोकां केरे पंच़े राज़े भी तैड़ी थिये, ते लाए पुड़ लगभग 3000 कौन्शां ते मड़द थिये, ज़ैना शिमशोनेरो तमाशो हेरने लगोरे थिये।
तैखन शिमशोने एन ज़ोइतां यहोवा कां प्राथना की, “हे प्रभु यहोवा, मीं याद केर; हे परमेशर, इस फेरे फिरी मीं ताकत दे, कि अवं पलिश्ती लोकन करां अपनि दूईये एछ़्छ़ी केरो एक्की बार बदलो नेही।” तैखन शिमशोने तैना दूईये मझ़ाटेरे खम्भे ज़ैन सेइं घर टिकोरू थियूं, ट्लेइतां एक्की पुड़ देइने हथ्थे सेइं ते होरे पुड़ बांए हथ्थे सेइं ज़ोर दित्तो। ते शिमशोने ज़ोवं, “पलिश्ती लोकन सेइं साथी मेरी जान भी गाए।” ते तै अपनो सारो ज़ोर लेइतां झुको; तैखन तैन घर पंच़े राज़न ते तैस मां सारे लोकन पुड़ बिछ़ड़ी जेवं। एन्च़रां सेइं ज़ैना तैनी मरते बार मारे तैना तैन करां भी जादे थिये ज़ैना तैनी अपने ज़िन्दगी मां मारोरे थिये। तैसेरे बाद तैसेरे ढ्ला ते तैसेरे बाजी केरे सारे टब्बरेरे लोक सोरा नगरेरे गाज़ा नगरे मां आए, ते तैसेरी लाश नेइतां सोरा ते एश्ताओल नगरां केरे मझ़ाटे तैसेरे बाजी मानोहेरी कब्री मां दब्बी। तैनी इस्राएलेरो न्याय 20 सालन तगर कियोरो थियो।
Source notes (2)
- Footnote 1100-1100 चैंदरे टुक्ड़े लगभग 13 किल्लो चाँदी
- Footnote दागोन ई कनानी लोकां केरो फसलरो भलो देबतोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.