Bhadrawahi Bible
न्यायी 15
शिमशोनेरे ज़िरिये पलिश्ती लोकन पुड़ ज़ींत
किछ दिहाड़ां पत्ती, गेहुं केरे कटनेरे दिहाड़न मां, शिमशोने अक छ़ेड़ू नेइतां तिम्ना नगरे मां गेइतां ज़ोने लगो, “अवं अपनि कौन्शी कां घरे मां मिलनेरे लेई गेइलो।” पन तैसेरे शेहरे तै अन्तर गाने न दित्तो। ते तैसेरे शेहरे शिमशोने सेइं ज़ोवं, “अवं सच़्च़े एन ज़ानतो थियो कि तू तैस सेइं नफरत केरतस, एल्हेरेलेइ मीं तैसारो ड्लाह तेरे दोस्ते सेइं बनाव। कुन तैसारी निकड़ी बेइन तैस करां रोड़ी नईं? तैसेरे बदले तैस्से सेइं ड्लाह बना।” शिमशोने तैन लोकन सेइं ज़ोवं, “हुनी चाहे अवं पलिश्ती लोकां केरो नुकसान भी केरीं, फिरी भी तैन केरे बारे मां बेकसूर रेइलो।” तैखन शिमशोने गेइतां 300 लोई ट्लेइ, ते मसाल नेइतां दूई-दूई लोई केरां पौंछ़ड़ां साथी बन्धा, ते तैन केरे मझ़ाटे अक-अक मसाल बन्धी। तैखन मसालन मां अग लेइतां तैनी लोई पलिश्ती लोकां केरे खड़े उडारन मां छ़ेडी; ते पूलां केरे ढेर बल्के खड़े ऊडारां ते ज़ैतूनेरी बागां भी फुकोई जेई। तैखन पलिश्ती प्रधान पुछ़ने लगे, “एन केनि कियूं?” लोकेईं ज़ोवं, “तिम्नाहेरे ज़माई शिमशोने एन एल्हेरेलेइ कियूं, कि तैसेरे शेहरे तैसेरी कौन्शरो ड्लाह तैसेरे एक्की दोस्ते सेइं बनाव।” तैखन पलिश्ती लोकेईं गेइतां तै कौन्श ते तैसेरो बाजी दूईये अग्गी मां फुक्कां। शिमशोने तैन सेइं ज़ोवं, “तुसेईं ज़ैन एरू कम कियोरूए, एल्हेरेलेइ अवं तुसन करां बदलो नेइलो।” तैखन तैनी तैन पुड़ बड़े खतरनाक तरीके सेइं हमलो कियो ते बड़े लोक मारे; फिरी तै गेइतां एताम नंव्वेरे पहाड़ी चट्टानरे एक्की कुढी मां राने लगो। पलिश्ती लोकन न थियो पतो कि शिमशोन कोड़िए, एल्हेरेलेइ तैनेईं यहूदा प्रदेशे मां डेरे खड़े किये ते लही नगरे मां लड़ाई केरनेरे लेई तियार भोए। तैखन यहूदी मैन्हेइं तैन पुछ़ू, “तुस असन पुड़ किजो हमलो केरतथ?” तैनेईं जुवाब दित्तो, “शिमशोने बन्धनेरे लेई हमलो केरतम, कि ज़ेन्च़रे तैनी असन सेइं कियूं तेन्च़रे अस भी तैस सेइं केरम।” तैखन 3000 यहूदी लोक एताम नंव्वेरी पहाड़ी चट्टानरे कुढी मां गेइतां शिमशोने सेइं ज़ोने लगे, “कुन तू न ज़ानस कि पलिश्ती लोक असन पुड़ राज़ केरतन? फिरी तीं असन सेइं एरू किजो कियोरूए?” तैनी तैन सेइं ज़ोवं, “ज़ेरू तैनेईं मीं सेइं कियोरू थियूं, तेन्च़रे मीं भी तैन सेइं कियोरूए।” तैनेईं तैस सेइं ज़ोवं, “अस तीं बेन्धतां पलिश्ती लोकां केरे हथ्थे मां केरने एवरेम।” शिमशोने तैन सेइं ज़ोवं, “मीं सेइं ई कसम खाथ कि तुस मीं पुड़ हमलो न केरेले।” तैनेईं ज़ोवं, “एरू न भोल्हु; अस तीं बेन्धतां तैन केरे हथ्थे मां केरि देमेले; पन तीं कोन्ची तरीके सेइं न मारमेले।” तैखन तैनेईं तै दूई नेव्वीं रेस्सन सेइं बेन्धतां तैस कुढी मरां नेव।
ज़ैखन शिमशोन लही नगरे मां आनो पलिश्ती तैस हेरतां ललकारने लगे; तैखन यहोवारो आत्मा तैस पुड़ ज़ोरे सेइं अव, ते तैसेरे हथ्थां केरि रेस्सी अग्गी मां फुकोइतां सनेरे ज़ेरि भोइ जेई, ते तैसेरे हथ्थां केरे ड्लन्ठ ज़ेन्च़रे गेलतां ट्लुटी जे। तैखन तैस गधेरे बौम्फेरी अक नंव्वी हड्डी ज़मीनी पुड़ मैल्ही, ते तैनी हथ अग्रोवं केरतां तै ट्लाई ते तैस सेइं अक हज़ार पलिश्ती मैन्हु मारे। तैखन शिमशोने ज़ोवं,
“गधेरे बौम्फेरे हेड्डी सेइं ढेरां केरे ढेर लेग्गी जे,
गधेरे बौम्फेरे हेड्डी सेइं मीं हज़ार मैन्हु मारे।”
ज़ैखन तैने एरू ज़ोवं, तैखन तैनी बौम्फेरी हड्डी शारी ते तैस जगारू नवं रामत-लही रख्खू। तैखन तैस बड़ी ट्लिश लगी, ते तैनी यहोवा कां प्राथना केरतां ज़ोवं, “तीं अपने सेवके करां ई बड़ो छुटकारो करावाव; फिरी कुन अवं हुनी ट्लिशोरो मेरतां तैन खतनो न कियोरे लोकां केरे हथ्थे मां पेई?” तैखन परमेशरे लही नगरे मां उखलेरू ज़ेरू गत कियूं, ते तैस मरां पानी निसने लगू; ज़ैखन शिमशोने पियूं, तैखन तैसेरे जानी मां जान अई, ते तै फिरी ताज़ो दम भोइ जेव। एस वजाई सेइं तैस नागेरू नवं एनहक्कोरे रख्खू, तैन अज़्ज़ेरे दिहाड़े तगर लही मां आहे। शिमशोन त पलिश्ती लोकां केरे दिहाड़न मां 20 सालन तगर इस्राएल मुल्खे पुड़ न्याय केरतो राव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.