Bhadrawahi Bible
न्यायी 17
मीका मूरती पूज़ा केरते
एप्रैमेरी पहाड़ी प्रदेशे मां मीका नंव्वेरो अक मैन्हु थियो। एक्सां तैनी अपनि अम्मा सेइं ज़ोवं, “ज़ैना 1100 टुक्ड़े चैंदरे1 तीं करां च़ोरी भोवरे थिये, ज़ैन केरे बारे मां तीं मेरी शुन्ते भी श्राप दित्तोरो थियो, तैना मीं कां आन; मीएं तैना नियोरे थिये।” तैसेरी अम्मा ज़ोवं, “मेरे मट्ठे पुड़ यहोवारे तरफां बरकत भोए।” ज़ैखन तैनी तैना 1100 टुक्ड़े चाँदी अपनि अम्मा कां वापस दित्ते; तैखन तैसेरी अम्मा ज़ोवं, “अवं अपने तरफां अपने मट्ठेरे लेई इना पेइंसे यहोवा जो ज़रूर अर्पण केरतीं, ताके तैस सेइं अक मूरत घेड़तां, ते होरि ढैलतां बनाई गाए, एल्हेरेलेइ हुनी अवं तैस तींजो वापस देतीं।” ज़ैखन तैनी तैना रुपेइये एपनी अम्मा कां वापस दित्ते, तैखन तैसेरी अम्मा 200 टुक्ड़े2 ढालने बालन दित्ते, ते तैनी तैन सेइं अक मूरती घड़ाई केरतां, ते होरि ढैलतां बनाई; ते तै मीकारे घरे मां राई। मीका कां अक देबतां केरि जगाह थी, तैखन तैनी अक एपोद, ते किछ कुल देबते बनावाए; ते अपनु मट्ठू अक याजक बनावं। तैन दिहाड़न मां इस्राएली लोकां केरो कोई राज़ो न थियो; ज़ैस ज़ैन ठीक लगतू थियूं तै तैन्ने केरतो थियो।
यहूदारे कुलेरो अक जुवान लेवी यहूदारे बैतलहम नगरे मां परदेशी भोइतां रहतो थियो। एक्सां लेवी यहूदारे बैतलहम नगरे मरां एल्हेरेलेइ निस्सो, कि ज़ैड़ी कोन्च ठार मैल्हे तैड़ी गाए। च़लते-च़लते तै एप्रैमेरे पहाड़ी प्रदेशे मां मीकारे घरे मां पुज़्ज़ो। मीका तैस पुछ़ू, “तू कोट्ठां एवरोस?” तैनी जुवाब दित्तो, “अवं त यहूदारे बैतलहम नगरे मरां एवरो अक लेवी आईं, ते एल्हेरेलेइ च़लोरोईं, कि ज़ैड़ी कोन्च मीं जगाह मैल्हे तैड़ी अवं याजकेरू कम केरि सेखी।” मीका तैस सेइं ज़ोवं, “मीं सेइं साथी रेइतां मेरे लेई बाजी केरो ज़ेरो सलाहकार ते याजक बन, ते अवं तीं हर साल 10 चैंदरे सिक्के3, ते अक ज़ोड़ी लिगड़ां, ते खानेरी चीज़ां देइलो।” ते तै लेवी तैस मैन्हु सेइं साथी रानेरे लेई खुश भोव; ते मीका तैस सेइं मट्ठेरो ज़ेरो बर्ताव केरने लगो। तैखन मीका तै लेवी अपनो याजक बनाव, ते तै मीकारे घरे राने लगो। ते मीका सोचतो थियो, कि हुनी अवं ज़ानताईं कि यहोवा मेरू भलू केरेलो, किजोकि मीं अक लेवी अपनो याजक बनेवरोए।
Source notes (3)
- Footnote 1100 टुक्ड़े चैंदरे लगभग 13 किल्लो
- Footnote 200 टुक्ड़े लगभग दूई किल्लो 363 ग्राम
- Footnote 10 चैंदरे सिक्के लगभग 110 ग्राम चाँदी
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.