Bhadrawahi Bible
यहोशू 4
बारहे घोड़
ज़ैखन सब इस्राएली लोक यरदन दरियाएरे पार बन्ने पुड़ पुज़्ज़ी जे, तैखन यहोवाए यहोशू सेइं ज़ोवं, “लोकन मरां 12 मड़द च़ुन मतलब हर गोट्लेरो अक मड़द च़ुनतां तैन हुक्म दे, ‘तुस यरदन दरियारे मझ़ाटे, ज़ैड़ी याजकेईं पव रखोरे थिये, तैट्ठां 12 घोड़ सेल्हतां पार जो च़ला, ते ज़ैड़ी अज़ राती पड़ाव लग्गेलो तैन तैड़ी रेखथ।’” तैखन यहोशूए तैना 12 मड़द, ज़ैना तैनी इस्राएली लोकां केरे हर एक्की गोट्ले मरां अलग केरतां रखोरे थिये, तैन कुजेइतां ज़ोवं, “तुस अपने परमेशर यहोवारे करारेरे सन्दूखे करां अग्री-अग्री यरदन दरियाएरे मझ़ाटे गेइतां इस्राएली लोकां केरे गोट्लां केरि गिनतरे मुताबिक अक-अक घोड़ छ़ुइतां अपने कंधे पुड़ रेखथ, ज़ैस सेइं ऐह तुश्शे लोकां केरे मझ़ाटे अक निशान भोए, ते एजने बाले वक्ते मां ज़ैखन तुश्शे बच्चे तुसन पुछ़न, ‘कि एन घोड़ां केरो कुन मतलबे?’ तैखन तुस तैन ई जुवाब देइयथ, कि यरदन दरियाएरू पानी यहोवारे करारेरे सन्दूखेरे सामने दूई हिस्से भोवरू थियूं; किजोकि ज़ैखन सन्दूख यरदन दरियाएरे पार आनोरो थियो; तैखन यरदन दरियाएरू पानी दूई हिस्से भोइ जेवं। ते एल्हेरेलेइ एना घोड़ इस्राएली लोकन हमेशारे लेई याद केरनेरे लेई भोल्हे।”
यहोशूएरे एस हुक्मेरे मुताबिक इस्राएली 12 मड़देई कियूं, ज़ेन्च़रे यहोवाए यहोशू सेइं ज़ोवरू थियूं तेन्च़रे तैनेईं इस्राएली लोकां केरे गोट्लां केरि गिनतरे मुताबिक 12 घोड़ यरदन दरियाएरे मझ़ाटेरां सेल्हतां आने; ते एप्पु सेइं साथी नेइतां ज़ैड़ी राती पड़ाव लग्गो त तैना घोड़ तैड़ी रख्खे। ते यरदन दरियाएरे मझ़ाटे, ज़ैड़ी याजकेईं करारेरो सन्दूख छ़ुइतां अपने पव रखोरे थिये तैड़ी यहोशूए होरे 12 घोड़ खड़े कराए; तैना अज़ भी तैड़ी आन। ते याजक करारेरो सन्दूख छ़ुइतां तैस मौके तगर यरदन दरियाए मां खड़े राए ज़ांतगर सैरी गल्लां पूरी न भोइ, ज़ैना यहोवाए यहोशूए लोकन सेइं ज़ोनेरो हुक्म दित्तोरो थियो। तैखन तैना सब लोक अकदम यरदन दरियाए पार च़ले जे; ते ज़ैखन सब लोक पार पुज़्ज़े, तैखन याजक ते यहोवारो सन्दूख तैन केरे हेरते पार पुज़्ज़ी जेव। ते रूबेनी, गादी, ते मनश्शेरे अध्धे गोट्लेरे मैन्हु मूसेरे ज़ोनेरे मुताबिक इस्राएली लोकन करां अग्री बारी सेइं एक्की पत्ती अक च़ेलतां पार पुज़्ज़े; मतलब कोई च़ेल्ही हज़ार सिपाही जंगरे हथियार साथी नेइतां जंग केरनेरे लेई यहोवारे सामने पार पुज़तां यरीहो नगरेरे मैइदाने मां पुज़्ज़े। तैस दिहाड़े सारे इस्राएली लोकेईं हेरू कि यहोवाए यहोशू केन्च़रे महान कियो; ते ज़ेन्च़रे तैना मूसेरी आदर केरते थिये, तेन्च़रे यहोशूएरो भी डर सैरी ज़िन्दगी मन्ते राए।
ते यहोवा यहोशू सेइं ज़ोवं, “करारेरो सन्दूख छ़ूनेबाले याजकन हुक्म दे कि यरदन दरियाए मरां निस्सी एज्जन।” त यहोशूए याजकन हुक्म दित्तो, “यरदन दरियाए मरां निस्सी एज्जा।” ते ज़ेरे यहोवारे करारेरो सन्दूख छ़ूनेबाले याजक यरदन दरियाएरे पैनी मझ़मेइं निस्से, ते तैन केरे पव शुकोरी ज़मीनी पुड़ पे, तेरहु यरदन दरियाएरू पानी एपनी ठारी पुड़ अऊं, ते पेइलू ज़ेरू एपनी ठारी पुड़ बगने लगू।
सालेरे पेइले महीनेरे दशोवं दिहाड़े सारे इस्राएली लोकेईं यरदन दरियाए मांमेइं निस्तां यरीहो नगरेरे पूर्वी पासे गिलगाल नगरे मां अपने डेरे लाए। ते ज़ैना 12 घोड़ यरदन दरियाए मरां केढतां आनोरे थिये, तैना यहोशूए गिलगाले मां खड़े किये। तैखन यहोशूए इस्राएली लोकन सेइं ज़ोवं, “अज़्ज़ेरे बाद ज़ैखन तुश्शे बाल बच्चे अपने-अपने बाजीन पुछ़न, कि एन घोड़ां केरो कुन मतलबे? त तुस तैन एन ज़ोइतां जुवाब देइयथ, ‘ई यरदन दरिया असेईं इस्राएली लोकेईं शुकोरी ज़मीनी पुड़ च़ेलतां पार कियोरो थियो।’ किजोकि ज़ेन्च़रे तुश्शे यहोवाए लाल समुन्दर पार गानेरे लेई इश्शे सामने दूई हिस्से कियोरो थियो, तेन्च़रे तैनी यरदन दरियाएरू पानी भी रोकतां तुश्शे पार गानेरे लेई शुकोरी बत बनेइतां रख्खोरी थी। एल्हेरेलेइ दुनियारे सारे लोकन पतो च़ले कि यहोवा केत्रो शक्तिशाली आहे; ते हमेशा अपने परमेशर यहोवारो डर मन्ते रेइयथ।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.