Bhadrawahi Bible
यहोशू 3
इस्राएली लोक यरदन दरियाए पार गातन
यहोशू होरसां झ़ेझ़ां सुबेलो उठ्ठो, ते सारे इस्राएली लोक साथी नेइतां शित्तीमेरे डेरे मरां निस्तां यरदन दरियाएरे बन्ने पुड़ अव; ते तैना पार गाने करां पेइले तैड़ी रुकी जे। ते ट्लेइ दिहाड़ना बाद प्रधानेईं डेरन मां गेइतां लोकन ऐह हुक्म दित्तो, “ज़ैखन तुसन अपने परमेशर यहोवारे करारेरो सन्दूख छ़ूनेबाले लेवी याजक भी लेइहोन, तैखन एपनी ठारी पुड़ेरां च़ेलथ ते तैन केरे पत्पती च़ेलथ, पन तैन केरे ते तुश्शे दरमियाने मां लगभग अक किलोमीटर फासलो लोड़ते; तुस सन्दूखे कां नेड़े न गेइयथ। ताके तुस लहने मां कोई मुश्किल न भोए, कि तुसेईं कौस बत्तां च़लनूए, किजोकि पेइले तुस एस बत्तां नईं च़लोरे।” फिरी यहोशूए इस्राएली लोकन सेइं ज़ोवं, “तुस अपने आपे पवित्र केरा; किजोकि कालां यहोवा तुश्शे दरमियाने मां चमत्कार केरेलो।” होरसां यहोशूए याजकन सेइं ज़ोवं, “करारेरो सन्दूख छ़ुइतां लोकन करां अग्री-अग्री च़ला।” तैखन तैना करारेरो सन्दूख छ़ुइतां अग्री-अग्री च़ले।
तैखन यहोवाए यहोशू सेइं ज़ोवं, “अज़्ज़ेरी दिहैड़ी करां अवं सेभी इस्राएली लोकां केरे सामने तीं महान बनेइलो, ज़ैस सेइं तैन्न पतो च़ले कि ज़ेन्च़रे अवं मूसे सेइं साथी रहतो थियो तेन्च़रे अवं तीं सेइं भी साथी आईं। ते तू करारेरे सन्दूखे छ़ूनेबाले याजकन ऐह हुक्म दे, ‘ज़ैखन तुस यरदन दरियाएरे बन्ने पैनी कां पुज़थ, तैखन यरदन दरियाए मां खड़े भोइयथ।’”
तैखन यहोशूए इस्राएली लोकन सेइं ज़ोवं, “नेड़े एइतां अपने परमेशर यहोवारे वचन शुना।” ते लोकां केरे एजनेरे बाद यहोशू ज़ोने लगो, “इस गल्ली सेइं तुसन पतो च़लेलो कि ज़ींतो परमेशर तुश्शे दरमियाने मांए, ते इस मां कोई शक नईं तै तुश्शे सामनेरां कनानी, हित्ती, हिब्बी, परिज्जी, गिर्गाशी, एमोरी, ते यबूसी लोकन तैन केरे मुल्खे मरां केढी देलो। शुना, सैरी धेरतरे प्रभु परमेशरेरे करारेरो सन्दूख तुसन अग्री-अग्री यरदन दरियाएरे पार गाने बालोए। एल्हेरेलेइ हुनी इस्राएलेरे गोट्लन मरां 12 मैन्हु च़ुना, तैना एक्की-एक्की गोट्ले मरां अक-अक मड़द भोन। ते ज़ैस मौके सैरी धेरतरे प्रभु यहोवारो करारेरो सन्दूख छ़ूनेबाले याजकां केरे पव यरदन दरियाएरे पैनी मां पेले, तैस मौके यरदन दरियाएरू बगतू पानी रुकी गालू, ते ढेर भोइतां टिकी गालू।”
एल्हेरेलेइ ज़ैखन इस्राएली लोकेईं अपने डेरन मरां यरदन दरियाए पार गानेरे लेई सफर शुरू कियूं, ते याजक करारेरे सन्दूखे छ़ुइतां लोकन अग्री-अग्री च़ले, ते सन्दूख छ़ूनेबाले याजक यरदन दरियाएरे बन्ने पुड़ पुज़्ज़े, ते सन्दूख छ़ूनेबाले याजकां केरे पव यरदन दरियारे पैनी मां पे, (फसलरे कटनेरे मौके सारे दिहाड़न मां यरदन दरियाएरू पानी अपने निशाने करां उबरू च़ेढ़तां बांमेइं बगते।) तैखन ज़ैन पानी बांमेइं बगतू थियूं, तैन बड़े दूर आदाम नगरे कां ज़ैन सारतान नगरेरे नेड़े तैड़ी रुकतां अक ढेर बेनि जेवं, ते दिवारारू ज़ेरू खड़ू राव, ते ज़ैन पानी मैइदानेरे समुन्दर ज़ैस जो खारो समुन्दर1 भी ज़ोतन तैस पासे बगतू थियूं, तैन पूरे तरीके सेइं शुक्की जेवं; ते इस्राएली लोक यरीहो नगरेरे सामने पार पुज़्ज़ी जे। ते याजक यहोवारे करारेरो सन्दूख छ़ुइतां यरदन दरियारे ज़मीनी पुड़ बराबर खड़े राए, ज़ांतगर सारे इस्राएली लोक शुकोरी ज़मीनी पुड़मेइं पार न पुज़्ज़े, आखरकार सैरी कौमरे लोक यरदन दरियाए पार च़ले जे।
Source notes (1)
- Footnote खारो समुन्दर इब्रानी भाषाई मां इस जो अराबा ज़ोतन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.