Bhadrawahi Bible
अय्यूब 42
अय्यूबेरू पसतानू ते दुबारां बस्सनू
तैखन अय्यूबे यहोवा जुवाब दित्तो;
“हे यहोवा अवं ज़ानताईं कि तू सब किछ केरि सकतस,
ते तेरी योजनान मरां कोई रुकी न सके।
तीं मीं पुछ़ू, ‘तू कौन आस ज़ै बगैर ज्ञानी भोइतां योजना पुड़ पड़दो छ़डतस?’
पन मीं त ज़ैन न थियूं समझ़ोरू तैन्ने ज़ोवं,
मतलब ज़ैना गल्लां मेरे लेई जादे मुश्किल ते मेरी समझ़ी करां बेइर थी ज़ैन्न अवं ज़ानतो भी न थियो।
तीं मीं सेइं ज़ोवं, ‘अवं बिनती केरताईं शुन,
अवं किछ ज़ोइलो, अवं तीं सेइं सवाल केरताईं, तू मीं जुवाब दे।’
मीं कन्न सेइं तेरी खबर शुनोरी थी,
पन हुनी मेरी एछ़्छ़ी तीं हेरतिन;
एल्हेरेलेइ मीं एप्पु पुड़ नफरत एइतीए,
ते अवं धूड़ी ते मांज़न मां1 पसताताईं।”
अय्यूबेरू बड़े अज़मैइशी करां छुटनू
ते एरू भोवं कि ज़ैखन यहोवा इना गल्लां अय्यूबे सेइं ज़ोई, तैखन तैने तेमानी एलीपजे सेइं ज़ोवं, “मेरी सरक तेरे ते तेरे दूईये दोस्तन पुड़ भड़कोरीए, किजोकि ज़ेरि ठीक गल मेरे दास अय्यूबे मेरे बारे मां ज़ोवरीए, तेरही तुसेईं लोकेईं न ज़ोई। एल्हेरेलेइ हुनी तुस सत दांत ते सत हुड़ तैलतां मेरे दास अय्यूबेरे ड्लखोरां गेइतां अपने लेई होमबलि च़ाढ़ा, तैखन मेरो दास अय्यूब तुश्शे लेई प्राथना केरेलो, किजोकि तैसेरी प्राथना अवं कबूल केरेलो; ते न, त अवं तुसन सेइं तुश्शी बेवकूफरे काबल बर्ताव केरेलो, किजोकि तुसेईं लोकेईं मेरे बारे मां मेरे दास अय्यूबेरी ज़ेरि ठीक गल न ज़ोई।” इन शुन्तां तेमानी एलीपज, शूही बिल्दद ते नामाती सोपरे गेइतां यहोवारे हुक्मेरे मुताबिक कियूं, ते यहोवा अय्यूबेरी प्राथना कबूल की।
ज़ैखन अय्यूबे अपने दोस्तां केरे लेई प्राथना की, तैखन यहोवा तैसेरो सारो दुख दूर कियो, ते ज़ेत्रू अय्यूबेरू पेइले थियूं, तैसेरू दुगनू यहोवा तैस दित्तू। तैखन तैसेरे सब ढ्ला, ते सब बेइनां, ते ज़ेत्रे पेइले तैस ज़ानते-पिशानते थिये, तैन सेब्भेईं एइतां तैस कां तैस साथी रोट्टी खाइ; ते ज़ेत्री मुसीबत यहोवा तैस पुड़ छ़ेडोरी थी, तैन केरे बारे मां तैनेईं तैस दिलासो दित्तो ते तसल्ली दित्ती; ते तैन अक-अक चैंदरो सिक्को2 ते सोन्नेरी अक-अक बाली दित्ती। ते यहोवा अय्यूबेरे बादेरे दिहाड़न मां तैस पेइलेरे दिहाड़न करां जादे बरकत दित्ती; ते तैस कां 14000 भैड्डां-छ़ेल्ली, 6000 ऊँट, 1000 जोड़ी दांत, ते 1000 गधे भोइ जे। ते तैस सत मट्ठां ते ट्लाई कुइयां भी भोइ। इन मरां तैने बेड्डी कुइयरू नवं त यमीमा, दूइयोंवेरू कसीआ ते ट्लेइयोवंरू केरेन्हप्पूक रख्खू। ते तैस सारे मुल्खे मां एरी कौन्शां कोन्ची न थी, ज़ैना अय्यूबेरे कुइयां केरे बराबर खूबसूरत भोन, ते तैन केरे बाजे तैन्न तैन केरे ढ्लान सेइं साथी ही विरासत दित्ती। इसेरे बाद अय्यूब 140 साल ज़ींते राव, ते च़ेवर पीढ़न तगर अपनु खानदान लावं। आखरी मां अय्यूब बुढे बारे मां बुढो भोइतां मेरि जेव।
Source notes (2)
- Footnote धूड़ी ते मांज़न मां अपनो दुख हिरानेरे लेई लोक धूड़ ते मांज़न अपने दोग्गन पुड़ छ़डते थी।
- Footnote चैंदरो सिक्को इना चैंदरे टुक्ड़े भोते थी, ज़ैना चीज़ां बेच़ने ते घिन्नेरे लेई इस्तेमाल भोते थी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.