Bhadrawahi Bible
अय्यूब 33
“एल्हेरेलेइ हुनी, हे अय्यूब! मेरी गल्लां शुन,
ते मेरी सब गल्लन पुड़ ध्यान दे।
मीं त अपनु आशी खोलोरू आहे,
ते मेरी ज़िभ ऐशी मां ज़ोनेरे लेई तियारे।
मेरी गल्लां मेरे मनेरी सच़्च़ाई बांदी केरेली;
ज़ैन ज्ञान अवं रखताईं तैस सच़्च़ैई सेइं ज़ोइलो।
अवं परमेशरेरी आत्मा बनेवरोइं,
ते सर्वशक्तिमान परमेशरेरे शाहे सेइं मीं ज़िन्दगी मैलतीए।
अगर तू मीं जुवाब देइ सकस त दे;
अपनो आप तियार रख ते मेरो मुकाबलो केर।
हेर, अवं परमेशरेरे सामने तेरो ज़ेरो आईं;
अवं भी मित्ती सेइं बनोरो आईं।
शुन, तीं मेरे डरके मारे घबरानू न पेलू,
ते न तू मेरे भारे सेइं देबोलो।
इस मां शक नईं तेरी एरी गल मेरे कन्न मां पेवरीए
ते मीं तेरी गल्लां शुनोरिन।
‘अवं त पवित्र ते बगैर पापे ते बगैर नुक्से आईं;
ते मीं मां अधर्म नईं।
हेर, परमेशर मीं सेइं लड़नेरो बहानो तोपते,
ते मीं अपनो दुश्मन समझ़तस;
तै मेरे दूईये पव्वन बेड़ी मां लाते,
ते मेरी सारी चाली पुड़ नज़र रखते।’
हेर, अवं तीं जुवाब देताईं, इस गल्ली मां तू सच़्च़ो नईं।
किजोकि परमेशर मैन्हु करां महाने।
तू तैस सेइं किजो झगड़तस?
किजोकि तै अपने कोन्ची गल्लरो हिसाब न दे।
किजोकि परमेशर त एक्की कुन बल्के दूई बार ज़ोते,
पन लोक तैस पुड़ ध्यान न देन।
सुपने मां, या राती दित्तोरे दर्शने मां,
ज़ैखन मैन्हु बड़े निड्ली मां भोतन,
या बिछ़ाने पुड़ झ़ुलते वक्ते,
तैखन तै मैन्हु केरे कन खोलते,
ते तैन खबरदारी देइतां डराते,
ज़ैस सेइं तै मैन्हु तैसेरे मकसदे करां रोके
ते घमण्डे मैन्हु मरां दूर केरे।
तै तैसेरे प्राणे खड्डे करां बच़ाते,
ते तैसेरे ज़िन्दगी मौतरी करां बच़ाते।
तैस झ़िड़क भी दित्ती गातीए, कि तै अपने बिछ़ाने पुड़ पेवरो-पेवरो तड़फते,
ते तैसेरी हेड्डी-हेड्डी मां लगातार तकलीफ भोतीए।
इड़ी तगर कि तैसेरे प्राण रोट्टी सेइं,
ते तैसेरो मन सुवैदली रोट्टी सेइं नफरत केरने लगते।
तैसेरी जान एरी शुक्की गातीए कि लेइहोए न;
ते तैसेरी हेड्डी निस्सी एइतिन ज़ैना पेइली लेइहोती न थी।
तैखन तै कब्रारे नेड़े पुज़ाते,
ते तैसेरी ज़िन्दगी नाश केरनेबालां केरे कैबू मां भोइ गातीए।
अगर तैसेरेलेइ कोई दरमियानी केरनेबालो स्वर्गदूत मैल्हे,
ज़ै हज़ारे मरां अक्के भोए।
ते ज़ै मैन्हु जो ज़ोए कि तैसेरेलेइ कुन ठीके।
त परमेशर तैस पुड़ अनुग्रह केरतां ज़ोते,
‘तैस खड्डे मां गाने करां बच़ा,
मीं छुटकारेरी कीमत मैल्होरीए।
तैखन तैस मैन्हेरी जान बच्चेरे जानी करां सझ़र ते नर्म भोइ गाली;
तैसेरी जुवैनरी ताकत फिरी वापस एज्जेली।’
तै परमेशरे कां बिनती केरेलो, ते तै तैस सेइं खुश भोल्हो,
तै आनन्दे सेइं परमेशरेरू दर्शन केरेलो,
ते परमेशर मैन्हु पेइलेरो ज़ेरो धर्मी बनालो।
तै मैन्हु केरे सामने गीतां ज़ोते,
‘मीं पाप कियो, ते सच़्च़ाई उलट-पुलट की,
पन तैसेरो बदलो मीं दित्तो न जेव।
परमेशरे मेरे प्राण कब्री मां गाने करां बच़ाए,
मेरी ज़िन्दगी लौई लाएली।’
हेर, एरां-एरां सब कम्मां परमेशर मैन्हु सेइं साथी दूई बार कुन
बल्के ट्लाई बार भी केरते,
ज़ैस सेइं तैस कब्री करां बच़ाए,
ते तैस ज़िन्दगरे लोकेरे लौई मां लौ मैल्हेली।
हे अय्यूब! ध्याने सेइं मेरी शुन;
च़ुप रा, ते मीं ज़ोने दे।
अगर तीं गल ज़ोनी भोए, त मीं जुवाब दे;
ज़ो, किजोकि अवं तीं बेकसूर ठहरानो चाताईं।
अगर नईं, त तू मेरी शुन;
च़ुप रा, अवं तीं अक्लरी गल शिखालेलो।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.