Bhadrawahi Bible
अय्यूब 20
सोपरेरी दलील
तैखन नामाती सोपरे ज़ोवं,
“मेरो दिल चाते कि जुवाब देईं,
ते एल्हेरेलेइ ज़ोने मां जल्दी केरताईं।
मीं एरी डांट शुनी ज़ैस सेइं मेरी निन्दा भोइ,
ते मेरी आत्मा अपने समझ़रे मुताबिक तीं जुवाब देतीए।
कुन तू ई नियम न ज़ानस ज़ै पुरानो
ते तैस वक्तेरोए
ज़ैखन इन्सान धेरती पुड़ बसाव जेव,
दुष्टां केरि ज़ींत एक्की पलेरी भोतीए
ते अधर्मी मैन्हु केरो आनन्द थोड़े वक्तेरो भोते?
चाहे एरे मैन्हेरू अभिमान अम्बरे तगर पुज़्ज़े,
ते तैसेरी क्रोड़ी बिदलारी तगर पुज़्ज़े,
फिरी भी तै अपने मल-मूत्रेरो ज़ेरो हमेशारे लेई नाश भोइ गालो;
ते ज़ैना तैस हेरते थिये तैना पुछ़ेले कि तै कोड़ि राव?
तै सुपनेरो ज़ेरो गाईब भोइ गालो ते कोन्ची फिरी न मैल्हेलो;
राती हेरोरे शक्लरो ज़ेरो तै रेइ न सकेलो।
ज़ैनी तै लाहोरो भोए फिरी तैस न लाहेलो,
ते अपने ठारी पुड़ तैसेरो कोई पतो न रालो।
तैसेरे मट्ठां कंगालन सेइं भी बिनती केरेलां,
ते तै अपनो थसोड़ोरो माल वापस देलो।
तैसेरी हेड्डन मां जुवैनरी ताकत भेरोरीए
पन तै तैस्से सेइं साथी मित्ती मां मिली गालो।
चाहे बुराई तैस मिट्ठी लग्गे,
ते तै तैस अपनि ज़िभी हैठ छ़ुपेइतां रख्खे,
ते तै तैस बच़ेइतां रख्खे ते न छ़डे,
बल्के तैस अपने ऐशी मां दबेइतां रख्खे,
फिरी भी तैसेरी रोट्टी तैसेरे पेट मां बेदलोली,
तैन तैसेरे अन्ट्ल सप्पेरू ज़ेरू ज़ेहर बेनि गालू।
तैने ज़ै दौलत निगलोरीए तैस तै फिरी उतारेलो;
परमेशर तैस तैसेरे पेटे मरां कढेलो।
तै सप्पां केरू ज़ेहर चूसतां नेलो,
तै खतरनाक सप्पेरे टक देने सेइं मेरि गालो।
तै दरियान मतलब माछ़ी
ते ज़म्मेरू दुद्धेरे दरिया हेरी न सकेले।
ज़ेसेरे लेई तैने मेहनत की,
तैस तैने वापस एइतां देनू पेलू, ते तै तैस निगली न सकेलो;
तैसेरी घिन्नोरी चीज़न सेइं ज़ेत्रो आनन्द भोवरो लोड़े,
एत्रू त तैस न मैल्हेलू।
किजोकि तैने कंगाल पीहतां छ़ेडी दित्ते,
तैने घर थसोड़ू, ज़ैन तैनी नईं बनेवरू।
लालच़ेरे मारे तैस कधी शान्ति न थी मैलती,
एल्हेरेलेइ तै अपनि कोई मन पसंद चीज़ बच़ेइ न सकेलो।
कोई चीज़ एरी न राई ज़ै तैने निगली न;
एल्हेरेलेइ तैसेरू सुख बनोरू न रालू
पूरी जाईदात रहते भी तै तेंगी मां पेलो;
तैखन सब दुखी लोकां केरे हथ तैस पुड़ खड़े भोल्हे।
एरू भोल्हु, कि तैसेरू पेट भरने पुड़ भोल्हु,
परमेशर अपनि सरक तैस पुड़ भड़कालो,
ते रोट्टी खानेरे वक्त तै तैस पुड़ पेलो।
तै लोंहेरे हथियारे करां नशेलो,
ते पितलरे धनुषे सेइं मारो गालो।
तै तैस तीरे खिचतां अपने पेट मरां कढेलो,
तैसेरी चमकने बाली नोक तैसेरे पित्ते मांमेइं निस्सेली,
डर तैस मां बस्सोरो रालो।
तैसेरी छ़ुपेवरी दौलती पुड़ बड़ू आंधरू पेलू।
तै एरी अग्गी सेइं भस्म भोल्हो, ज़ै मैन्हेरी लेवरी न भोए;
ते तैस्से सेइं तैसेरे डेरे मां ज़ै बच़ोरो भोए तै भी भस्म भोइ गालो।
अम्बर तैसेरो अधर्म बांदो केरेलो,
ते धरती तैसेरे खलाफ खड़ी भोल्ही।
तैसेरे घरेरी जाईदात नाश भोइ गाली,
तै परमेशरेरे सरकरे दिहाड़े रुड़ी गाली।
परमेशरेरे तरफां दुष्ट मैन्हेरो अंश,
ते तैसेरेलेइ परमेशरेरो ठहरावरो हिस्सो ईए आहे।” 1
Source notes (1)
- Cross-reference अय्यू. 27:13.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.