Bhadrawahi Bible
यिर्मयाह 37
सिदकिय्याहेरी बिनती
यहोयाकीमेरू मट्ठू कोन्याहेरे ठैरी योशिय्याहेरू मट्ठू सिदकिय्याह राज़ केरने लगू, किजोकि बाबेलेरे राज़े नबूकदनेस्सरे तैए यहूदा प्रदेशेरो राज़ो ठहरावरो थियो। पन न त तैनी, न तैसेरे अधिकैरेईं, ते न आम लोकेईं यहोवारू वचन मन्नू ज़ैन तैनी मेरे ज़िरिये ज़ोवरू थियूं।
सिदकिय्याह राज़े शेलेम्याहेरे मट्ठे यहूकल ते मासेयाहेरे मट्ठे सपन्याह याजकेरे मीं कां ई सन्देश भेज़ो, “इश्शे लेई इश्शे परमेशर यहोवा कां प्राथना केर।” तैस वक्त अवं कैदखाने मां न थियो हेजू छ़डोरो, ते लोकन मां एइतो गातो थियो। तैस मौके फ़िरौनेरी सेना हमलो केरनेरे लेई मिस्र मुल्खेरां निस्सी; तैखन कसदी ज़ैनेईं यरूशलेम नगर घेरोरू थियूं, तैसेरी खबर शुन्तां तैट्ठां च़ले जे।
तैखन यहोवा मीं सेइं इन ज़ोवं, “इस्राएलेरो परमेशर यहोवा एन ज़ोते: यहूदारे ज़ैनी राज़े तुस प्राथना केरनेरे लेई मीं कां भेज़ोरेथ, तैस सेइं इन ज़ोथ, ‘हेर, फ़िरौनेरी ज़ै सेना तुश्शी मद्दत केरनेरे लेई निस्सोरीए तै अपने मिस्र मुल्खे जो वापस गाली। कसदी फिरी वापस एइतां एस नगरे सेइं लड़ेले; ते एस पुड़ कब्ज़ो केरेले ते फुकेले। यहोवा एन ज़ोते: एन ज़ोइतां तुस अपने-अपने मने मां धोखो न खाथ “कसदी असन करां सच़्च़े च़ले जेवरेन;” किजोकि तैना च़ले न जे। किजोकि अगर तुसेईं कसदी केरि सारी सेना ज़ै तुसन सेइं लड़ती एवरीए, एरहो हमलो कियोरो भी भोथो कि तैन मां सिर्फ ज़खमी लोक रेई गाथे, फिरी भी तैना अपने-अपने तेम्बु मरां उठतां एस नगरे फुकेथे।’”
यिर्मयाह कैद भोनो ते तैसेरो छुटकारो
ज़ैखन कसदी लोकां केरि सेना फ़िरौनेरी सेना करां डरेरे मारे यरूशलेम नगरे करां च़ली जेई, तैखन मीं यरूशलेम नगरे मरां निस्तां बिन्यामीन प्रदेशेरे पासे एल्हेरेलेइ निस्सो कि तैट्ठां होरि लोकन साथी अपनो हिस्सो नेही। ज़ैखन अवं बिन्यामीनेरे प्रदेशेरे फाटके मां पुज़्ज़ो, तैखन यिरिय्याह नंव्वेरो अक पहरेदारां केरो अक प्रधान तैड़ी थियो ज़ैन शेलेम्याहेरू मट्ठू ते हनन्याहेरू पोट्लड़ू थियूं, ते तैनी अवं एन ज़ोइतां ट्लाव, “तू कसदी लोकन कांजो नशने लेवरोस।” तैखन मीं ज़ोवं, “एन झूठे; अवं कसदी लोकन कांजो नईं लेवरो नशने।” पन यिरिय्याह मेरी अक गल न मन्नी, ते तैनी अवं ट्लेइतां हाकिमन कां नेव। तैखन हाकिम मीं पुड़ सेरकोए ते तैस मार दुवाई, ते योनातान प्रधानेरे घरे मां कैदी बनेइतां छ़डो; किजोकि तैनेईं तैन घर आम कैदखानो बनेवरू थियूं।1
तैस तहखानेरे कैदखाने मां बेड़ि कालकोठरी थी अवं तैड़ी बड़े दिहाड़े कैद राव। तैसेरे बड़े दिहाड़े बीतने पुड़ सिदकिय्याह राज़े अवं कुजव, ते अपने मेहले मां छ़ेपतां ऐह सवाल पुछ़ो, “कुन यहोवा तीं सेइं किछ ज़ोवरूए?” मीं ज़ोवं, “हाँ, ज़ोवरूए। तैन एन आहे, कि तू बाबेलेरे राज़ेरे कब्ज़े कियो गालो।”
फिरी मीं सिदकिय्याह राज़े सेइं ज़ोवं, “मीं तेरो ते तेरे अधिकैरी केरो ते तेरे लोकां केरो कुन पाप कियोरोए, कि तुसेईं अवं कैदखाने मां छ़डोरो आईं? तुश्शे ज़ैना नबी तुसन सेइं नबूवत केरतां ज़ोते थिये कि बाबेलेरो राज़ो तुसन पुड़ ते एस मुल्खे पुड़ चढ़ाई न केरेलो, तैना हुनी कोड़िए आन? हुनी, मेरे मालिक, हे राज़ा, मेरी बिनती कबूल केर कि मीं योनातान प्रधानेरे घरे मां फिरी न भेज़, नईं त अवं तैड़ी मेरि गालो।” तैखन सिदकिय्याह राज़ेरे हुक्मे सेइं अवं पहरेरे अंगने मां रख्खो जेव, ते ज़ांतगर नगरेरी सब रोट्टी मैलती थी, तैखन तगर तैस रोट्टी केरि दुकानी मरां रोज़ अक रोट्टी दित्ती गाती थी। अवं पहरेरे अंगने मां राने लगो।
Source notes (1)
- Cross-reference इब्रा. 11:36.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.