Bhadrawahi Bible
यिर्मयाह 36
यहोवारे भवने मां बारूक किताब पढ़ते
फिरी योशिय्याहेरे मट्ठे यहूदारे राज़े यहोयाकीमेरे राज़ केरनेरे च़ेवरोवं साले मां यहोवा मीं सेइं ज़ोवं, “अक किताब नेइतां ज़ेत्रे वचन मीं तीं सेइं योशिय्याहेरे राज़े केरनेरे वक्ते करां यानी ज़ैखन करां अवं तीं सेइं गल्लां केरने लगोरो आईं तैस वक्ते करां अज़ तगर इस्राएल ते यहूदा ते सेभी कौमन केरे बारे मां ज़ोवरूए, सब तैस मां लिख। भोइ सकते यहूदा प्रदेशेरे लोक तैस सैरी मुसीबतरी खबर शुन्तां ज़ै अवं तैन पुड़ छ़डनेरे बारे मां सोचने लगोरोईं अपनि बुरी चाल करां फिरन ते अवं तैन केरे अधर्म ते पापे माफ़ केरीं।”
एल्हेरेलेइ मीं नेरिय्याहेरू मट्ठू बारूक कुजव, ते बारूके यहोवारे सब वचन ज़ैना मीं सेइं ज़ोवरे थिये, तैस करां शुन्तां किताबी मां लिखे। फिरी मीं बारूके हुक्म देइतां ज़ोवं, “मीं यहोवारे भवने मां गानेरी अज़ाज़त नईं। एल्हेरेलेइ तू बरतेरे दिहाड़े यहोवारे भवने मां गेइतां तैसेरे ज़ैन वचन तीं मीं करां शुन्तां लिखोरेन, किताबी मरां लोकन पेढ़तां शुनेइयां, ते ज़ेत्रे यहूदी लोक अपने-अपने नगरे मरां एज्जेले, तैन भी पेढ़तां शुनेइयां। भोइ सकते तैना यहोवा कां छंदे केरतां प्राथना केरन ते अपनि-अपनि बुरी चाली करां फिरन; किजोकि ज़ै सरक ते क्रोध यहोवा अपने लोकन पुड़ भड़कानेरे लेई ज़ोवरूए, तै बड़ोए।” मेरे एस हुक्मेरे मुताबिक नेरिय्याहेरे मट्ठे बारूके, यहोवारे भवने मां तैस किताबी मरां तैसेरे वचन पेढ़तां शुनाए।
योशिय्याहेरे मट्ठे यहूदारे राज़े यहोयाकीमेरे राज़ केरनेरे पंच़ोंव सालेरे नोवोवं महीने मां यरूशलेम नगरे मां ज़ेत्रे लोक थिये, ते यहूदा प्रदेशेरे नगरन मरां ज़ेत्रे लोक यरूशलेम नगरे मां एवरे थिये, तैनेईं यहोवारे सामने बरत रखनेरो प्रचार कियो। तैखन बारूके यहोवारे भवने मां सेभी लोकन शापानेरे मट्ठे गमर्याह ज़ै प्रधान थियो, तैसेरे कमरे मां ज़ै बेइयें अंगने मां यहोवारे भवनेरे नंव्वे फाटके कां थियो, मीं सब वचन किताबी मरां पेढ़तां शुनाए।
राज़ेरे मेहले मां किताब पढ़ी गानी
तैखन शापानेरे मट्ठे गमर्याहेरे मट्ठे मीकायाहे यहोवारे सारे वचन किताबी मरां शुने। ते तै राज़ेरे मेहलेरे प्रधानेरे कमरे मां बुन जेव, ते कुन हेरू कि तैड़ी एलीशामा प्रधान ते शमायाहेरू मट्ठू दलायाह ते अकबोरेरू मट्ठू एलनातान ते शापाननेरू मट्ठू गमर्याह ते हनन्याहेरू मट्ठू सिदकिय्याह ते सब हाकिम बिशोरेन। मीकायाहे ज़ेत्रे वचन तैस वक्त शुने, ज़ैखन बारूके किताबी मरां लोकन पेढ़तां शुनेवरे थिये, तैन सेभी केरे बारे मां ज़िक्र कियूं। तैन शुन्तां सब हाकिमेईं येहूदी ज़ैन नतन्याहेरू मट्ठू ते शेलेम्याहेरू पोट्लड़ू ते कूशी एरू पड़पोट्लड़ू थियूं, बारूके कां एन ज़ोनेरे लेई भेज़ू, “ज़ैस किताबी मरां तीं सब लोकन पेढ़तां शुनेवरूए, तैस अपने हथ्थे मां घिन्तां एई।” एल्हेरेलेइ नेरिय्याहेरू मट्ठू बारूक तै किताब हथ्थे मां घिन्तां तैन कां अव। तैखन हाकिमेईं तैस सेइं ज़ोवं, “हुनी बिश गा ते असन एन पेढ़तां शुना।” तैखन बारूके तैन पेढ़तां शुनाव। ज़ैखन तैनेईं तैना सब वचन शुने, तैखन थरकते एक्की होरि तकने लगे; ते तैनेईं बारूके सेइं ज़ोवं, “असां ज़रूर राज़े सेइं एन सब वचना केरू ज़िक्र केरमेले।” फिरी तैनेईं बारूके सेइं पुछ़ू, “असन सेइं ज़ो, कुन तीं इना सब वचन तैसेरे ज़बाना शुन्तां लिखे?” बारूके तैन्न जुवाब दित्तो, “तै इना सब वचन अपने ज़बाना शुनातो जेव ते अवं एन्न किताबी मां शैही सेइं लिखतो जेव।” तैखन हाकिमेईं बारूके सेइं ज़ोवं, “गा, तू अपनो आप ते यिर्मयाह छ़ुपा, ते कोन्ची पतो न लग्गे कि तुस कोड़िए आथ।”
किताब फुक्की गानी
तैखन तैना हाकिम किताब एलीशामा प्रधानेरे कमरे मां रेखतां राज़े कां अंगने मांए; ते राज़े सेइं तैना सब वचन ज़ोए। तैखन राज़े येहूदी किताब आन्नेरे लेई भेज़ो, तैनी तै एलीशामा प्रधानेरे कमरे नेइतां राज़े ते ज़ैना हाकिम तैसेरे आसे-पासे खड़े थिये तैन भी पेढ़तां शुनाई। राज़ो हिवंतड़ेरे मेहले मां बिशोरो थियो, किजोकि नोवोवं महीनो थियो ते तैसेरे सामने अंगीठी बलने लगोरी थी। ज़ैखन येहूदी ट्लाई च़ेवर बरके पढ़े, तैखन तैनी तै किताब चैकू सेइं कट्टी ते अग अंगीठी मां थी तैस मांजो शारी; एन्च़रे सेइं अंगीठरी अग्गी सेइं पूरी किताब भस्म भोइ जेई। पन ज़ैनेईं तैना सब वचन शुनोरे थिये तैन मरां कोई न डरो ते न तैन मरां केन्चे दुखेरे मारे अपना लिगड़ां छ़िंदां, यानी ज़ैनेईं तैना सब वचन शुनोरे थिये न राज़े ते न तैसेरे अधिकैरन मरां केन्चे एरू कियूं। एलनातान ते दलायाह ते गमर्याहे राज़े सेइं बिनती भी कियोरी थी कि किताब न फुक, पन तैनी तैन केरि अक न शुनी। तैखन राज़े अपने मट्ठे यरहमेल, ते अज्रीएलेरे मट्ठे सरायाह ते अब्देलेरे शेलेम्याहे हुक्म दित्तो कि बारूक लिखने बालो ते यिर्मयाह नेबी ट्लान, पन यहोवा तैना छ़ुपेइतां रख्खे।
यिर्मयाह दुबारां फिरी किताब लिखावाते
ज़ैखन राज़े तैन वचन केरि किताब ज़ै बारूके यिर्मयाह करां शुन्तां लिखोरी थी, फुक्की छ़डी, तैखन यहोवा मीं सेइं ज़ोवं, “फिरी अक होरि किताब नेइतां तैस मां यहूदारे राज़े यहोयाकीमेरे फुकोरी पेइली किताबरे सब वचन लिख। ते यहूदारे राज़े यहोयाकीमेरे बारे मां ज़ो, ‘यहोवा एन ज़ोते: तीं तै किताब एन ज़ोइतां फुकोरीए कि तीं तैस मां एन किजो लिखेरूए कि बाबेलेरो राज़ो सच़्च़े एइतां एस मुल्खे नाश केरेलो, ते तैस मां न त मैन्हन छ़डेलो ते न जानबरन। एल्हेरेलेइ यहोवा यहूदारे राज़े यहोयाकीमेरे बारे मां एन ज़ोते, कि तैसेरो कोई दाऊदेरे तखते पुड़ बिशेलो; ते तैसेरी लाश एन्च़रे शारी गाली कि दीसां धुप्पी मां ते राती पाले मां राली। अवं तैस ते तैसेरे खानदाने ते अधिकैरन तैन केरे पापां केरि सज़ाह देइलो; ते ज़ेत्री मुसीबतां मीं तैन पुड़ ते यरूशलेमेरे ते यहूदारे सेभी लोकन पुड़ छ़डनेरे लेई ज़ोवरूए, ते ज़ैन तैनेईं सच़ न मन्नू, तैना सब अवं तैन पुड़ छ़डेलो।’”
तैखन यिर्मयाह होरि किताब नेइतां नेरिय्याहेरे मट्ठे बारूके लिखनेबाले दित्ती, ते ज़ै किताब यहूदारे राज़े यहोयाकीमे अग्गी मां फुकोरी थी, तैस ज़ेत्रे वचन थिये तैना सब बारूके मेरी ज़बाना शुनी-शुनी तैस मां लिखे; ते तैन वचन्न मां तैन केरि ज़ेरि भी बेड़ि गल्लां लिखी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.