Bhadrawahi Bible
यिर्मयाह 38
शुकोरे खुहे मां यिर्मयाह नबी
फिरी एक्सां ज़ैन वचन अवं सब लोकन सेइं ज़ोतो थियो, तैन मत्तानेरे मट्ठे शपत्याह, पशहूरेरे मट्ठे गदल्याह, शेलेम्याहेरे मट्ठे यूकले ते मल्किय्याहेरे मट्ठे पशहूरे शुनू, “यहोवा एन ज़ोते कि ज़ै कोई एस नगरे मां रालो तै तलवार, काल ते मरी सेइं मरेलो; पन ज़ै कोई कसदी लोकन कांजो नेशतां गालो तै अपनि जान बच़ेइतां ज़ींतो रालो। यहोवा एन ज़ोते, एन नगर बाबेलेरे राज़ेरे सेनारे कब्ज़े मां कियूं गालू ते तै एस नेलो।” एल्हेरेलेइ तैन हाकिमेईं सिदकिय्याह राज़े सेइं ज़ोवं, “तैस मैन्हु माराथ, किजोकि तै एस नगरे मां बच़ोरे सिपेहिन ते बाकी सब लोकन सेइं एरी-एरी गल्लां ज़ोते ज़ैस सेइं तैन केरे हथ पव ढिल्ले भोइ गातन। किजोकि तै मैन्हु इन लोकां केरि भलियाई नईं बल्के बुराई ही चाते।” सिदकिय्याह राज़े ज़ोवं, “शुना, तै त तुश्शे कब्ज़े मांए; किजोकि एरू न भोइ सके कि राज़ो तुश्शे खलाफ किछ केरि सके।” तैखन तैनेईं अवं नेइतां राज़ेरे मट्ठे मल्किय्याहेरे तैस खुहे मां ज़ैन पहरेरे अंगने मां थियूं, रेस्सन सेइं ओसैलतां छ़ेडी दित्तो। ते तैस खुहे मां पानी न थियूं सिर्फ च़िकर थी, ते अवं च़िकरी मां फेसी जेव।
तैस वक्त राज़ो बिन्यामीन प्रदेशेरे फाटके कां बिशोरो थियो, एल्हेरेलेइ ज़ैखन एबेदमेलेक कूशी मैन्हे ज़ै राज़ेरे मेहले मां अक खोजो थियो, शुनू, कि तैनेईं यिर्मयाह खुहे मां छ़डोरोए। तैखन एबेदमेलेक राज़ेरे मेहले मरां निस्तां राज़े सेइं ज़ोने लगो, “हे मेरे मालिक, हे राज़ा, तैन लोकेईं यिर्मयाह नेबी सेइं ज़ैन किछ कियोरूए तैन बुरूए, किजोकि तैनेईं तै खुहे मां छ़डोरोए; तैड़ी तै ढ्लुखी सेइं मेरि गालो किजोकि नगरे मां किछ रोट्टी न राहोरी।” तैखन राज़े एबेदमेलेक कूशी ऐह हुक्म दित्तो, “इट्ठां 30 ज़ने साथी नेइतां यिर्मयाह नेबी मरने करां पेइले खुहे मरां कढ।” एल्हेरेलेइ एबेदमेलेके तेत्रे मड़दन सेइं नेइतां मेहलेरे भण्डारेरे तहखाने मां जेव; ते तैट्ठां छ़िन्दोरे-पुराने कपड़े ते खिन्दां नेइतां मीं कां तैस खुहे मां रेस्सन सेइं उसालां। तैखन एबेदमेलेक कूशी खोजे यिर्मयाह सेइं ज़ोवं, “इना पुराने कपड़े ते खिन्दां अपने कुछ़ैलन मां रेस्सन पुड़ रख।” मीं तेन्च़रे ही कियूं। तैखन तैनेईं अवं रेस्सन सेइं खिचतां, खुहे मरां कढो। ते अवं पहरेरे अंगने मां राने लगो।
सिदकिय्याह राज़ेरो डर ते यिर्मयाह नेबेरी सलाह
सिदकिय्याह राज़े अवं यहोवारे भवनेरे ट्लेइयोवं दारे मां एप्पु कां कुजव। ते राज़े मीं सेइं ज़ोवं, “अवं तीं अक गल पुछ़ताई; मीं करां किछ न छ़ुपा।” मीं सिदकिय्याह सेइं ज़ोवं, “अगर अवं तीं ज़ोईं, त कुन तू मीं मारालो न? ते चाहे अवं तीं सलाह भी देईं, फिरी भी तू मेरी न मन्नेलो।” तैखन सिदकिय्याह राज़े अकैल्ले मां मीं सेइं वाधो कियो, “यहोवा ज़ैनी इश्शी ज़िन्दगी पैदा कियोरीए, तैसेरी कसम अवं तीं न मारेइलो, ते न तैन मैन्हु केरे कब्ज़े मां केरेलो ज़ैना तीं जाना मरने चातन।”
मीं सिदकिय्याह सेइं ज़ोवं, “सेना केरो परमेशर यहोवा ज़ै इस्राएलेरो परमेशरे, तै एन ज़ोते, अगर तू बाबेलेरे राज़ेरे हाकिमन कां सच़्च़े च़लो गास, तैखन त तेरी जान बच़ेली, ते एन नगर फुक्कू न गालू, ते तू अपने घराने समेत ज़ींतो रालो। पन अगर तू बाबेलेरे राज़ेरे हाकिमन कां न च़लो गास, त एन नगर कसदी लोकां केरे कब्ज़े कियूं गालो, ते तैना एस फुकेले, ते तू तैन केरे हथ्थेरे बेच़ी सकेलो।” सिदकिय्याहे मीं सेइं ज़ोवं, “ज़ैना यहूदी लोक कसदी लोकन कांजो नेश्शी जेवरेन, अवं तैन करां डरताईं, एरू न भोए कि अवं तैन केरे कब्ज़े मां कियो गालो ते तैना मीं सेइं बुरो बर्ताव केरन।” मीं ज़ोवं, “तू तैन केरे कब्ज़े मां न दित्तो गालो; ज़ैन किछ अवं तीं सेइं ज़ोताईं तैस यहोवारी गल सेमझ़तां मन तैखन तेरू भलू भोल्हु, ते तेरी जान बच़ेली। पन अगर तू च़लू गानू मन्ज़ूर न केरस त ज़ै गल यहोवा मीं सेइं दर्शनेरे ज़िरिये ज़ोवरीए, तै ई आहे: हेर, यहूदारे राज़ेरे रनवासे मां ज़ेत्री कौन्शां रेई जेवरिन, तैना बाबेलेरे राज़ेरे हाकिमन कां केढतां पुज़ेई गैली, ते तैना तीं सेइं ज़ोली, ‘तेरे दोस्तेईं तू भड़कव, ते तैन केरि इच्छा पूरी भोइ जेई; ते ज़ैखन तीं पव च़िकरी मां डुब्बे त तैना पत्रोवं मुड़े।’ तेरी सब कौन्शां ते बाल-बच्चे कसदी लोकन कां केढतां पुज़ाए गाले; ते तू भी कसदी लोके केरे हथ्थे करां न बच़ेलो, बल्के तू ट्लेइतां बाबेलेरे राज़ेरे कब्ज़े मां कियो गालो ते एस नगरेरे फुक्को गानेरी वजा तू भोल्हो।”
तैखन सिदकिय्याह मीं सेइं ज़ोवं, “एन गल्लां केरो कोन्ची पतो न लोड़े लगोरो, त तू मारो न गालो। अगर हाकिम लोक एन शुन्तां कि मीं तीं सेइं गलबात की तीं कां एइतां पुछ़न, ‘असन सेइं ज़ो कि तीं राज़े सेइं कुन ज़ोवं, असन करां कोई गल न छ़ुपा, ते असां तीं न मारामेले; ते एन भी ज़ो, कि राज़े तीं सेइं कुन ज़ोवं,’ त तू तैन सेइं ज़ोइयां, ‘मीं राज़े सेइं छंदे केरतां बिनती कियोरी थी कि मीं योनातानेरे घरे मां फिरी वापस न भेज़ नईं त तैड़ी अवं मेरि गालो।’” फिरी सब हाकिमेईं यिर्मयाह कां एइतां पुछ़ू, ते ज़ेरो राज़े तैस हुक्म दित्तोरो थियो, ठीक तेन्च़रे तैनी तैन जुवाब दित्तो। एल्हेरेलेइ तैनेईं तैस सेइं होरू किछ न ज़ोवं ते न तै भेद खुल्लो। एल्हेरेलेइ ज़ैस दिहाड़े अवं यरूशलेमे जो नेव तैस दिहाड़े तगर अवं पहरेरे अंगने ही मां राव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.