Bhadrawahi Bible
यशायाह 53:5
Verse 5 is marked below, with the whole chapter around it. Read from the start
लोकेईं जुवाब दित्तो, ज़ै सन्देश असन दित्तो जेव, तैस पुड़ केनि विश्वास कियूं, ते यहोवारे हथ्थेरी शक्ति कैस पुड़ बांदी भोइ? किजोकि तै तैसेरे सामने एक्की मुन्केरेरो ज़ेरोए ते एरे ज़ीलेरो ज़ेरो उगो ज़ै शुकोरी मित्ती मां लेग्गी गाते, ते तैस मां न कोई खूबसूरती थी कि अस तैस हेरम, ते न तैसेरी शकल सूरत रोड़ी थी कि असां तैस चाथे।1 लोकेईं तै घटिया समझ़ो ते तै रद कियो, तै अक दुखी मैन्हु थियो, तै रोगन ज़ानतो थियो; लोक तैस करां तुत्तर फिराते थिये। तै घटिया समझ़ो जेव ते असेईं तैसेरी कोई कदर न की।
सच़्च़े तैनी इश्शी बिमैरी बरदाशत की, ते इश्शे दुख भी सल्हे। फिर भी असेईं तै परमेशरेरो मारोरो कुटोरो ते स्तेवरो समझ़ो।2 पन तै इश्शे पापां केरे वजाई सेइं ज़खमी कियो जेव, ते इश्शे अधर्मेरे कम्मां केरे वजाई सेइं ढ्लन्च़ो जेव; इश्शे शैन्तरे लेई तैस सज़ाह मैल्ही कि तैसेरे कोड़े खाने सेइं अस लोक बेझ़ोए।3 असां त सब भैड्डां केरे ज़ेरे टेपलोरे थिये; असन मरां सेभेइं अपनि-अपनि बत ट्लाती; ते यहोवा इश्शे सेभी केरे अधर्मेरो बोझ तैस पुड़ लेद्दी छ़डो।4
तै सताव जेव पन फिर भी तै झ़ैलतो राव ते तैनी अपने ज़बना किछ न ज़ोवं; ज़ेन्च़रे सेइं भैड मारनेरे मौके ते बरधानेरे मौके च़ुपच़ारे बिशतीए, तेन्च़रे तैनी भी अपनु आशी न खोल्लू।5 ज़ुलम केरतां ते दोष लेइतां तैना तैस घिन्तां जे; तैस वक्तेरे लोकन मरां केने इस पुड़ ध्यान दित्तू कि तै ज़ींतन मरां नियो जेव? मेरे लोकां केरे पापां केरि वजाई सेइं तैस मौतरी सज़ाह मैल्ही। तै दुष्टां केरे मझ़ाटे दब्बो जेव, ते मौतरे वक्त तै दौलतमन्देरो साथी बनो, हालांकी तैनी कधे ज़ुलम न थियो कियोरो ते न तैसेरे ज़बाना कोई बुरी गल निसोरी थी।6
फिर भी ऐह यहोवारी मर्ज़ी थी कि तैस ढ्लेन्च़े, ते तैन्नी तैस दुख दित्तो; ज़ैखन तै अपनो प्राण दोषबलि केरे, तैखन तै अपनु वंश हेरी बटेलो, तै बड़े दिहाड़े ज़ींतो रालो, तै यहोवारी मर्ज़ी पूरी केरेलो। तै अपने प्राणां केरो दुख झ़ेलतां तैसेरो फल हेरेलो ते राज़ी भोल्हो, ते अपने ज्ञानेरे ज़िरिये सेइं मेरो धर्मी दास बड़े लोकन धर्मी बनालो ते तैन केरे अधर्मेरे कम्मां केरो बोझ एप्पु उठालो।7 एल्हेरेलेइ अवं तैस महान लोकन सेइं साथी हिस्सो देइलो, ते शक्तिशाली लोकन सेइं साथी लूटरो माल बंटेलो, किजोकि तैनी अपनि जान मौतरे लेई देइ दित्तोरिए, तै पापी लोकन सेइं साथी गनो जेव, फिरी भी तैने बड़े लोकां केरे पापेरो बोझ उठाव, ते पापी लोकां केरे लेई प्राथना केरते।
Source notes (7)
- Cross-reference मरक. 9:12.
- Cross-reference मत. 8:17;1 पत. 2:24.
- Cross-reference रोम. 4:25;1 पत. 2:24.
- Cross-reference प्रेरित. 10:43;1 पत. 2:25.
- Cross-reference यूह. 1:29;मत. 27:12,14;मरक. 15:4-5;1 कुरि. 5:7;1 पत. 2:23;प्रका. 5:6,12.
- Cross-reference 1 कुरि. 15:3;1 पत. 2:22;1 यूह. 3:5;यूह. 19:38-42.
- Cross-reference रोम. 5:19.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.