Bhadrawahi Bible
यशायाह 52
इस्राएलेरो छुटकारो भोल्हो
हे सिय्योन, बींझ़, बींझ़! अपनि ताकत धारण केर; हे पवित्र नगर यरूशलेम, अपना खूबसूरत लिगड़ां ला; किजोकि तेरे दरमियान ज़ैन लोकां केरो खतनो नईं भोवरो ते अशुद्ध लोक कधी दाखल न भोल्हे।1 हे यरूशलेम एप्पु पुड़ेरां धूड़ बिछ़ोड़; हे सिय्योनेरी गुलाम कुइये2, अपने गलेरी रस्सी खोल्ली छ़ड।
किजोकि यहोवा एन ज़ोते, “तुसां ज़ैना मुफ्त बिकोरे थिये, एल्हेरेलेइ हुनी रुपेइये देइतां छुटाए भी गाले।3 प्रभु यहोवा एन ज़ोते; मेरी प्रजा पेइले त मिस्रे मां परदेशी भोइतां रानेरे लेई जेवरे थिये, ते बादे मां अश्शूरी लोकेईं भी बगैर कोन्ची वजा तैन पुड़ ज़ुलम कियो। एल्हेरेलेइ यहोवा एन ज़ोते कि हुनी अवं इड़ी कुन केरीं कि मेरे लोक बगैर वजा थसोड़े जेवरन? यहोवा एन भी ज़ोते कि ज़ैना तैन पुड़ हुकूमत केरतन तैना बेड़ी-बेड़ी गल्लां केरतन, ते मेरे नंव्वेरी निन्दा लगातार सारे दिहैड़ी भोती रहतीए।4 एस वजाई सेइं मेरी प्रजा मेरू नवं ज़ानेली; तैना तैस मौके ज़ानेले कि ज़ै गल्लां केरते तै यहोवा ही आहे, हेरा, अव्वें आईं।”
पहाड़न पुड़ तैन केरे पव केत्रे रोड़ेन ज़ैना खुशखबरी आनतन, ज़ैना शैन्तरी गल्लां शुनातन ते छुटकारेरो सन्देश देतन, ज़ै सिय्योने सेइं ज़ोते, “तेरो परमेशर राज़ केरते।”5 शुन, तेरे नगरेरे पहरदार उच्ची आवाज़ी मां ज़ोई राहोरेन, ते अकोट्ठे जयजयकार केरि राहोरेन; किजोकि तैना आमने सामने हेरने लगोरेन कि यहोवा सिय्योने जो वापस एज्जी राहोरोए। हे यरूशलेमेरी बेरान ठाराव, खुशी सेइं जयजयकार केरा; किजोकि यहोवा अपने लोकन तसल्ली दित्तोरीए, तैन्नी यरूशलेम नगर छुटेवरूए। यहोवा सैरी कौमां केरे सामने अपनि पवित्र शक्ति बांदी कियोरीए, ते धेरतरे कूने-कूने तगर लोक तैसेरो छुटकारो लाहेले।6
दूर भोथ, तैट्ठां निस्सी गाथ, कोन्ची अशुद्ध चीज़ी सेइं न हुरथ; तैस करां दूर भोथ; हे यहोवारू सामान छ़ूनेबाले याजक ते लेवी लोकव, अपनो आप पवित्र केरा।7 किजोकि तुसेईं लूशी नईं निसनू, ते न लूशी नश्शनू पेलू; किजोकि यहोवा तुसन अग्री-अग्री अगवाई केरतो च़लेलो, ते इस्राएलेरो परमेशर तुसन पत्पती भी हिफाज़त केरतो च़लेलो।
दुख झ़ैलतो परमेशरेरो दास
हेरा, मेरो दास अक्ली सेइं कम केरेलो, तै उच्चो, महान ते बड़ो महान भोइ गालो।8 ज़ेन्च़रे कि बड़े लोक तैस हेरतां हैरान भोइ जे (किजोकि तैसेरी शकल इड़ी तगर बिगड़ोरी थी कि मैन्हु केरि ज़ेरि न थी ते तैसेरी खूबसूरती भी मैन्हु केरि ज़ेरि न थी राहोरी),9 एन्च़रे तै बेड़ि कौमन पवित्र केरेलो, ते राज़े तैस हेरतां च़ुप राले; किजोकि तैना भी एरी गल लाहेले ज़ै तैनेईं शुनोरी न थी, ते एरी गल तैन समझ़ एज्जेली ज़ै तैनेईं अज़ तगर शुनोरी भी न थी।10
Source notes (10)
- Cross-reference प्रका. 21:2,10,27.
- Footnote सिय्योनेरी गुलाम कुइये यरूशलेम नगरेरे लोक
- Cross-reference भज. 44:12;1 पत. 1:18.
- Cross-reference यहे. 36:20-23;रोम. 2:24.
- Cross-reference प्रेरित. 10:36;रोम. 10:15;नहू. 1:15.
- Cross-reference भज. 98:3;लूक. 3:16;2:30-31.
- Cross-reference 2 कुरि. 6:17;प्रका. 18:4.
- Cross-reference यिर्म. 23:5.
- Cross-reference भज. 22:6-7;यशा. 53:2-3.
- Cross-reference रोम. 15:21;1 कुरि. 2:9.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.