Bhadrawahi Bible
इब्रानियों 13
मसीह ज़िन्दगी ज़ींनेरी हदैइत
एक्की होरि सेइं ढ्ला ते बेइनां केरो ज़ेरो प्यार केरते राथ। बखले लोकां केरि खातरदारी केरा, किजोकि एरू केरने सेइं किछेईं अनज़ाने मां स्वर्गदूतां केरि खातरदारी कियोरीए। कैदन याद रखा, मन्ना कि ज़ेन्च़रे तुस एप्पू भी तैन सेइं साथी कैद आथ, ते ज़ैन सेइं बुरो बर्ताव भोते तैन भी याद रखा, इन सेमझ़तां मन्ना कि ज़ेन्च़रे तुसन सेइं बुरो बर्ताव भोव। ड्लाह बनानो सेब्भी लोकन मां इज़्ज़तरी गल समझ़ी गाए, ते कुआन्श ते मड़द एक्की होरेरे लेई वफादार रान, किजोकि परमेशर बदमाशी केरने ते नाजाइज़ रिशते रखनेबालां केरो न्याय केरेलो। अपने आपे दौलतरे लालच़े करां दूर रखा, ते ज़ेत्रू तुसन कांए तैस्से मां राज़ी राथ, किजोकि परमेशरे एप्पू एन ज़ोवरूए, “अवं तीं करां कधे भी दूर न भोइलो, ते न कधे तीं शैरेलो।” एल्हेरेलेइ अस दिलेरी सेइं ज़ोई सकतम कि, “प्रभु मेरो मद्दत केरनेबालोए, अवं न डेरेलो इन्सान मेरू कुन बगैड़ी सकते?”
ज़ैना तुश्शे अगुवे थिये, तैन याद रखा, ज़ैनेईं तुसन परमेशरेरू वचन शुनावरू थियूं, इस गल्ली पुड़ ध्यान देथ, कि तैना केरही ज़िन्दगी गुज़ैरतां च़ले जे, ते ज़ेरो विश्वास तैन थियो तुस भी तैन केरो ज़ेरो विश्वास केरा। यीशु मसीह हीज ते अज़ बल्के हमेशारे लेई अक्कां ज़ेरोए। अलग-अलग किसमां केरि शिक्षाई सेइं न टेपलोथ, रोड़ू एन्ने कि तुश्शो दिल परमेशरेरे अनुग्रहे सेइं मज़बूत राए, न कि एरो परहेज़ेरे खाने सेइं, ज़ेसेरे खाने बालन कोई फैइदो न मैल्हो। इश्शी अक एरी बलिदान केरनेरी ठारे, तैस मरां तैन खानेरो कोई अधिकार नईं ज़ैना तेम्बु मां सेवा केरतन। किजोकि महायाजक ज़ैन जानबरां केरो खून मन्दरे मां परमपवित्र ठैरी मां पापेरे बलिदानेरे लेई नेतो थियो, तैन केरो बाकी जिसम ज़ैड़ी इस्राएली लोक रहते थिये तैट्ठां बेइर फुकते थिये। एल्हेरेलेइ, यीशुए भी लोक एप्पू अपने खूने सेइं पवित्र केरनेरे लेई यरूशलेम नगरे करां बेइर दुख झ़ैल्लो ते मरो। एल्हेरेलेइ, एज्जा अस भी यहूदी केरि रसमन शैरतां यीशु पुड़ विश्वास केरम ते तैसेरो ज़ेरो दुख ते निन्दा झ़ैल्लम। किजोकि ई दुनिया इश्शू हमेशारू घर नईं, पन अस एजने बाले घरेरे इंतज़ारे मां आम ज़ैन एजने बाले वक्ते मां इश्शू भोल्हु। एल्हेरेलेइ असां यीशुएरे ज़िरिये परमेशरेरे लेई तारीफ़रू बलिदान च़ाढ़म, यानी ज़ैखन अस अपने शब्दन सेइं इकरार केरतम कि यीशु इश्शो प्रभुए। पन भलियाई केरा ते ज़ैन ज़रूरते तैन केरि मद्दत केरा, किजोकि परमेशर एरे ज़ेरे बलिदान्न सेइं खुश भोते।
अपने अगुवां केरो हुक्म मन्ना, ते तैन केरे अधीन राथ, किजोकि तैन केरे ज़िमेदारी कि तैना प्राणा केरि रखवाली केरन, ते एस कम्मेरो तैनेईं परमेशरे हिसाब भी देने पेनोए। अगर तुस तैन केरो हुक्म मन्नेले त तैना अपनु कम खुशी सेइं केरेले त तुसन फैइदो भोल्हो, पन अगर तैस कम तकलीफ बुझ़ेले त तुसन कोई फैइदो न भोल्हो। इश्शे लेई प्राथना केरते राथ, असन याकीने इश्शो ज़मीर साफे, ते अस हर हिसाबे सेइं नेक नीती सेइं ज़िन्दगी गुज़ारनी चातम। अवं तुसन कां बिनती केरताईं कि मेरे लेई प्राथना केरा, कि अवं फिरी लूशी तुसन कां एज्जी सेखी।
हुनी शान्ति देनेबालो परमेशर, ज़ै भैड्डां केरो महान रखवालो मतलब प्रभु यीशु मसीहे, इश्शे प्रभु हमेशारे करारेरे खूने सेइं मुड़दन मरां ज़ींतो कियो, तुसन हर रोड़े कम्मे मां सिद्ध केरे, ज़ैस सेइं तुस तैसेरी मर्ज़ी पूरी केरथ, ते ज़ैन किछ परमेशरे पसंद एइते तैस यीशु मसीहेरे ज़िरिये असन मां केरे, ते मसीहेरी बडीयाई हमेशा-हमेशा भोती राए, आमीन।
हे ढ्लाव ते बेइनव, अवं तुसन कां बिनती केरताईं कि मेरी तुस तैना गल्लां सबरी सेइं शुना, ज़ैना मीं तुश्शे हिम्मत बद्धानेरे लेई लिखोरिन, किजोकि ई चिट्ठी ज़ै मीं तुसन लिखी बड़ी नईं। ताके तुसन पतो लग्गे कि इश्शो विश्वासी ढ्ला तीमुथियुस कैदेरां छुटोरोए, ते अगर तै जल्दी अव, त अस दूईये तुसन सेइं मिलमेले।
अपने सेब्भी विश्वासी लोकन ते सेब्भी पवित्र लोकन जो इश्शू नमस्कार ज़ोथ। इतालिया मुल्खेरे विश्वासी लोकेईं तुसन जो नमस्कार ज़ोवरूए।
तुसन सेब्भन पुड़ परमेशरेरो अनुग्रह भोतो राए, आमीन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.