Bhadrawahi Bible
इब्रानियों 12
बाजी परमेशरेरे ज़िरिये हदैइत
एल्हेरेलेइ ज़ैखन गवाहां केरे एत्रो बड्डो घाने असां घेरोरेम, त अस भी सैरी रुकावटां ते तैस पापे दूर केरम ज़ै असन उलझाते, ते तैस दौड़ी ज़ै असेईं दौड़नीए बल्हे सेइं दौड़म। एज्जा अस विश्वासे मां पवित्र केरनेबाले यीशु पुड़ नज़र रखम, ज़ैनी तैस आनन्देरे लेई ज़ै तैसेरे सामने थियो, बेइज़्ज़तरी परवाह न की, बल्के क्रूसेरो दुख झ़ैल्लो ते परमेशरेरे तखतेरे देइने पासे गेइतां बिश्शो।
तुस एस गल्ली पुड़ खियाल केरा, कि अपने खलाफत केरनेबाले ज़ैनी पैपी केरि तरफां केत्रो दुख झ़ैल्लो, ताके तुस बेदिल भोइतां हिम्मत न हारथ। तुसेईं पापे सेइं लड़ते-लड़ते हेजू तगर एत्रो मुकाबलो नईं कियोरो कि तुसेईं अपनो खून बगेवरो भोए। ते तुसेईं तैन समझ़ानू बिसरी छ़ड्डू, कि ज़ैस मां तुसन जो मट्ठां ज़ोवं,
“कि हे मेरे बच्चव परमेशरेरे हुक्मे एरे न समझ़ा।
ते ज़ैखन प्रभु तीं झ़िड़के त शारनेरे ज़ेरे मैसूस न केर।
किजोकि ज़ैस सेइं परमेशर प्यार केरते तैस झ़िड़ते भी,
ते ज़ैस तै अपनु मट्ठू बनाते तैस सोटेईं भी बाते।”
ऐह हदैइत तुश्शे समझ़नेरे लेइए, एस बल्हे सेइं बरदाशत केरा, परमेशर तुसन अपना मट्ठां सेमझ़तां बर्ताव केरते, किजोकि तैन कौन ज़ेरू मट्ठूए ज़ैस तैसेरो बाजी समझ़ाए नन्ना? पन अगर तुसन सुधारे न गाथ ज़ेसेरे हिस्सेदार सब भोतन त तुस न गैर औलाद भोनेथ न की अपना मट्ठां। एसेरे अलावा ज़ैखन इश्शे जिसमानी बाजी सुधारते रहते थिये ते अस तैन केरि इज़्ज़त केरते राए, त कुन आत्मां केरो बाजी यानी परमेशरेरी जादे इज़्ज़त न केरम ताके ज़ींते रहम। इश्शे जिसमानी बाजी त थोड़े दिहाड़ां केरे लेई एपनी समझ़रे मुताबिक असन सुधारते रहते थिये, पन परमेशर इश्शे फैइदेरे लेई असन सुधारते ताके असां तैसेरी पवित्रतैई मां शामल भोम। एसमां शक नईं कि ज़ैखन केन्ची हदैइत की गाचे त तै खुशी नईं, बल्के बड़ू बुरू बुझ़ते, पन ज़ैखन तै बले-बले पक्को भोइ गाते त तैस बादे मां धर्मी बेनतां चैनरो फल मैलते।
शिक्षा ते हदैइत
बस्सा एपनी कमज़ोर पैखड़न ते कमज़ोर ज़ैन्धु मज़बूत केरा। ते अपने पव्वन सिद्धी बत्तां च़लाथ ताके टोन्टे टेपलोए न ते तैना बेझ़ोन।
सेब्भन सेइं मेल मिलापे सेइं राथ, ते तै पवित्रताई हासिल केरनेरी हर वक्त कोशिश केरा ज़ेसेरे बगैर कोई प्रभु न लेई सके। खबरदार एरू न भोए कि कोई मैन्हु परमेशरेरे अनुग्रहे करां रेइ गाए, एरू न भोए कि कोई ट्लिठू ज़ील लग्गे ते तुसन परेशान केरे ते होरे लोक भी भिटे भोइ गान। ते न कोई मैन्हु तुसन मां बदमाशी केरनेबालो भोए, या एसावेरो ज़ेरो अधर्मी न बने, ज़ैनी एक्की बार रोट्टी खानेरे लेई अपने बड्डे भोनेरू हक बेच़तां छ़डू। किजोकि तुस ज़ानतथ कि बादे मां ज़ैखन तैनी तै बरकत हासिल केरनेरी कोशिश की, त तैस न मैल्ही, तैस अपनि नियत बदलनेरो मौको न मैल्हो हालांकी तै लेरां देइ-देइ तैस तोपनेरी कोशिश केरतो राव।
तुस तैस पहाड़े कां नेड़े नईं एवरे, ज़ैस सेइं तुस हुरी सकते थिये, तैन पहाड़ अग्गी सेइं फुकोतू थियूं ते अंधगुबारी ते बड़ो तूफान थियो। तैड़ी नरशिंगेरी शोर ते शुनाने बालेरी एरी आवाज़ शुनोती थी, कि ज़ैखन लोकेईं तै आवाज़ शुनी त मिन्नत केरने लगे, कि असन सेइं होरि गल्लां न केर। एल्हेरेलेइ कि तैनेईं तै हुक्म बरदाशत न केरि बटो, “अगर कोई जानबर भी एस पहाड़े सेइं हुरेलो त तै घोड़ेईं बैइतां मारो गालो।” तै नज़ारो एत्रो खतरनाक थियो कि मूसे ज़ोवं, “अवं डरने ते थरकने लगोरोईं।”
बल्के तुस सिय्योनेरे पहाड़े ते ज़ींते परमेशरेरे नगर यानी सुर्गेरे यरूशलेमे मां लखेइं स्वर्गदूतन कां खुशी मनाने एवरेथ। ते तुस परमेशरेरे ज़ेठे बच्चां केरि सभाई मां ते कलीसियाई मां एवरेथ, एना तैना लोकन ज़ैन केरां नव्वां सुर्गे मां लिखोरेन, तुस न्याय केरनेबाले परमेशरे कां एवरेथ, ते धेर्मी केरि आत्मान कां एवरेथ, यानी तैन कां ज़ैना सिद्ध कियोरेन। तुस नंव्वे करारेरे बिचवाई केरनेबाले यीशु ते तैसेरे छ़िड़कोरे खूने कां एवरेथ, ज़ै हाबिलेरे खूने करां रोड़ी गल्लां ज़ोते।
खबरदार राथ, तुस परमेशरेरो ज़ै तुसन सेइं गल्लां केरते तैसेरो इन्कार न केरथ, किजोकि ज़ैनेईं ज़मीनी पुड़ हदैइत केरनेबालेरो इन्कार कियो त तैना न बंच़े, त अगर अस सुर्गे हदैइत केरनेबालेरो इन्कार केरमेले त केन्च़रे बच़मेले? तैखन तैसेरी आवाज़ी सेइं धरती हिल्ली जेई पन तैनी ई वाधो कियोरोए कि, “एक्की फेरे फिरी अवं सिर्फ ज़मीन नईं बल्के अम्बरे भी हिलेइलो।” तैसेरू “एक्की फेरे फिरी” ज़ोने सेइं साफ पतो लगते की पैदा कियोरी चीज़ां ज़ैना हिलचन तैना खतम भोनिन ताके ज़ैना हिलन नन्ना तैना रैनिन। ज़ैड़ी असन तैन राज़ मैल्हने लगोरूए ज़ैन हिलनेरू नईं त एज्जा अस तैसेरू शुक्र केरम ते हिम्मत केरम कि, अस परमेशरेरी आराधना परमेशरेरे डरे सेइं केरि बटम ज़ैस सेइं तै खुश भोए। किजोकि इश्शो परमेशर भस्म केरनेबैली अग्गरो ज़ेरोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.