Bhadrawahi Bible
उत्पत्ति 9
नूह ते तैसेरे मट्ठन आशिर्वाद
फिरी परमेशरे नूह ते तैसेरे मट्ठन बरकत दित्ती ते तैन सेइं ज़ोवं, “फुला-फल्ला ते बधा ते धेरती मां भेरोई गाथ। तुश्शो डर ते खोफ धेरतरे सब जानबरन, ते अम्बरेरे सब च़ुड़ोलन, ते धेरती पुड़ सब पेटेरे भारे च़लनेबाले जीपन, ते समुन्दरेरी सब मेछ़लन पुड़ बनोरो रालो तैना सब तुश्शे कैबू मां किये गातन। सब च़लनेबाले जीप तुश्शे खाने लेई भोल्हे; ज़ेन्च़रे तुसन नीले-नीले निक्के बुट दित्तोरे थिये, तेन्च़रे तुसन सब किछ देताईं। पन तुस मासे प्राणे सने मतलब खूने सने न खेइयथ। ते पक्को अवं तुश्शो खूनेरो मतलब प्राणेरो बदलो घिन्नेलो: सब जानबरन, ते इन्सानन, दूईयन करां अवं बदलो घिन्नेलो। इन्सानेरे प्राणेरो बदलो अवं एक्की-एक्की मैन्हु करां घिन्नेलो। ज़ै कोई इन्सानेरे खून केरेलो तैसेरो खून मैन्हु करां कराव गालो, किजोकि परमेशरे मैन्हु अपने रूपे मां बनेवरोए। ते तुस त फुला-फल्ला ते बधा ते धेरती पुड़ बड़े बच्चे पैदा केरतां तैस मां भेरोई गाथ।”
परमेशरेरो नूहे सेइं करार केरनो
फिरी परमेशरे नूह ते तैसेरे मट्ठन सेइं ज़ोवं, “शुना, अवं तुसन सेइं ते तुश्शे बाद ज़ै तुश्शी खानदानी भोल्ही, तैस सेइं भी करार केरताईं; ते सब ज़ींते प्रैणन सेइं भी ज़ैना तुसन सेइं साथी आन, कुन च़ुड़ोलू कुन पैलतू जानबर, कुन धेरतरे सब जंगली जानबर, धेरतरे ज़ेत्रे भी जीप जन्तू ज़िहाज़े मरां निसोरेन। ते अवं तुसन सेइं अपनो ई करार केरताईं कि सब प्राणी फिरी पैनेरी हड़ैई सेइं नाश न भोल्हे, ते धेरतरो नाश केरनेरे लेई फिरी पैनेरी हड़ाई न एज्जेली।” फिरी परमेशरे ज़ोवं, “ज़ै करार अवं तुसन सेइं, ते ज़ेत्रे ज़ींते प्राणी तुसन सेइं साथीन तैन सेब्भन सेइं जुगां-जुगां केरे पीढ़ी-पीढ़ी केरे लेई केरताईं; तैसेरो ई निशान भोल्हो: कि मीं बिदलारी मां अपनि बुन्ज़ल लट्ठ रख्खोरीए, तै मेरे ते धेरतरे दरमियान करारेरो निशान भोल्हो। ते ज़ैखन अवं धेरती पुड़ बिदलार फैलेईं तैखन बिदलारी मां बुन्ज़ल लट्ठ लेइहोली। तैखन मेरो ज़ै करार, तुश्शे ते सब ज़ींते जिसमे बाले जीप जन्तून सेइं कियोरोए; तैस अवं याद केरेलो, तैखन एरी पैनेरी हड़ाई फिरी न एज्जेली ज़ैस सेइं सब प्रैणी केरो नाश भोए। बिदलारी मां ज़ै बुन्ज़ल लट्ठ भोल्ही अवं तैस हेरतां ई हमेशारो करार याद केरेलो, ज़ै परमेशरे धेरती पुड़ सब ज़ींते जिसमे बाले प्रैणन सेइं कियोरोए।” फिरी परमेशरे नूहे सेइं ज़ोवं, “ज़ै करार मीं सारे धेरतरे सब प्रैणन सेइं कियोरोए तैसेरो निशान ईए।”
नूह ते तैसेरां मट्ठां
नूहेरां ज़ैना मट्ठां ज़िहाज़े मरां निस्सां, तैना शेम, हाम ते येपेत थियां; ते हाम कनानेरो बाजी थियो। नूहेरां ट्लाई मट्ठां इना आन, ते इन केरू खानदान सारे धेरती पुड़ फैली जेवं।
नूह ज़मीनदारी केरने लग्गो: ते तैने दाछ़री बाग लाई। एक्सां तै दाछ़रो रस पीतां मसत भोव; ते अपने तेम्बु मां अन्तर नग्गो भोइ जेव। तैखन कनानेरे बाजी हामे, अपनो बाजी नग्गो लाव ते बेइर एइतां अपने दूईये ढ्लान सेइं ज़ोवं। तैखन शेम ते येपेत दूइयेईं कपड़ो नेइतां अपने कंधन पुड़ रेखतां ते पेत्रीं पासेरां उलटे च़ेलतां अपने बाजेरे नग्गे जानी पुड़ पड़दो छ़डो ते तैना अपनु तुत्तर पत्रोवं केरतां थिये, पन, तैनेईं अपनो बाजी नग्गो न लाव। ज़ैखन नूहे नश्शो उतरी जेव, तैखन तैस पतो लग्गो कि तैसेरे निकड़े मट्ठे तैस सेइं कुन कियोरूए।
एल्हेरेलेइ तैने ज़ोवं,
“कनान लानती भोए:
तै अपने लोकां केरे गुलामां केरो गुलाम भोए।”
फिरी तैने ज़ोवं,
“शेमेरो परमेशर यहोवा धने,
ते कनान शेमेरो गुलाम भोए।
परमेशर येपेतेरे खानदाने फैलाए;
ते तै शेमेरे डेरन मां बस्से,
ते कनान तैसेरो गुलाम भोए।”
पैनेरी हड़ैयरां बाद नूह 350 साल ज़ींतो राव। एन्च़रां नूहेरी सारी उमर 950 साल भोइ; तैल्ला पत्ती तै मेरि जेव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.