Bhadrawahi Bible
उत्पत्ति 10
नूहेरी खानदानी
नूहेरां मट्ठां शेम, हाम ते येपेत थियां; तैन केरां मट्ठां पैनेरी हड़ेइयरे बाद पैदा भोआं: तैन केरि खानदानी ई आहे।
येपेतेरु खानदान
येपेतेरां मट्ठां1: गोमेर, मागोग, मादै, यावान, तूबल, मेशेक ते तीरास भोआं। ते गोमेरेरां मट्ठां2: अश्कनज, रीपत ते तोगर्मा भोआं। ते यावानेरे खानदाने मां एलीशा ते तर्शीश, ते कित्ती, ते दोदानी लोक भोए। इन केरे खानदान गैर कौमां केरे जज़ीरां केरे मुल्खन मां एन्च़रां बेन्टोई जे कि तैना अलग-अलग भाषान, कुलन, ते कौमां केरे मुताबिक अलग-अलग भोइ जे।
हामेरू खानदान
फिरी हामेरां मट्ठां: कूश, मिस्र, पूत ते कनान भोआं। ते कूशेरां मट्ठां सबा, हवीला, सबता, रामाह, ते सब्तका भोआं। ते रामाहेरां मट्ठां शेबा ते ददान भोआं। कूशेरे खानदाने मरां निम्रोद भी भोव; धेरती पुड़ पेइलो बहादर तैए भोव। तैए यहोवारी नज़री मां ताकतबर शिकार खैड्डने बालो भोव, इस सेइं इन ऊपाम च़लू, “निम्रोदेरो ज़ेरो यहोवारे नज़री मां ताकतबर शिकार खैड्डने बालो।” शिनार मुल्खे मरां बाबेल, एरेख, अक्कद, ते कलने मरां तैसेरी रियासतां केरि शुरुआत भोइ। तैस मुल्खे मरां तै निस्तां अश्शूर मुल्खे जो जेव, ते नीनवे, रहोबोतीर ते कालह जो, ते नीनवे ते कालह नगरां केरे मझ़ाटे ज़ै रेसेने मांए, तैन भी बसावं; बड्डू नगर इन्ने आहे। मिस्रेरे खानदाने मां लूदी, अनामी, लहाबी, नप्तूही, ते पत्रूसी, कसलूही, ते कप्तोरी लोक भोए, कसलूही लोकन मरां त पलिश्ती लोक निस्से।
कनानेरे खानदाने मरां तैसेरू बड्डू मट्ठू सीदोन, फिरी हित्त, यबूसी, एमोरी, गिर्गाशी, हिब्बी, अर्की, सीनी, अर्वदी, समारी, ते हमाती लोक भी भोए; फिरी कनानी लोकां केरू सारू खानदान भी फैली जेवं। ते कनानी लोकां केरि सरहद सीदोन नगरे करां लेइतां गरार सूबेरी बत्ती करां लेइतां गाज़ा सूबे तगर ते फिरी सदोम ते गमोरा ते अदमा ते सबोयीम नगरेरी बत्ती करां लेइतां लाशा सूबे तगर भोइ। हामेरे खानदाने मरां इन्ना भोए; ते इना अलग-अलग कुलन, भाषान, मुल्खन, ते कौमां केरे मुताबिक अलग-अलग भोए।
शेमेरी खानदानी
फिरी शेम, ज़ै येपेतो बड्डो ढ्ला थियो, ज़ै सेब्भी एबेरेरे खानदानेरे लोकां केरो पूर्वज भोव, तैसेरां भी मट्ठां पैदा भोआं। शेमेरां मट्ठा: एलाम, अश्शूर, अर्पक्षद, लूद ते अराम भोआं। अरामेरां मट्ठा: ऊस, हूल, गेतेर ते मश भोआं। ते अर्पक्षदेरो शेलह, ते शेलहेरो एबेर पैदा भोव। ते एबेरां दूई मट्ठां भोआं, एक्केरू नवं पेलेग इस वजाई रख्खू जेवं कि तैसेरे दिहाड़न मां धरती बेन्टोई जेई, ते तैसेरे ढ्लाएरू नवं योक्तान थियूं। ते योक्तानेरो अल्मोदाद, शेलेप, हसर्मावेत, येरह, हदोराम, ऊजाल, दिक्ला, ओबाल, अबीमाएल, शेबा, ओपीर, हवीला, ते योबाब पैदा भोए: इन्ना सब योक्तानेरां मट्ठां भोआं। इन केरि रानेरी ठार मेशा सूबे करां लेइतां सपारा सूबे तगरे, ज़ेसेरे पूर्वे मां अक पहाड़ी सूबोए। शेमेरे मट्ठा इन्ना भोआं; ते इना अलग-अलग कुलन, भाषान, मुल्खन ते कौमां केरे मुताबिक अलग-अलग भोइ जेआं।
नूहेरे मट्ठां केरां टब्बरां इन्ना आन: ते तैन केरे कौमां केरे मुताबिक तैन केरि खानदानी ईए आहे; ते पैनेरी हड़ैइयरे बाद सैरी धेरतरी कौमां इन्ने मरां फैली जेई।
Source notes (2)
- Footnote येपेतेरां मट्ठां येपेतेरां मट्ठां केरां नंव्वां भी कौमां ते राष्ट्रां केरे रूपे झुण्डन मां पिशाने गाले।
- Footnote मट्ठां वंशज
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.