Bhadrawahi Bible
उत्पत्ति 11
भाषान मां गड़बड़ी
तैस वक्ते सैरी दुनियाई मां अक्‍के भाषा, ते अक्‍के बोली थी। तैस वक्ते लोकन पूर्वेरे पासे च़लते-च़लते शिनार मुल्खे मां अक मैइदान मैल्हू ते तैना तैस मां बेस्सी जे। तैखन तैना एप्पु मांमेइं ज़ोने लग्गे, “एज्जा, अस इट्टां बनेई-बनेई रोड़े-च़ारे अग्गी मां पकाम।” ते तैनेईं घोड़ां केरि ठैरी इट्टन सेइं, ते मित्तरे गारारे ठैरी चुन्ने सेइं कम कियूं। फिरी तैनेईं ज़ोवं, “एज्जा, अस अक नगर ते अक मीनार बनाम, ज़ेसेरी ऊँचाई अम्बरे तगर पुज़्ज़े, एन्च़रां सेइं अस अपनु नवं महान केरम, एरू न भोए कि असन सैरी धरती पुड़ फैलनू पे।” ज़ैखन लोक नगर ते गुम्मट बनाने लगे; तैखन तैन हेरनेरे लेई यहोवा अव। ते यहोवा ज़ोवं, “अवं कुन हेरताईं, कि सब अक भोरेन, ते भाषा भी तैन सेब्भी केरि अक्‍के आहे, ते तैनेईं एरू कम भी शुरू कियूं; ते हुन्ना ज़ैन किछ तैना केरनेरी कोशिश केरेले, तैस मां किछ भी तैन केरे लेई नामुमकिन न भोल्हु। एल्हेरेलेइ एज्जा, अस ओस्तां तैन केरि भाषाई मां बड़ी गड़बड़ी छ़डम, कि तैना एक्‍की होरेरी बोली न सेमझ़ी सकन।” एल्हेरेलेइ यहोवाए तैना तैस ठैरारां सैरी धरती पुड़ फैलाए; ते तैनेईं तैन नगर बनानू बन्द कियूं। इस वजाई सेइं तैस नगरेरू नवं बाबेल भोवं; किजोकि सैरी धेरतरी पुड़ भाषाई मां ज़ै गड़बड़ी आहे, तै यहोवा तैड़ी छ़डी, ते तैट्ठां यहोवा मैन्हु सारी धेरती पुड़ फैलाए।
शेमे करां तेरह तगर खानदानी
शेमेरी खानदानी ई आहे। पैनेरे हड़ेइयरे दूई सालना बाद ज़ैखन शेमेरी उमर 100 साल भोइ, तैखन तैस सेइं अर्पक्षद पैदा भोव। ते अर्पक्षदेरे ज़रमनेरां पत्ती शेम 500 साल ज़ींतो राव; ते तैसेरां होरां भी मट्ठां कुइयां पैदा भोआं।
ज़ैखन अर्पक्षद 35 सालां केरो भोव, तैखन तैसेरो शेलह पैदा भोव। ते शेलहेरे ज़रमनेरां पत्ती अर्पक्षद 403 साल होरे ज़ींतो राव, ते तैसेरां होरां भी मट्ठां कुइयां पैदा भोआं।
ज़ैखन शेलह 30 सालां केरो भोव, तैखन तैसेरे ज़िरिये एबेरेरू ज़र्म भोवं। ते एबेरेरे ज़रमनेरां पत्ती शेलह 403 साल होरो ज़ींतो राव, ते तैसेरां होरां भी मट्ठां कुइयां पैदा भोआं।
ज़ैखन एबेर 34 सालां केरो भोव, तैखन तैसेरे ज़िरिये पेलेगेरू ज़र्म भोवं। ते पेलेगेरे ज़रमनेरां पत्ती एबेर 403 साल होरो भी ज़ींतो राव, ते तैसेरां होरां भी मट्ठां कुइयां पैदा भोआं।
ज़ैखन पेलेग 30 सालां केरो भोव, तैखन तैसेरे ज़िरिये रू एरू ज़र्म भोव। ते रूएरे ज़रमनेरां पत्ती पेलेग 209 साल होरो भी ज़ींतो राव, ते तैसेरां होरां भी मट्ठां कुइयां पैदा भोआं।
ज़ैखन रू 32 सालां केरो भोव, तैखन तैसेरे ज़िरिये सरूगेरू ज़र्म भोवं। ते सरूगेरे ज़रमनेरां पत्ती रू 207 साल होरो भी ज़ींतो राव, ते तैसेरां होरां भी मट्ठां कुइयां पैदा भोआं।
ज़ैखन सरूग 30 सालां केरो भोव, तैखन तैसेरे ज़िरिये नाहोर पैदा भोव। ते नाहोरेरे ज़रमनेरां पत्ती सरूग 200 साल होरो भी ज़ींतो राव, ते तैसेरां होरां भी मट्ठां कुइयां पैदा भोआं।
ज़ैखन नाहोर 29 सालां केरो भोव, तैखन तैसेरे ज़िरिये तेरहेरू ज़र्म भोवं; ते तेरहेरे ज़रमनेरां पत्ती नाहोर 119 साल होरो भी ज़ींतो राव, ते तैसेरां होरां भी मट्ठां कुइयां पैदा भोआं।
ज़ेइस तगर तेरह 70 सालां केरो भोव, तेइस तगर तैसेरे ज़िरिये अब्राम, ते नाहोर, ते हारान पैदा भोए।
तेरहेरी खानदानी
तेरहेरी खानदानी ई आहे: तेरहेरे ज़िरिये अब्राम, ते नाहोर, ते हारानेरू ज़र्म भोवं; ते हारानेरे ज़िरिये लूतेरू ज़र्म भोवं। ते हारान ज़ेइस तैसेरो बाजी तेरह ज़ींतो थियो, कसदी लोकां केरे ऊर नंव्वेरे नगरे मां मेरि जेव, ज़ै तैन केरि ज़र्म ठार थी। अब्राम ते नाहोर दूइयेईं ड्लाह बनाव। अब्रामेरे कौन्शरू नवं सारै, ते नाहोरेरे कौन्शरू नवं मिल्का थियूं। ई तैस हारानेरी कुई थी, ज़ै मिल्का ते यिस्का दूइयेईं केरो बाजी थियो। सारै त बेऔलाद थी; तैस बच्‍चे न भोए।
ते तेरह अपनु मट्ठू अब्राम, ते अपनु पोट्लड़ू लूत, ज़ैन हारानेरू मट्ठू थियूं, ते अपनि नुश सारै, ज़ै तैसेरे मट्ठे अब्रामेरि कौन्श थी, इन सेब्भन नेइतां कसदी लोकां केरे ऊर नगरे मरां निस्तां कनान मुल्खे जो च़लो; पन हारान नंव्वेरे नगरे मां पुज़तां तैड़ी राने लगो। ज़ैखन तेरह 205 सालां केरो भोव, तैखन तै हारान नगरे मां मेरि जेव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.