Bhadrawahi Bible
उत्पत्ति 50
याकूबेरी मौत
तैखन यूसुफ अपने बाजी सेइं पलेटोइतां लेरां लगो देने, ते तैस फुम्मड़ी दित्ती। फिरी यूसुफे अपने हकीमन हुक्म दित्तो, कि तैना तैसेरे बाजी केरि लाश हिफाज़ती सेइं रखनेरे लेई तैस मां खुशबूदार चीज़ां भेरि देन, तैखन हकीमेईं इस्राएलेरे लाशी मां भेरि। ज़ैस मां पूरे 40 दिहाड़े लग्गे, किजोकि लाश हिफाज़ती सेइं रखनेरे लेई एत्रो वक्त लगते, ते मिस्री लोकेईं 70 दिहाड़न तगर तैसेरेलेइ मातम कियो।
ज़ैखन तैसेरे मातमेरे दिहाड़े बीती जे, तैखन यूसुफ फ़िरौनेरे घरानेरे लोकन सेइं ज़ोने लगो, “अगर तुश्शी सिद्धी नज़र मीं पुड़ भोए त मेरी ई बिनती फ़िरौने तगर पुज़ाथ। मेरे बाजे इन ज़ोइतां, मीं ई कसम दित्ती, ‘हेर अवं मरनेबालोईं, ज़ै कब्र मीं अपने लेई कनान मुल्खे मां घड़ोरीए तैस्से मां तू मीं मित्ती देइयां।’ एल्हेरेलेइ हुनी मीं तैड़ी गेइतां अपने बाजी मित्ती देनेरो हुक्म दे, तैल्ला पत्ती अवं वापस एज्जेलो।” तैखन फ़िरौने ज़ोवं, “गेइतां अपने बाजी केरि दित्तोरी कसमरे मुताबिक तैस मित्ती दे।”
एल्हेरेलेइ यूसुफ अपने बाजी मित्ती देनेरे लेई च़लो जेव, ते फ़िरौनेरे सब नौकर, मतलब तैसेरे भवनेरे बुज़ुर्ग ते मिस्र मुल्खेरे सब बुज़ुर्ग लोक तैस सेइं साथी च़ले। ते यूसुफेरे घरेरे सब लोक, ते तैसेरे ढ्ला, ते तैसेरे बाजी केरे घरेरे सब लोक भी साथी जे; पन तैनेईं अपने बाल-बच्चन, ते भैड्डां-छ़ेल्ली, ते बेछ़ी दांत गोशेन मुल्खे मां रख्खे। ते तैस सेइं साथी रथ ते सुवार जे, एन्च़रां भीड़ बड़ी भारी भोइजेइ। ज़ैखन तैना आतादेरे खलाड़ी तगर, ज़ै यरदन दरियारे पारे पुज़्ज़े, तैखन तैड़ी बड़े ज़ोरेरी आवाज़ी सेइं तैनेईं मातम कियो, ते यूसुफे अपने बाजी केरे लेई सत दिहाड़न तगर मातम कराव। ज़ैखन तैट्ठेरे कनानी लोकेईं आतादेरे खलाड़ी मां मातम केरते लाहे त, तैना ज़ोने लगे, कि मिस्री लोकां केरो मातम बड़े दुखे सेइं भरोरोए, एल्हेरेलेइ यरदनेरे नेड़ेरी तैस ठारारू नवं अज़ भी आबेलमिस्रैम1 ज़ोवं गाते।
याकूबेरी लाश मकपेला मां दबनी
इस्राएलेरे मट्ठेईं ठीक तैन्ने कम कियूं ज़ैन तैन केरे बाजी तैन केरनेरो हुक्म दित्तोरो थियो। तै तैनेईं कनान मुल्खे मां नियो, ते तैस मम्रेरे नेड़े मकपेलारे तैस उडारेरी तैस कुढी मां मित्ती दित्ती, ज़ैन अब्राहमे हित्ती एप्रोने करां कब्रसतानेरी ठार अपनि ज़मीन भोनेरे लेई घिन्नोरू थियूं।
अपने बाजी मित्ती देइतां यूसुफे अपने ढ्लान ते तैन सेब्भन, ज़ैना तैसेरे बाजी मित्ती देनेरे लेई तैस सेइं साथी एवरे थिये, मिस्रे जो वापस जे।
ढ्लान तसल्ली देनी
ज़ैखन यूसुफेरे ढ्लाएईं हेरू कि इश्शो बाजी मेरि जेवरोए, तैखन ज़ोने लगे, “अगर यूसुफ हुन्ना इश्शो पीछो केरे, ते ज़ेत्री बुराई असेईं तैस सेइं कियोरी थी, सेब्भी केरो बदलो असन करां ने, त इश्शू कुन भोल्हु।” एल्हेरेलेइ तैनेईं यूसुफे कांजो ई समाद भेज़ो, “तेरे बाजे मरने करां पेइले असन ई हुक्म दित्तोरो थियो, ‘तुस लोक यूसुफे सेइं एन्च़रे सेइं ज़ोइयथ, कि असां बिनती केरतम, कि तू अपने ढ्लां केरो पाप माफ़ केरां; असेईं तीं सेइं बुराई कियोरी थी, पन हुन्ना, अपने बाजी केरे परमेशरेरे नौकरां केरो पाप माफ़ केर तैन केरि एना गल्लां शुन्तां यूसुफ लेरां लगो देने।’” तैखन तैसेरे ढ्ला भी तैसेरे सामने ज़ैंधू तल्ले लेइतां मथ्थो टेकतां ज़ोने लगे, “हेर असां त तेरे नौकरम।” यूसुफे तैन सेइं ज़ोवं, “डरा नन्ना, कुन अवं परमेशरेरी ठारी पुड़ आईं? हांलाकि तुसेईं मेरे लेई बुराई केरनेरो खियाल कियोरो थियो। पन परमेशरे तैस्से गल्ली मां भलियाई केरनेरो खियाल कियो, ताके बड़े लोकां केरि जानां बेंच़ी गान, ज़ेन्च़रे तुस अज़ भी लहंने लगोरेथ। एल्हेरेलेइ हुनी डरा नन्ना: अवं तुश्शो ते तुश्शे बाल-बच्चां केरि हेरगेश केरतो रेइलो।” एन्च़रां सेइं तैनी तैन समझ़ेइतां हिम्मत दित्ती।
यूसुफेरी मौत
यूसुफ अपने बाजी केरे घराने समेत मिस्र मुल्खे मां रहतो थियो, ते यूसुफ 110 साल ज़ींतो राव। ते यूसुफे एप्रैमेरी ट्लेइयोवं पीढ़ी भी लाही, ते मनश्शेरां पोट्लड़े, ज़ैन माकीरेरां मट्ठां थियां, तैना पैदा भोआं ते यूसुफे तैना कुम्मे मां रखां। यूसुफे अपने ढ्लान सेइं ज़ोवं, “अवं त मरनेबालोईं; पन परमेशर सच़्च़े तुश्शी मद्दत केरेलो, ते तुसन इस मुल्खे मरां केढतां तैस मुल्खे मां पुज़ालो, ज़ै मुल्ख देनेरो तैनी अब्राहम, इसहाक ते याकूब सेइं वाधो कियोरो थियो।” फिरी यूसुफे इस्राएली लोकन सेइं कसम केरतां ज़ोवं कि, “परमेशर सच़्च़े तुश्शी मद्दत केरेलो, ते तैखन गांते बार तुस ज़रूर मेरी हेड्डी इट्ठां तैस मुल्खे मांजो नेइयथ।” एन्च़रां यूसुफ 110 सालां केरो भोइतां मेरि जेव: ते तैनेईं तैसेरे लाशी मां खुशबूदार चीज़ां भेरि, ते तैसेरी लाश मिस्रे मां एक्की तबूते मां रख्खी।
Source notes (1)
- Footnote आबेलमिस्रैम मतलब मिस्री केरि लेरां।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.