Bhadrawahi Bible
निर्गमन 1
मिस्र मुल्खे मां इस्राएली लोकन पुड़ ज़ुलम
इस्राएलेरां मट्ठां इनां आन, ज़ैना याकूबे सेइं साथी अपने टब्बरन समेत मिस्र मुल्खे मां एवरां थियां। रूबेन, शिमोन, लेवी, यहूदा, इस्साकार, जबूलून, बिन्यामीन, दान, नप्ताली, गाद ते आशेर। तैना सब मैन्हु ज़ैना याकूबेरे घराने मां पैदा भोवरे थिये 70 थिये, यूसुफ त मिस्र मुल्खे मां पेइलो एवरो थियो। यूसुफ ते तैसेरे सब ढ्ला ते तैसेरे पीढ़रे सब लोक मेरि जेवरे थिये। ते इस्राएलेरी औलाद फली-फुली; ते तैना बड़े ताकतबर भोइ जे; ते तैन केरि तैदाद बड़ी भोइ जेई ते सारो मुल्ख तैन सेइं भेरोई जेव।
मिस्र मुल्खे मां बड़े सालां केरे बाद अक नंव्वों राज़ो राज़ केरने लगो ज़ै यूसुफे न थियो ज़ानतो। ते तैनी अपने मिस्रेरे लोकन सेइं ज़ोवं, “इस्राएली लोक गिनती मां जादे ते असन करां ताकतबर भोइ जेवरेन। एल्हेरेलेइ एज्जा अस तैन सेइं अक्ली सेइं बर्ताव केरम, कोन्च एरू न भोए कि तैना हछे बेद्धी गान, ते अगर जंग शुरू भोइ गाए ते तैना इश्शे दुश्मन्न सेइं मिलतां असन सेइं लड़न ते इस मुल्खे मरां निस्सी गान।” एल्हेरेलेइ मिस्री लोकेईं तैन पुड़ निगरानी केरनेबाले रख्खे, ताके तैन करां जादे कम करेइतां तैन स्तान, एन्च़रे सेइं तैनेईं फ़िरौनेरे लेई पितोम ते रामसेस गोदामेरां नगरां बनां। पन ज़ेत्रे मिस्री लोक तैन्न सताने लगे, तेत्रे जादे तैना बद्धते ते फैलते जे, एल्हेरेलेइ तैना लोक इस्राएली लोकन करां बड़े डेरि जे। फिरी भी मिस्री लोक इस्राएलन करां बड़े सेखती सेइं कम कराने लग्गे; ते तैनेईं तैन करां सखत मेहनती सेइं गारो ते इट्टां बनावेइतां ते उडारन मां हर किसमेरू कम कमेवेइतां तैन दुख दित्तो, ज़ैना कम्मां तैना तैन करां कमावाते थिये, तैना सेखती सेइं करावाते थिये।
शिप्रा ते पूआ दूई इब्रानी घैई थी तैन्न मिस्रेरे राज़े हुक्म दित्तो, “ज़ैखन तुस इब्रानी कौन्शां केरे बच्चे ज़र्माथ ते तैन घोड़न पुड़ बच्चे ज़ांनेरे लेई बिशोरी लहथ ते अगर मट्ठू भोए त तैस मैरी छ़ेडथ, अगर कुई भोए त तैस ज़ींती रेखथ।” पन तैना घैई परमेशरे करां डेरती थी, ते तैनेईं मिस्रेरे राज़ेरो हुक्म न मन्नो, ते मट्ठां ज़ींतां छ़ेडती थी। तैखन मिस्रेरे राज़े तैना घैई कुजेइतां तैन्न पुछ़ू, “तुस मट्ठन ज़ींतां किजो रखने लेवरिथ?” घैईएइं फ़िरौने जुवाब दित्तो, “इब्रि कौन्शां मिस्री कौन्शां केरि ज़ेरि नईं, तैना एत्री तेकड़ी भोइचन कि घैई केरे पुज़ने करां पेइले गल्हे बिश्शी गैतिन।” त परमेशरे घैई केरू भलू कियूं, ते तैना लोक बद्धते ते बड़े ताकतबर भोइ जेई। एल्हेरेलेइ कि घैई परमेशरे करां डेरती थी तैनी तैन केरां घरां बस्सां। ते फ़िरौने एपनी कौमरे सेब्भी लोकन हुक्म दित्तो, “इब्रि1 केरां ज़ेत्रां मट्ठां पैदा भोन, तैन तुस नील दरियाए मां छ़ेडी देइयथ, ज़ै कुई भोए तैस ज़ींती रेखतथ।”
Source notes (1)
- Footnote इब्रि किछ हस्तलेखन मां इब्रि नईं
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.