Bhadrawahi Bible
निर्गमन 2
मूसेरू ज़र्म
फिरी एरू भोवं कि, लेवी केरे गोट्लेरे एक्की मड़दे गेइतां अपने गोट्लेरे एक्की कौन्शी सेइं ड्लाह बनाव। तै कौन्श दोज़ींती भोइ ते तैसां मट्ठू ज़ांव, तैसां एन हेरू कि बच्चो बड़ो रोड़ोए तैसां ट्लाई महीने छ़ुपेइतां रख्खो। पन ज़ैखन तैसां तैन मट्ठू जादे छ़ुपेई न बटु त तैसां निरैठी केरि अक टोकरी बनाई ते तै गारे सेइं राल रिम केरतां मट्ठे तैस मां रेखतां दरियारे बन्ने झ़ैल्लन मां छ़ेडतां अई। ते तैस बच्चेरी बेइन दूर खड़ी राई, कि हेरे तैस मट्ठे सेइं कुन भोते।
तैखन तैसां हेरू कि फ़िरौनेरी कुई दरियाए पुड़ निहाने अई ते तैसारी सहेली दरियारे बन्ने-बन्ने हंठने लेगि, ज़ैखन तैसां झ़ैल्लन मां टोकरी लाही ते तैसां अपनि सहेली भेज़ी कि गाथ एस टोकरी इरां आनां। त ज़ैखन तैसां टोकरी खोल्ली त तैस मां मट्ठू लावं, तैन मट्ठू लेरां देंतू थियूं, तैखन तैस तरस अव ते तैसां ज़ोवं, “ऐह कोन्ची इब्रि केरो बच्चो भोल्हो।” एत्रे मां तैस बच्चेरे बेइनां फ़िरौनेरे कुइये सेइं ज़ोवं, “कुन अवं गेइतां इब्रानी कौन्शन मरां अक दुद्ध पियाने बाली कौन्श तीं कां कुजेइतां एन्हीं, ज़ै तेरे लेई एस बच्चे दुद्ध पियाए?” फ़िरौनेरी कुइयां जुवाब दित्तो, “हाँ, गा।” तैखन कुइयां गेइतां तैस बच्चेरी अम्मा कुजेइतां आनी। तैस बच्चेरी अम्मा एजनेरे बाद फ़िरौनेरी कुइयां तैस सेइं ज़ोवं, “तू इस मट्ठे नेइतां दुद्ध पीया अवं तेरी मज़दूरी तीं देइली।” तैखन तै कौन्श तैस बच्चे नेइतां दुद्ध पियाने लगी। ज़ैखन तै बच्चो थोड़ो बड्डो भोव त तैसां तै फ़िरौनेरी कुइये कां पुज़व, तैखन तैन तैसारू मट्ठू बनू, तैसां तैसेरू नवं मूसा1 एन ज़ोइतां रख्खू कि, “मीं एन पैनी मरां कढेरू थियूं।”
मूसा मिद्यान मुल्खे जो नश्शते
ज़ैखन मूसा जुवान भोव त एक्सां मेहलेरे बेइर निस्सो ते अपने लोकन कां जेव, ते तैन केरि मुसीबती पुड़ तैने नज़र की, तैनी हेरू कि अक मिस्री तैसेरे इब्रानी ढ्लाए मारने लग्गोरोए। फिरी मूसे इरां उरां तक्कू ते ज़ैखन हेरू कि कोई होरो मैन्हु नईं त तैनी तै मिस्री मारो ते तैसेरी लाश रेती मां छ़ुपेइतां छ़डी।
होरसां भी दीसां तैनी मेहलेरे बेइर गेइतां हेरू कि दूई इब्रानी मैन्हु एप्पु मांमेइं लड़ने लगोरेन, तैनी ज़ेसेरो कसूर थियो तैस सेइं ज़ोवं, “तू अपने सैथी किजो मारतस?” तैन मरां एक्की इब्रानी मैन्हे ज़ोवं, “केनि तू असन पुड़ हाकिम या न्याय केरनेबालो ठहरावरोस? ज़ेन्च़रे तीं तै मिस्रेरो रानेबालो मारोरोए तेन्च़रे मीं भी मारने चातस?” तैखन मूसो एन शुन्तां डेरि जेव, किजोकि तैनी सोचू, “कि एस गल्लरो सेब्भन पतो लग्गो।” ज़ैखन फ़िरौने ऐह गल शुनी त एन चाऊ कि मूसे कत्ल केरे, मूसा फ़िरौने करां नश्शो ते मिद्यान मुल्खे मां बेस्सी जेव, ते तै एक्की खुहेरे नेड़े बिश्शो।
ते मिद्यानेरे याजकेरी सत कुइयां थी, तैना एइतां अपने गब्बन पानी पीयानेरे लेई कुण्डां भरने लेगि। ते होरे पुहाल एइतां तैन्न तैट्ठां कढने लगे, मूसा खड़ो भोव ते तैनी तैन केरि मद्दत की, ते तैन केरे गब्बन पानी पियांव। तैना कुइयां ज़ैखन अपने बाजी रूएले कां वापस जेई, त तैनी तैन पुछ़ू कि, “अज़ तुस एत्री लूशी केन्च़रे एई?” तैन कुइयेईं ज़ोवं, “एक्की मिस्री मैन्हे अस पुहालन करां छुटेई ते इश्शे ठैरी पानी भेरतां इश्शे गब्बन पियांव।” तैनी एपनी कुइयन पुछ़ू, “तै मैन्हु कोड़िए? तुसेईं तै तैड़ी किजो छ़डो? तैस इरां कुजाथ, कि तै रोट्टी खाए।” ते मूसे तैस मैन्हेरे घरे बिशनेरो फैसलो कियो, ते तैनी अपनि कुई सिप्पोरा मूसे जो ड्लेइतां दित्ती। ते तैस अक मट्ठू भोवं ते मूसे तैसेरू नवं गेर्शोम एन ज़ोइतां रख्खू कि, “अवं इड़ी परदेशी आईं।”
किछ सालां केरे बाद एरू भोवं कि मिस्रेरो राज़ो मेरि जेव, तैखन इस्राएली लोक सखत कम्मां केरे वजाई सेइं करलाने, ते चिन्डां मारने लगे, ते तैन केरि बिनती परमेशरे कां पुज़्ज़ी ज़ै सखत कम्मां केरे वजाई सेइं थी। ते परमेशरे तैन केरू करलानू शुन्तां अपनो करार याद कियो, ज़ै तैनी अब्राहम, इसहाके ते याकूबे सेइं कियोरो थियो। ते परमेशरे इस्राएली लोकन पुड़ नज़र केरतां तैन पुड़ ध्यान दित्तू।
Source notes (1)
- Footnote मूसा मतलब कढोरो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.