Bhadrawahi Bible
उत्पत्ति 49
याकूबेरी नबूवत
फिरी याकूबे अपना मट्ठां एप्पु कां कुजां, ते ज़ोवं “अकोट्ठे भोथ, अवं तुसन ज़ोइलो, कि आखरी दिहाड़न मां तुसन पुड़ कुन-कुन बीतेलू। हे याकूबेरे मट्ठव, अकोट्ठे भोइतां शुना, अपने बाजी इस्राएलेरी गल शुना।
हे रूबेन, तू मेरू बड्डू मट्ठू, ते मेरो ज़ोर, ते मेरे ताकतरो पेइलो फल आस,
ते तू इज़्ज़तरो रोड़ो हिस्सो भोल्हो, ते ताकतरो भी रोड़ू हिस्सो तूए भोल्हो।
तू ज़ै पैनेरो ज़ेरो उबलने बालोस, एल्हेरेलेइ तीं होरन करां जादे इज़्ज़त न मैल्हेली,
किजोकि तू अपने बाजी केरि खट्टी पुड़ जेव,
तैखन तीं तै खट अपवित्र की,
ते मेरे बिछ़ाने पुड़ अव।
शिमोन ते लेवी त ढ्ला-ढ्ला आन,
तैन केरि तलवारां ज़ुलमेरे हथियारन।
हे मेरी जान मीं तैन केरे बत्ती मां गाने न दे,
ते न मीं तैन केरि सभाई मां मिलने दे;
किजोकि तैनेईं अपने क्रोधे सेइं लोकां केरो कत्ल कियो,
ते अपनि मेर्ज़ी सेइं तैनेईं दांतां केरां पौंछ़ड़ां कट्टां।
लानते तैन केरे क्रोध जो, ज़ै एत्रो जादे थियो,
ते तैन केरि सरकी जो,
ज़ै एत्री सखत थी, अवं तैन याकूबे मरां अलग-अलग,
ते इस्राएले मरां तितर-बितर केरेलो।
हे यहूदा, तेरे ढ्ला तेरी शुक्रगुज़ारी केरेले,
तेरो हथ तेरे दुश्मन पुड़ पेलो;
तेरे बाजी केरां मट्ठां तीं कां झुकेलां।
यहूदा शेरेरो बच्चोए,
हे मेरे मट्ठा, तू शिकार केरतां एवरोस,
तै शेरेरो ज़ेरो बल्के शेरनरो ज़ेरो छ़ेपतां बिश्शी जेव,
फिरी कौन तैस सेइं छ़ेड़नेरी हिम्मत केरेलो।
ज़ांतगर शीलो1 न एज्जे,
तांतगर न यहूदारे हथ्थेरां राज़ छुटेलू,
ते न तैसेरे खानदाने मरां हुकूमतरी सोटी छुटेली।
ते रियासतां-रियासतां केरे लोक तैसेरे अधीन भोल्हे।
तै अपने जुवान गधे दाछ़रे बुट्टे सेइं,
ते अपने गेधरे बच्चे रोड़े
किसमेरे दाछ़ी सेइं बन्धेलो,
तैनी अपना लिगड़ां दाखमधु मां,
ते अपना लिगड़ां दाछ़रे रसेरे कुण्डे मां धोआं।
तैसेरी एछ़्छ़ी दाछ़रे रस्से करां जादे चमकीली भोल्ही,
ते तैसेरे दंत दुद्धे करां जादे छ़ित्ते भोल्हे।
जबूलून समुन्दरेरे बन्ने बस्सेलो,
तै ज़िहाज़ां केरे लेई बन्दरगाहरू कम देलो,
ते तैसेरो उस पासेरो हिस्सो सीदोनेरे नेड़े पुज़ेइलो।
इस्साकार एक्की बड्डे ते ताकतबर गधेरो ज़ेरोए,
ज़ै जानबरां केरे बाड़े मां छ़पोरो रहते।
तैनी अक आरामेरी ठार हेरतां, कि ऐह रोड़ीए,
ते अक मुल्ख, कि ऐह खूबसूरते,
अपनो कंधो भारो छ़ूनेरे लेई झुकव,
ते बेगारी मां नौकरेरू ज़ेरो कम केरने लाव।
दान इस्राएलेरू अक गोट्ल भोइतां
अपने कौमरे ढ्लां केरो न्याय केरेलो।
दान बत्तरो अक सप्पे,
ते बत्तरो अक नाग भोल्हो,
ज़ै घोड़ेरी नली डसते,
ज़ैस सेइं तैसेरो सुवार खिरकी गाते।
हे यहोवा, अवं तेरी मुक्तरी बत बलगने लगोरोईं।
गादे पुड़ अक सेना चढ़ाई केरेली,
पन तै तैन पुड़ पुतोरां हमलो केरेलो।
आशेरेरू ज़ैन अन्न भोल्हु, तैन बड़ू रोड़ू भोल्हु,
ते तै राज़ां केरे लेई सुवादे बाली रोट्टी तियार केरेलो।
नप्ताली अक आज़ाद भोवरी हिरनरो ज़ेरोए,
तै रोड़ी गल्लां2 ज़ोतीए।
यूसुफ अक फल देनेबाली डालड़ी आहे,
ज़ै नागे कां लगोरीए,
ज़ेसेरी डैलड़ी गैइड़ेरे बुट्टे पुड़ गुसोरिन।
तीर च़लाने बालेईं तैस पुड़ हमलो कियो,
तैस पुड़ तीर मारे,
ते बैर रखने बालेईं तैस पुड़ तीर च़लाए।
पन तैसेरू धनुष मज़बूत राव,
ते तैसेरी पाखड़ ते हथ याकूबेरे
तैस्से शक्तिमान परमेशरेरे हथ्थन सेइं जल्दी भोइ,
ज़ैस कां तै पुहाल एज्जेलो,
ज़ै इस्राएलेरी चट्टान भी ठहरेलो।
इन तेरे बाजी केरे तैस परमेशरेरू कम्मे,
ज़ै तेरी मद्दत केरेलो,
तैस सर्वशक्तिमानेरू ज़ै तीं
बां अम्बरे मरां बरकतां,
ते बुन्हीं डुग्घे पैनेरी बरकतन सेइं
ते जानबरां ते बच्चां केरि बरकतन सेइं भरपूर केरते।
तेरे बाजी केरे आशिर्वाद
मेरे पूर्वजां केरे आशिर्वादन करां बधोरेन3
पुराने पहाड़ां केरि बरकतन सेइं
ते पुराने पहाड़ां केरि पैदावारी करां भी जादे बेद्धतन;
एना सब यूसुफे पुड़, ज़ै तैसेरे ढ्लाएईं अलग कियोरो थियो
एना सैरी बरकतां तैस पुड़ एइती रहेली।
बिन्यामीन छ़िन्दने बाले गिदेरो ज़ेरोए,
झ़ेझ़ां त तै शिकार खालो
ते ड्लवझ़ां लूट पाटरो माल बंटेलो।”
इस्राएलेरे 12 गोट्ल इना आन, ते तैन केरे बाजे ज़ैस-ज़ैस वचने सेइं तैन आशिर्वाद दित्तो, तैना इना आन; हर एक्की तैनी आशिर्वादेरे मुताबिक तैन आशिर्वाद दित्तो।
याकूबे मित्ती देनेरो हुक्म
तैखन याकूबे तैन एन ज़ोइतां हुक्म दित्तो, “अवं हुनी मरनेबालोईं, एल्हेरेलेइ मीं अपने दादन-पड़दादन सेइं साथी तैस कुढी मां दफन केरथ, ज़ै हित्ती एप्रोनेरे उडारे मांए। मतलब तैस कुढी मां ज़ै कनान मुल्खेरे मम्रेरे नेड़े मकपेलारे उडारे मांए, अब्राहमे हित्ती एप्रोने करां कब्रसतानेरी ठार अपनि ज़मीन भोनेरे लेई घिन्नोरी थी। तैड़ी अब्राहम ते तैसेरी कौन्श सारा दब्बोरी थी, ते ज़ैड़ी इसहाक ते तैसेरी कौन्श रिबका दबोरां थियां, ते ज़ैड़ी मीं लिआ भी दब्बोरी थी। तै ज़मीन ते तैसेरी तै कुढ हित्ती लोकन करां घिन्नोरी थी।” याकूबे ज़ैखन अपने मट्ठन ऐह हुक्म दित्तो त तैनी अपने पव खट्टी पुड़ खोंजड़ेइतां आखरी सांस घिन्नी ते मेरतां अपने लोकन मां शामल भोइ जेव।
Source notes (3)
- Footnote शीलो शान्ति देनेबालो
- Footnote रोड़ी गल्लां मतलब चापलूसी।
- Footnote मेरे पूर्वजां केरे आशिर्वादन करां बधोरेन तेरे बाजी केरे आशिर्वाद मेरे हमेशारे आशिर्वादन सेइं
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.