Bhadrawahi Bible
उत्पत्ति 14
लूत कैदी बनाव गानो
शिनार मुल्खेरो राज़ो अम्रापेल, ते एल्लासारेरो राज़ो अर्योक, ते एलाम मुल्खेरो राज़ो कदोर्लाओमेर, ते गोयीमेरो राज़ो तिदालारेरे राज़ केरनेरे दिहाड़न मां एरू भोवं, कि तैन च़ेवर राज़ेईं सदोमेरो राज़ो बेरा, ते गमोरारो राज़ो बिर्शा, ते अदमा नगरेरो राज़ो शिनाब, ते सबोयीमेरो राज़ो शेमेबेर, ते बेला ज़ैस जो सोअर भी ज़ोतन, इन पंच़ नगरां केरे राज़ां केरे खलाफ जंग की। इन पंच़ राज़ेईं सिद्दीम नव्वेंरी वैदी मां, ज़ै खारे समुन्दरे कांए, अकोट्ठे भोए। बारहे सालन तगर त इना कदोर्लाओमेरे अधीन राए; पन तेरहोवं साले मां तैसेरे खलाफ खड़े भोए। च़ेवधोवं साले मां कदोर्लाओमेर, ते तैसेरे साथी राज़े आए, ते अश्तारोत्कनमे मां रपाई लोकन, ते हामे मां जूजी लोकन, ते शावे-किर्यातैमे मां एमी लोकन, ते सेईर नंव्वेरे पहाड़े पुड़ होरी लोकन, मारते-मारते तैस एल्पाराने तगर पुज़्ज़े ज़ैन सुनसान ठैरी कांए। तैट्ठां तैना वापस एइतां एन्मिशपात मांजो आए, ज़ैस जो कादेश भी ज़ोतन, ते अमालेकी लोकां केरे सारो मुल्ख, ते तैना एमोरी भी ज़ींते, ज़ैना हसासोन्तामारे मां रहते थिये। तैखन सदोम, गमोरा, अदमा, सबोयीम, ते बेला, ज़ैस जो सोअर भी ज़ोतन, इन केरे राज़े निस्से, ते सिद्दीम नंव्वेरे वैदी मां, तैन सेइं जंग केरनेरे लेई अकोट्ठे भोए: मतलब एलामेरे राज़े कदोर्लाओमेर, गोयीमेरे राज़े तिदाल, शिनारेरे राज़े अम्रापेल, ते एल्लासारेरे राज़े अर्योक, इन च़ेवरां केरे खलाफ तैना पंच़ अकोट्ठे भोए। एरू भोवं कि सिद्दीम नंव्वेरे वैदी मां ज़ैड़ी लसार मित्तरे खड्डे-खड्डे थिये; सदोम ते गमोरारे राज़े नशते-नशते तैन मां झ़ेड़ी जे, ते ज़ैना बच़े तैना पहाड़े पुड़ नेश्शी जे। तैखन तैना सदोम ते गमोरा नगरेरी सारी धन-दौलत ते खानेरी चीज़ां लूट-पाट केरतां च़ेलि जे। ते अब्रामेरे ढ्लाएरू मट्ठू लूत, ज़ैन सदोमे मां रहतू थियूं; तैस भी धन-दौलती समेत साथी नेइतां च़ले जे। तैखन अक मैन्हु ज़ै नेशतां बच़ोरो थियो तैने गेइतां इब्रि अब्रामे खबर दित्ती; अब्राम त एमोरी मम्रे, ज़ै एशकोल ते आनेरेरो ढ्ला थियो, तैसेरे बंज़ेरे बुट्टां केरे मझ़ाटे रहतो थियो; ते इन लोकेईं अब्रामे सेइं करार कियोरो थियो।
अब्राम लूते छुटाते
ज़ैखन अब्रामे एन शुनू, कि तैसेरे ढ्लाएरू मट्ठू कब्ज़े मां कियूं जेवरूए, त तैनी 318 बहादर, जंग केरने मां माहिर नौकरन साथी नेइतां ज़ैना तैसेरे कुटमे मां पैदा भोवरे थिये, हथियार साथी नेइतां दान नगरे तगर तैन केरो पीछो कियो। ते तैनी अपने नौकरां केरि अलग-अलग टोली बनेइतां राती तैन पुड़ हमलो केरतां होबा तगर, ज़ै दमिश्केरे उत्तरेरे पासे तगर, तैन केरो पीछो केरतां कढे। ते तै सारी धन-दौलती, ते अपने ढ्लाएरू मट्ठू लूत, ते तैसेरी धन-दौलती, ते कौन्शां, ते सब कैदी ज़ैना कब्ज़े मां कियोरे थिये, वापस घिन्तां अव। ज़ैखन अब्राम कदोर्लाओमेर ते बाकी राज़न ज़ींत्तां वापस एज्जी राहोरो थियो, तैखन सदोमेरो राज़ो शावे नंव्वेरे वैदी मां, ज़ैस जो राज़ेरी वादी भी ज़ोतन, तैस सेइं मिलनेरे लेई अव।
अब्राम ते मलिकिसिदक
तैखन शालेमेरो1 राज़ो मलिकिसिदक, ज़ै परमप्रधान परमेशरेरो याजक थियो, तैनी रोट्टी ते दाछ़रो रस आनो। ते तैनी अब्रामे ई आशिर्वाद दित्तो, “परमप्रधान परमेशरेरे तरफां, ज़ैनी अम्बर ते धरती बनाई, तै तीं बरकत दे। ते परमप्रधान परमेशरेरी तारीफ़ भोए, ज़ैनी तेरे दुश्मन तेरे कैबू मां कियोरेन।” तैखन अब्रामे तैस सेब्भी चीज़ां केरो दशोवं हिस्सो दित्तो। तैखन सदोमेरे राज़े अब्रामे सेइं ज़ोवं, “प्राणी त तू मीं दे, ते धन-दौलत एप्पु कां रख।” पन अब्रामे सदोमेरे राज़े सेइं ज़ोवं, “परमप्रधान परमेशर यहोवा, ज़ैनी अम्बर ते धरती बनाई, तैसेरी अवं ई कसम खाताईं, कि ज़ैन किछ तेरू आहे तैस मरां न त अवं अक सूट्ल, ते न जुट्टी केरो तसमो, न कोई होरि चीज़ नेइलो; कि तू एरू न ज़ोस, कि अब्राम मेरे वजाई सेइं अमीर भोवरोए। पन ज़ैन किछ इन जुवानेइं खेवरूए ते तैन लोकां केरो हिस्सो ज़ैना मीं सेइं साथी जेवरे थिये; मतलब आनेर, एशकोल, ते मम्रे अवं तैन वापस न देइलो, तैना त अपनो-अपनो हिस्सो रखन।”
Source notes (1)
- Footnote शालेम यरूशलेम
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.