Bhadrawahi Bible
उत्पत्ति 13
अब्रामेरू कनान मुल्खे जो वापस एजनू
तैखन अब्राम अपनि कौन्श, ते अपनि सारी जाईदात नेइतां, ते लूत भी साथी नेइतां, मिस्र छ़ेडतां कनानेरे दक्षिण मुल्खे मां अव। अब्राम बड़ो अमीर थियो, तैस कां बड़ा गब्बां गोरू ते बड़ू सोन्नू चाँदी थियूं। फिरी तै दक्षिण मुल्खे मरां च़लते-च़लते एक्की ठारारां होरि ठारी पुज़्ज़ो, ज़ैड़ी तैनी अपनो पेइलो तेम्बु खड़ो कियोरो थियो, ज़ै बेतेल ते आई नगरां केरे दरमियाने मांए। ई ठार तैस वेदी कांए, ज़ै तैनी पेइली बनेवरी थी, ते तैड़ी अब्रामे फिरी यहोवा कां प्राथना की।
अब्राम ते लूतेरू अलग भोनू
लूते कां भी, ज़ै अब्रामे साथी च़लतो थियो, गब्बां, गोरू, ते टब्बरेरे मैन्हु1 थिये। पन तैस मुल्खे मां तैन दूईयां केरे लेई तै ठार घट थी, ते तैना अकोट्ठे रेइ न थिये सकते, किजोकि तैन कां बड़ी जाईदात थी एल्हेरेलेइ तैना अकोट्ठे न रेइ बटे। एल्हेरेलेइ अब्राम ते लूतेरे गोरू गब्बां केरे गाल पुहालन मां लड़ाई भोइ। तैस वक्ते कनानी ते परिज्जी लोक, तैस मुल्खे मां रहते थिये।
तैखन अब्राम लूते सेइं ज़ोने लगो, “मेरे ते तेरे दरमियाने मां, ते मेरे ते तेरे पुहालां केरे दरमियान लड़ाई न भोए; किजोकि अस लोक भियालम। कुन ई सारो मुल्ख तेरे सामने नईं? त तू मीं करां अलग भो, अगर तू बांए पासे गास त अवं देइने पासे गेइलो; ते अगर तू देइने पासे गालो त अवं बांए पासे गेइलो।” तैखन लूते एछ़्छ़ी उब्री केरतां, यरदन दरियाए करां बेइहीं सारी वादी लाही कि तै सब सेगोरीए। ज़ांतगर यहोवा परमेशरे सदोम ते गमोरा नाश न थियां कियोरां, तांतगर सोअरेरे बत्ती तगर तै वादी यहोवारे बागरी, ते मिस्र मुल्खेरी ज़ेरि फलदार थी। एन्च़रे लूत अपने लेई यरदनेरी सारी वादी च़ुनतां पूर्वेरे पासे च़लो, ते तैना एक्की होरि करां अलग भोइ जे। अब्राम त कनान मुल्खे मां राव, पन लूत तैस वैदरे नगरन मां राने लगो; ते अपनो तेम्बु सदोमेरे नेड़े खड़ो कियो। सदोमेरे लोक यहोवारी नज़री मां बड़े दुष्टी ते पापी थिये।
अब्रामेरू हेब्रोने जो गानू
ज़ैखन लूत अब्रामे करां अलग भोइ जेव तैखन तैसेरां बाद यहोवा अब्रामे सेइं ज़ोवं, “एछ़्छ़ी उब्री केरतां ज़ैस ठारी पुड़ तू आस तैट्ठां उत्तर-दक्षिण, पूर्व-पश्चिम, च़ेवरे पासन नज़र दे। किजोकि ज़ेत्री धरती तीं लेइहोतीए, तै सब अवं तीं ते तेरे खानदाने जुगे-जुगेरे लेई देइलो। ते अवं तेरे खानदाने धेरतरे धूड़रे ज़र्रां केरे बराबर खूब बधेइलो, इड़ी तगर कि ज़ेन्च़रे कोई धेरतरे धूड़रे ज़र्रां केरि गिनती न केरि सके; तेन्च़रे तेरे खानदाने भी कोई गेनि न बटेलो। उठ, इस मुल्खेरे लम्बाई ते चौड़ाई मां च़ेलतां फिरतां हेर; किजोकि अवं तैस तींए देइलो।” इसेरे बाद अब्राम अपनो तेम्बु पुटतां, मम्रेरे बंज़ेरे बुट्टेरे मझ़ाटे ज़ै हेब्रोने मां थियो, गेइतां राने लगो, ते तैड़ी भी यहोवारी अक वेदी बनाई।
Source notes (1)
- Footnote टब्बरेरे मैन्हु तेम्बु
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.