Bhadrawahi Bible
उत्पत्ति 15
अब्रामे सेइं परमेशरेरो करार
इन गल्लां केरे बाद यहोवारू इन वचन दर्शने मां अब्रामे कां पुज़्ज़ू “हे अब्राम, न डर; अवं तेरी ढाल ते तेरो बड़ो बड्डो फल आईं।” अब्रामे ज़ोवं, “हे प्रभु यहोवा1, अवं त बेऔलाद आईं, ते मेरे घरेरो बारस त ई दमिश्क नगरेरो रानेबालो एलीएजेर भोल्हो, ते तू मीं कुन देलो?” ते अब्रामे ज़ोवं, “तीं त मीं कोई औलाद न दित्ती, ते कुन हेरताईं, कि मेरे घरे मां पैदा भोवरो अक गुलाम मेरो बारस भोल्हो।” फिरी यहोवाए अब्रामे सेइं ज़ोवं, “ई गुलाम तेरो बारस न भोल्हो, ज़ैन तेरू अपनु मट्ठू भोल्हु, तैन्ने तेरू बारस भोल्हु।” ते यहोवा तै बेइर नेइतां तैस सेइं ज़ोवं, “अम्बरेरे पासे नज़र केरतां अम्बरेरे तारे गन, कुन तू तैन्न गेनि सकतस?” फिरी तैने तैस सेइं ज़ोवं, “तेरू खानदान एरू भोल्हु।” तैने यहोवा पुड़ विश्वास कियो; ते यहोवा ई गल तैसेरे हक्के मां धार्मिकता गनी।2
ते यहोवा तैस सेइं ज़ोवं, “अवं तैए यहोवा आईं ज़ैने तू कसदी लोकां केरे ऊर नगरे मरां केढतां आनोरोस, कि इस मुल्खे तेरे अधिकारे मां देईं।” पन अब्रामे पुछ़ू, “हे प्रभु यहोवा अवं केन्च़रे सेमझ़ी कि तू एन सब मेरे अधिकारे मां केरेले?” यहोवा तैस जुवाब दित्तो, “मेरे लेई ट्लेइ सालां केरि अक बछ़ड़ी, ते ट्लेइ सालां केरि अक छ़ल्ली, ते ट्लेइ सालां केरो अक हुड़, ते अक घुग्गू ते कबूतरेरो अक बच्चो ने।” ते इन सेब्भन नेइतां, तैनी मझ़ाटेरां दूई टुक्ड़े केरि दित्ते ते टुक्ड़े आमने-सामने रख्खे पन च़ुड़ोलू केरे तैने टुक्ड़े न किये। ज़ैखन मास खाने बालां च़ुड़ोलू तैन पुड़ पेआं, तैखन अब्रामे तैना ऊडारां।
ज़ैखन दिहाड़ो डुबने लग्गो, तैखन अब्रामे बड़ी निड्ल अई; ते हेरा तैस पुड़ बड़ो डर ते अंधकार पेई जेव। तैखन यहोवा अब्रामे सेइं ज़ोवं, “इन ज़रूर ज़ान कि तेरे खानदानेरे लोक बखले मुल्खे मां परदेशी भोइतां राले, ते तैस मुल्खेरे लोकां केरे गुलाम भोल्हे; ते तैना तैन 400 सालन तगर दुख देले; फिरी ज़ैस मुल्खेरे लोकां केरे तैना गुलाम भोल्हे तैन अवं सज़ाह देइलो: ते तैसेरां बाद तैना तैट्ठां बड़ी धन-दौलत नेइतां निस्सी गाले। तू त अपने सियानन मां सुखे सेइं मिली गालो; ते तू पूरे बुढापे मां दब्बो गालो। पन तैना च़ेवरोवं पीढ़ी मां फिरी इड़ी एज्जेले: किजोकि हेजू तगर एमोरी लोकां केरो पाप पूरो नईं भोवरो।”
ते एरू भोवं कि ज़ैखन दिहाड़ो डुबो ते बड़ू आंधरू पेई जेवं, तैखन अक आंवठी ज़ैस मरां तू च़लतो थियो, ते अक बलती मसाल लेइहोई, ज़ै तैन टुक्ड़न मरां भोइतां निस्सी जेई। तैस्से दिहाड़े यहोवा अब्रामे सेइं ई करार कियो, “मिस्रेरे सरहद्दी करां लेइतां फरात नंव्वेरे बडे दरियाए तगर ज़ेत्रो मुल्खे, मतलब, केनी लोक, कनिज्जी लोक, कदमोनी लोक, हित्ती लोक, परिज्जी लोक, रपाई लोक, एमोरी लोक, कनानी लोक, गिर्गाशी लोक ते यबूसी लोकां केरो मुल्ख, मीं तेरे खानदाने जो दित्तोरोए।”
Source notes (2)
- Footnote प्रभु यहोवा हे प्रभु यहोवा इब्रानी लफज़ “अदोनाई यहोवारो” मतलबे, इन इब्रानी भाषाई मां परमेशरेरू नवं घिन्नेरे लेई इस्तेमाल भोते।
- Cross-reference गल. 3:6;रोम. 4:3;याक. 2:23.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.