यहेजकेल 9

यरूशलेम नगरेरे लोकन सज़ाह

1फिरी यहोवा उच्‍ची आवाज़ी मां मीं सेइं ज़ोवं, “नगरेरे अधिकारी लोकन अपने-अपने हथ्थन मां नाश केरनेरे लेई हथियार घिन्तां आन।” 2ते मीं हेरू कि शा मड़द, उत्तरेरे पासेरां नगरेरे बेइयें फाटकेरी बत्तां अपने-अपने हथ्थे मां मारनेरे लेई हथियार घिन्तां आए; ते तैन केरे मझ़ाटे सनेरां लिगड़ लेइतां, लख्खे मां लिखनेरी दुवात बेन्धतां अक होरो मड़द थियो; ते तैना सब परमेशरेरे भवनेरे अन्तर गेइतां पितलरी वेदी कां खड़े भोए।

3तैखन इस्राएलेरे परमेशरेरी महिमा करूबन पुड़ां, ज़ैन पुड़ तै रहतो थियो, भवनेरे दारे पुड़ उठतां एवरी थी; ते तैनी तैस सनेरां लिगड़ां लेइतां मड़दे हक दित्ती ज़ैनी लख्खे मां दुवात बेन्धोरी थी। 4ते यहोवा तैस सेइं ज़ोवं, “इस यरूशलेम नगरेरे अन्तर इरां-उरां गेइतां मैन्हु तैना सब भिट्टे कम्मां केरे वजाई सेइं ज़ैना तैस मां कियां गातन, ओशा छ़डतन ते दुखे सेइं चिन्डां मारतन, तैन केरे कुपान पुड़ निशान ला।” 5तैखन तैने मेरे शुन्ते बारे होरन सेइं ज़ोवं, “नगरे मां तैन पत्पती च़ेलतां तैन मारते गाथ; कोन्ची पुड़ दया न केरथ ते न नेरमी सेइं कम केरथ। 6बुढे, जुवान, कुइयां, बाल बच्‍चे, कौन्शां, सब मैरतां नाश केरा, पन ज़ैस कोन्ची मैन्हेरे कुपाए पुड़ निशान भोए, तैसेरे नेड़े न गेइयथ। ते मेरे पवित्र ठैरी मरां शुरू केरा।” ते तैनेईं तैन बुज़ुर्गन करां शुरू कियूं ज़ैना भवनेरे सामने थिये। 7फिरी तैनी तैन सेइं ज़ोवं, “भवने अशुद्ध केरा, ते अंगन्न लाशन सेइं भरा। च़ला बेइर निस्सा।” तैखन तैना निस्तां यरूशलेम नगरे मां लोकन मारने लगे। 8ज़ैखन तैना मारने लगोरे थिये, ते अवं अकैल्‍लो रेई जेव, तैखन अवं तुत्तरेरे भारे बिछ़ड़ो ते मीं चिन्डां मैरतां ज़ोवं, “अफ़सोस प्रभु यहोवा! कुन तू अपनि सरक यरूशलेम नगरे पुड़ भड़केइतां इस्राएलेरे सब बच़ोरे लोकन भी नाश केरेलो?”

9तैखन यहोवाए मीं सेइं ज़ोवं, “इस्राएल ते यहूदारे लोकां केरो अधर्म बड़ो जादे भोवरोए; इड़ी तगर कि मुल्ख खूने ते नगर अन्याय सेइं भेरोव जेवरूए; किजोकि तैना ज़ोतन, ‘यहोवाए धरती शारोरीए ते यहोवा किछ न हेरे।’ 10एल्हेरेलेइ तैन पुड़ दया न भोल्ही, न अवं नरमी केरेलो, बल्के तैन केरे कम्मां केरि सज़ाह तैन देइलो।”

11तैखन मीं कुन हेरू, कि ज़ै मड़द सनेरां लिगड़ां लेइतां ते लख्खे मां दुवात बेन्धतां थियो, तैनी इन ज़ोइतां खबर दित्ती, “ज़ेरो तीं हुक्म दित्तोरो थियो, मीं तेरहु कियूं।”1