Bhadrawahi Bible
यहेजकेल 10
परमेशरेरी महिमा भवने मरां निस्सी गानी।
इसेरे बाद मीं हेरू कि करूबां केरे क्रोड़न पुड़ ज़ैन आकाशमण्डले, तैस मां नीलमणि एरे तखतेरू ज़ेरू किछ लेइहोते। तैखन यहोवाए तैस मैन्हु सेइं ज़ोवं, ज़ैनी सनेरां लिगड़ां लेवरां थियां, “घुमने बाले पेइहां केरे मझ़ाटे करूबन हैठ गा ते अपनि दूईये मुठड़ी करूबां केरे मझ़ाटे अग्गरे मूरन सेइं भेरतां यरूशलेम नगरे पुड़ खिलार।” ते तै मेरे हेरते-हेरते तैन केरे मझ़ाटे जेव।
ज़ैखन तै मड़द अन्तर जेव, तैखन तैना करूब भवनेरे दक्षिणेरे पासे खड़े थिये; ते बिदलार एन्त्रियें अंगने मां भेरतां थी। तैखन यहोवारी महिमा करूबन पुड़ेरां उठतां भवनेरे दारे पुड़ अई; ते बिदलार भवने मां जेई; ते तैन अंगन यहोवारी महिमा सेइं भेरोई जेवं। करूबां केरे फंघां केरि आवाज़ भवनेरे बेइरीं अंगने तगर शुनोती थी, तै सर्वशक्तिमान परमेशरेरे ज़ोनेरी ज़ेरि आवाज़ थी।
ज़ैखन परमेशरे सनेरां लिगड़ां लेइतां मड़दे घुमने बाले पेइहां केरे अन्तर करूबन मरां अग्गरू मूरोवं आन्नेरे लेई हुक्म दित्तो, तैखन तै तैन केरे दरमियान एक्की पेइहे मां गेइतां खड़ो भोव। तैखन करूबन मरां एक्की करूबे अपनो हथ अग्रोवं केरतां, तैस अग्गी मरां ज़ै करूबां केरे दरमियाने मां थी, किछ छ़ुइतां सनेरे लिगड़ां लेइतां मड़देरी मुठड़ी मां दित्ती; ते तै तैस नेइतां बेइर च़लो जेव। करूबां केरे फंघन हैठ मैन्हेरे हथ्थेरू ज़ेरू किछ लेइहोतू थियूं।
तैखन मीं हेरू, कि करूबन कां च़ेवर पेइहे आन; मतलब एक्की-एक्की करूबे कां अक-अक पेइहो आहे, ते पेइहां केरू रूप फीरोज़ेरू ज़ेरू आहे। तैन केरू एरू रूपे, कि च़ेवरे अक्कां ज़ेरे लेइहोतन। ज़ेन्च़रे एक्की पेइहेरे मझ़ाटे होरो पेइहो भोए। च़लते वक्त तैना अपने च़ेवरे पासन च़ेलि सकतन; ते च़लते वक्त मुड़न न, बल्के ज़ेरहां तैन केरि क्रोड़ी भोतीए तरहां तैना तैस पत्पती च़लतन ते च़लते बार तैना मुड़न न। ते पिठ हथ ते फंघन समेत करूबां केरो सारो शरीर ते ज़ैना पेइहे तैन केरे आन, तैना भी सब च़ेवरे पासन एछ़्छ़न सेइं भेरतां आन।1 मेरे शुन्ते इन पेइहन जो चक्कर ज़ोवं जेवं, मतलब घुमने बाले पेइहे। सेभी केरां च़ेवर-च़ेवर तुत्तरां थियां; अक तुत्तर त करूबेरू ज़ेरू, दूइयोवं मैन्हेरू ज़ेरू, ट्लेइयोवं शेरेरू ज़ेरू, ते च़ेवरोवं उकाब च़ुड़लोवेरू ज़ेरू।2
करूब तल्ले मरां खड़े भोए। इनां तैन्नां जानदार आन, ज़ैना मीं कबार दरियाए कां लेवरे थिये। ज़ैखन-ज़ैखन तैना करूब च़लते थिये तैखन-तैखन तैना पेइहे तैन केरे नेड़े-नेड़े च़लते थिये। ते ज़ैखन-ज़ैखन करूब तल्ले मरां उडरनेरे लेई अपना फंघां खड़े केरते थिये तैखन-तैखन तैना पेइहे तैन करां न थिये मुड़ते। ज़ैखन करूब खड़े भोते थिये तैखन पेइहे भी खड़े भोते थिये; ते ज़ैखन करूब उठते थिये तैखन इना भी उठते थिये; किजोकि जानदारां केरि आत्मा इन मां भी रहती थी।
यहोवारी महिमा भवनेरे दारे पुड़ेरां उठतां करूबन पुड़ ठहरी जेई। तैखन करूब अपना फंघां खड़ां केरतां मेरे हेरते-हेरते तल्ले मरां उठतां च़ले जे; ते पेइहे भी तैन सेइं साथी-साथी जे, ते तैना सब यहोवारे भवनेरे पूर्वेरे फाटके मां खड़े भोइ जे; ते इस्राएलेरे परमेशरेरी महिमा तैन पुड़ थी।
इना तैना जानदारन ज़ैना मीं कबार दरियाए कां इस्राएलेरे परमेशरे हैठ लेवरे थिये; ते मीं समझ़ू कि तैना भी करूब आन। तैन सेभी केरां च़ेवर तुत्तरां ते च़ेवर फंघां ते फंघन हैठ मैन्हेरे हथ भी थिये। तैन केरे तुत्तरां केरि शकल तेरही थी ज़ेरि मीं कबार दरियारे बन्ने पुड़ लाहोरी थी। ते सिर्फ तैन केरे तुत्तरां नईं बल्के तैन केरि जान भी तेरही थी। तैना सिद्धे अपने-अपने सामने च़लते थिये।
Source notes (2)
- Cross-reference प्रका. 4:8.
- Cross-reference प्रका. 4:7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.