Bhadrawahi Bible
यहेजकेल 5
यहेजकेल अपनो दोग कटाते
यहोवाए मीं सेइं फिरी ज़ोवं, “ओ नाश भोने बाला मैन्हु, अक तिख्खी तलवार ने, ते तैस नेइएरे उस्तरेरे ज़ेरे इस्तेमाल केर ते अपनो दोग ते दाढ़ी कट; तैखन ट्लेकड़ी मां बाल तुलतां तैन केरे ट्लाई हिस्से केरां। ज़ैखन यरूशलेम नगरेरे घिरनेरे दिहाड़े पूरे भोल्हे, तैखन नगरेरे अन्तर अक हिस्सो बाल अग्गी मां छ़ेडतां फुक्कां; ते अक हिस्सो बाल च़ेवरे पासन तलवारी सेइं बैइतां इरां-उरां बिछ़ोड़ां; ते अक बाल हिस्सो हवाई मां उडैरां, ते अवं तलवार खिचतां तैस पत्पती च़लेइलो। तैखन इन मरां थोड़े ज़ेरे बाल नेइतां अपने लिगड़ेरे कूने मां बेन्धां। फिरी तैन मरां भी थोड़े ज़ेरे नेइतां अग्गी मां छ़ेडां कि तैना अग्गी मां फुकोई गान। तैखन तैस्से अग्गी मरां अक लप भेड़कतां इस्राएलेरे सारे लोकन मां फैली गाली।
“प्रभु यहोवा इन ज़ोते: यरूशलेम नगरी एरी आहे; मीं तै गैर कौमां केरे दरमियाने मां ठहराई, ते तै च़ेवरे पासां केरे मुल्खन सेइं घिरोरीए। तैस यरूशलेम नेगरां मेरे नियमां केरे खलाफ कम केरतां गैर कौमन करां जादे बुराई की, ते मेरे विधि केरे खलाफ च़ेवरे पासां केरे मुल्खां केरे लोकन करां जादे बुराई कियोरीए। किजोकि तैनेईं मेरे नियम घटिया समझ़े, ते तैना मेरे विधन पुड़ न च़ले। एल्हेरेलेइ प्रभु यहोवा इन ज़ोते, ज़ैना कौमां तुश्शे च़ेवरे पासन रैतिन तुस तैन करां जादे शौर मच़ातथ, ते न मेरी विधन पुड़ च़लथ, न मेरे नियम मन्नथ ते ज़ैना कौमां तुश्शे च़ेवरे पासन रैतिन तैन केरे नियमां केरे मुताबिक भी न कियूं, एल्हेरेलेइ प्रभु यहोवा इन ज़ोते: हेर, अवं तेरे खलाफ आईं; ते गैर कौमां केरे सामने अवं तीं सज़ाह देइलो। तेरी सब भिट्टी मूरती केरी पूज़ारे वजाई सेइं अवं एरू केरेलो, ज़ेरू न अज़ तगर कियोरूए, ते न एजने बाले वक्ते मां फिरी केरेलो। एल्हेरेलेइ तेरे दरमियान बच्चे अपने-अपने बाजेरू, ते बाजी अपने-अपने बच्चां केरू मास खाएले। ते अवं तीं सज़ाह देइलो, ते तेरे सब बच़ोरे लोकन च़ेवरे पासन तितर-बितर केरेलो। एल्हेरेलेइ प्रभु यहोवा इन ज़ोते, कि मीं अपनि कसम, एल्हेरेलेइ तीं मेरी पवित्र ठार1 एपनी सैरी भिट्टी मूरतन ते सारे भिट्टे कम्मन सेइं अशुद्ध कियोरीए, अवं तीं घटेइलो, ते तीं पुड़ दयारी नज़र न केरेलो, ते तीं पुड़ किछ भी नरमी न केरेलो। तेरे अक तिहाई लोक महामैरी सेइं मरेले, ते तेरे लोक नियन्ने मरेले। ते अक तिहाई लोकन अवं च़ेवरे पासन तितर-बितर केरेलो ते तलवार खिचतां तैन केरो पीछो केरेलो।2
“एन्च़रे सेइं मेरी सरक शान्त भोल्ही, ते अपनो क्रोध पूरे तरीके सेइं भड़केइतां मीं शान्ति मैल्हेली। ते ज़ैखन अवं अपनि जलजलाहट तैन लोकन पुड़ पूरे तरीके सेइं भड़केइलो, तैखन तैन पतो लग्गेलो कि मीं यहोवा जलनी मां एइतां इन ज़ोवरूए। अवं तेरे च़ेवरे पासन रानेबैली कौमां केरे दरमियान सब एजने गाने बालां केरे सामने उज़ाड़ेलो, ते तेरी बदनामी करेइलो। एल्हेरेलेइ ज़ैखन अवं तीं कोप ते जलजलाहट ते क्रोध करानेबाले झ़िड़की सेइं सज़ाह देइलो, तैखन तेरे च़ेवरे पासां केरि कौमां केरे सामने बेइज़्ज़ती, मज़ाक, इबरत ते हैरान भोनेरी वजा भोल्ही, किजोकि मीं यहोवा इन ज़ोवरूए। इन तैस वक्ते भोल्हु, ज़ैखन अवं तैन लोकन नाश केरनेरे लेई तुसन पुड़ कालेरे तिखे तीर च़लेइलो, तुश्शे दरमियान काल बधेइलो, ते तुश्शे अन्नेरो ज़िरियो दूर केरेलो। ते अवं तुश्शे दरमियान काल ते जंगली जानबर भेज़ेलो ज़ैना तुश्शे बच्चे मारेले। ते महामारी ते खून तुश्शे दरमियाने मां च़लतो रालो। ते अवं तुसन पुड़ तलवार च़लेइलो, मीं यहोवाए एन ज़ोवरूए।”3
Source notes (3)
- Footnote पवित्र ठार परमेशरेरो भवन
- Cross-reference प्रका. 6:8.
- Cross-reference प्रका. 6:8.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.