Bhadrawahi Bible
यहेजकेल 4
यरूशलेम नगरेरी घेराबन्दी भोनेरी नबूवत
यहोवाए मीं सेइं ज़ोवं, “ओ नाश भोने बाला मैन्हु, तू अक इट ने ते तैस अपने सामने रेखतां तैस पुड़ यरूशलेम नगरेरो नकशो बना। तैखन तैस घेर मतलब तैसेरे खलाफ किल्लो बना ते तैसेरे सामने दमदमो बन्ध। ते डेरे ला, ते तैसेरे च़ेवरे पासन जंग लड़नेरे लेई मोरच़ो ला। तैखन तू लोंहेरी थाली नेइतां तैस लोंहेरी शहरपनाह मेनतां अपने ते तैस नगरेरे दरमियान खड़ो केर। तैखन तैसेरू तुत्तर तैसेरे सामने केरतां तैसेरी घेराबन्दी केर एन्च़रे सेइं तू तैस घेरतां रेखां। ई इस्राएलेरे लोकां केरे लेई निशान भोल्हो।
“फिरी तू अपने बांए पासे लेटतां इस्राएली लोकां केरे अधर्म एप्पु पुड़ रख; किजोकि ज़ेत्रे दिहाड़े तू तैस पासे लेटोरो रालो, तेत्रे दिहाड़न तगर तैन लोकां केरे अधर्मेरो भार झ़ैलतो रालो। मीं तैन केरे अधर्मेरे सालां केरे ज़ेरे तेरे दिहाड़े ठहराए, मतलब 390 दिहाड़े। तेत्रे दिहाड़न तगर तू इस्राएली लोकां केरे अधर्मेरो भार झ़ैलतो रा। ज़ैखन एत्रे दिहाड़े पूरे भोन, तैखन अपने देइने पासे झ़ुलतां यहूदारे लोकां केरो अधर्मेरो भार झ़ैल्लां; मीं तैन केरे लेई भी ते तेरे लेई एक्की सालेरे बदले अक दिहाड़ी मतलब 40 दिहाड़े ठहरावरेन। तू यरूशलेम नगर घेरनेरे लेई नेग्गी पैखड़ी केरतां अपनु तुत्तर तैन केरे पासे रेखतां तैसेरे खलाफ नबूवत केरां। हेर, अवं तीं रेस्सन सेइं बन्धेलो, ते ज़ैखन तगर तैसेरे घेरनेरे दिहाड़ेरे पूरे न भोन, तैखन तगर तू फेर न देइ सकेलो।
अशुद्ध रोट्टी
“तू गेहुं, जौ, सेम, मस्सर, बाजरो, ते कठिया गेहुं, नेइतां एक्की भांडे मां रेखतां तैन सेइं रोट्टी बनेइयां। ज़ेत्रे दिहाड़े तू अपने करवटेरे बले पुड़ लेटेलो, तेत्रे मतलब 390 दिहाड़न तगर ई रोट्टी खेइयां। ज़ै रोट्टी तू खास, तै तुलतां खेइयां, मतलब 20-20 शेकेल1 खेइयां, ते तैस वक्ते-वक्ते पुड़ खेइयां। पानी भी तू नैपतां पीया, मतलब रोज़ हिनेरो शेइयोवं हिस्सो2 पीया। ते तैस वक्ते-वक्ते पुड़ पीया। अपनि-अपनि जौआं केरि रोट्टी केरि ज़ेरि बनेइतां खेइयां, ते तैस मैन्हेरे शुकोरे गुहे सेइं अग बैलतां तैन केरे हेरते-हेरते बनेइयां।” फिरी यहोवा ज़ोवं, “इस्से तरीके सेइं इस्राएली लोक तैन कौमां केरे दरमियान अशुद्ध रोट्टी खाएले, ज़ैड़ी अवं तैन ज़बरदस्ती पुज़ेइलो।” तैखन मीं ज़ोवं, “अफ़सोस, यहोवा परमेशर हेर, मेरो मन कधी अशुद्ध नईं भोवरोए, ते मीं बचपने करां हुना तगर एप्पु मरोरे ते जंगली जानबरे केरे मारोरे जानबरां केरू मास नईं खेवरू ते न कधी अशुद्ध मास मीं खेवरूए।”3 तैखन यहोवाए मीं सेइं ज़ोवं, “हेर, मीं तेरे लेई मैन्हेरे विष्ठारे बदले गोबर ठहराव, ते तैस्से सेइं तू अपनि रोट्टी बनेइयां।” फिरी तैनी मीं सेइं ज़ोवं, “ओ नाश भोने बाला मैन्हु, हेर, अवं यरूशलेम नगरे मां अन्नेरो ज़िरियो दूर केरेलो। हेर, एल्हेरेलेइ तैट्ठेरे लोक तुलतां ते फिक्र केरतां रोट्टी खाले। ते नैपतां ते उदास भोइतां पानी पीले। किजोकि तैन रोट्टरी ते पैनेरी कमी न भोल्ही; ते तैना सब घबराले, ते अपने पापां केरे वजाई सेइं नाश भोइ गाले।”
Source notes (3)
- Footnote 20 शेकेल लगभग 230 ग्राम।
- Footnote हिनेरो अक हीन लगभग 600 मिली लीटर भोते।
- Cross-reference प्रेरित. 10:14.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.