Bhadrawahi Bible
यहेजकेल 45
ज़मीनरो पवित्र हिस्सो
“ज़ैखन तुसां चिट्ठी छ़ेडतां मुल्ख बंटेले, तैखन मुल्खे मरां अक हिस्सो पवित्र केरतां यहोवारे लेई अर्पण केरथ। तैसेरी लम्बाई 25000 बाँस, ते चौड़ाई 10000 बाँस भोए; तै हिस्सो अपने च़ेवरे पासां केरि सरहद्दी तगर पवित्र ठहरे। तैस मरां पवित्र ठारारे लेई 500 बाँस लम्मी ते 500 बाँस चौड़ाई चौवरस ज़मीन भोए, ते तैसेरे च़ेवरे पासन 50-50 हथ बिल्ली ज़मीन खाली पेवरी राए। तैस पवित्र हिस्से मरां तुसां 25000 बाँस लम्मी ते 10000 बाँस बिल्ली ज़मीन नैपथ, ते तैस्से मां पवित्र ठार बनेइयथ, ज़ै परमपवित्र ठार भोए। ज़ैना याजक लोक पवित्र ठारारी सेवा केरेले या यहोवारी सेवा केरनेरे लेई नेड़े एज्जन, तै तैन केरे लेई भोए; तैड़ी तैन केरे घरां केरे लेई ठार भोए, ते पवित्र ठारारे लेई पवित्र ठहरे। फिरी 25000 लम्मो बाँस, ते 10000 बाँस चौड़ो अक हिस्सो, भवनेरी सेवा केरनेबाले लेवी केरे 20 कमरां केरे लेई भोए।
“फिरी नगरेरे लेई, अर्पण कियोरे पवित्र हिस्से कां, तुसां 5000 बाँस बिल्ली ते 25000 बाँस लम्मी, खास ज़मीन रेखथ; तै सब इस्राएली लोकां केरे लेई भोए।
प्रधानां केरे लेई ज़मीन
“इस्राएलेरो प्रधानेरो अपनो हिस्सो पवित्र अर्पण कियोरे हिस्से ते नगरेरी खास ज़मीनरे दूईने पासन मतलब दूईयां केरे पश्चिम ते पूर्व पासे दूईये हिस्सां केरे सामने भोन; ते तैसेरी लम्बाई पश्चिमे करां लेइतां पूर्वे तगर दूईये हिस्सन मां कोन्ची एक्केरे बराबर भोए। इस्राएलेरे मुल्खे मां प्रधानेरी एहे मलकीत भोल्ही। ते मेरे च़ुनोरे प्रधान मेरे लोकन पुड़ फिरी कधे ज़ुलम न केरन; पन इस्राएली लोकन तैन केरे गोट्लां केरे मुताबिक मुल्ख मैल्हे।
प्रधानां केरे लेई नियम
“परमेशर यहोवा एन ज़ोते: हे इस्राएलेरे प्रधानव! बस केरा, तुसां ज़ुलम ते अंधेर केरनी छ़ेडी देथ, ते न्याय ते धार्मिकतारां कम्मां केरा; मेरे लोक कढने छ़ेडी देथ, परमेशर यहोवा एन ज़ोते।
“तुसन कां सच़्च़ी ट्लकड़ी, ते सच़्च़ो एपा, ते सच़्च़ो बत भोए। एपा ते बत दूईये एक्की नापरे रेखथ, मतलब दूईने मां होमेरेरो दशोवं हिस्सो लग्गे; ते दूईयां केरि नाप होमेरे हिसाबे सेइं भोए। शेकेल 20 गेरा केरो भोए; ते तुश्शो माना 20, 25, या 15 शेकेलां केरो भोए।
“तुश्शी सल्लोरी च़ढ़तल एहे भोए, मतलब गेहुं केरे होमेरे सेइं एपारो शेइयोवं हिस्सो ते जौआं केरे होमेरे मरां एपारो शेइयोवं हिस्सो देनो। तेलेरो नियत हिस्सो कोरे मरां बतेरो दशोवं हिस्सो भोए; कोर त दश बत मतलब एक्की होमेरे बराबरे, किजोकि होमेर दश बत्तां केरो भोते। इस्राएलेरे रोड़े-रोड़े चरागान मरां दूई-दूई शौव भैड्डां छ़ेल्लन मरां अक भैड या अक छ़ेल्ली दित्ती गाए। एना सब चीज़ां अन्नबलि, होमबलि ते मेलबलि देनेरे लेई दित्ती गान; ज़ैन सेइं तैसेरे लेई प्रायश्चित कियूं गाए, परमेशर यहोवा एन ज़ोते। इस्राएलेरे प्रधानेरे लेई मुल्खेरे सारे लोक ऐह च़ढ़तल देन। तिहारन, नंव्वे चाँदेरे दिहाड़े, आरामेरे दिहाड़न ते इस्राएली लोकां केरे सेभी ठहरावरे वक्तन पुड़ अन्नबलि, होमबलि ते मेलबलि ते पीनेरी च़ढ़तल देनी प्रधाना केरू कम भोल्हु। इस्राएली लोकां केरे लेई प्रायश्चित देनेरे लेई तै पापबलि, अन्नबलि, होमबलि ते मेलबलि तियार केरे।
तिहार
“परमेशर यहोवा एन ज़ोते: पेइले महीनेरे पेइले दिहाड़े तू अक बगैर नुक्से बछ़ड़ू एन्हतां पवित्र ठारी पवित्र केरां। एस पापबेलरे खूने मरां याजक किछ नेइतां भवनेरी चुकाठेरे खम्भन पुड़, ते वेदरी कुर्सरे च़ेवरे कून्न पुड़, ते एंत्रीं अंगनेरे फाटकां केरे खम्भन पुड़ लाए। इस्से पेइले महीनेरे सत्तोवं दिहाड़े ज़ैनेईं गेलती सेइं या अनज़ाने मां पाप कियोरो भोए; एस तरीके सेइं तुसां भवनेरे लेई प्रायश्चित केरथ।
“पेइले महीनेरे च़ेवधोवं दिहाड़े तुसां फ़सह तिहार मनेइयथ, तैन सत दिहाड़ां केरू तिहार भोए, ते तैस मां अखमीरी रोट्टी खेइयथ। तैस दिहाड़े प्रधान अपने ते सब लोकां केरे लेई अक बछ़ड़ू पापबलि देनेरे लेई तियार केरे। तिहारेरे सत्तोवं दिहाड़े तै यहोवारे लेई होमबलि तियार केरे, मतलब रोज़ सत-सत बगैर नुक्से बछ़ड़ां ते सत-सत बगैर नुक्से हुड़ ते रोज़ अक-अक थाव्वो पापबलि देनेरे लेई तियार केरे। हर एक्की बछ़ड़े ते हुड़े सेइं साथी तै एपा भेरतां अन्नबलि, ते एपा सेइं साथी हीन भेरतां ज़ैतूनेरो तेल तियार केरे। सत्तोवं महीनेरे परहनोवं दिहाड़े करां लेइतां सत दिहाड़न तगर मतलब तिहारेरे दिहाड़न मां तै पापबलि, होमबलि, अन्नबलि ते ज़ैतूनेरो तेल विधरे मुताबिक केरे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.