Bhadrawahi Bible
यहेजकेल 44
भवनेरे पूर्वी दारेरो इस्तेमाल
फिरी तैनी मैन्हें अवं पवित्र ठारारे तैस बेइरीं फाटके कां वापस आनो, ज़ै पूर्वी पासे; ते तै फाटक बन्द थियो। तैखन यहोवाए मीं सेइं ज़ोवं, “ऐह फाटक बन्द राए ते खोलनो नईं; कोई एस बत्तां अन्तर न गाए; किजोकि इस्राएलेरो परमेशर यहोवा एस बत्तां अन्तर एवरोए; एल्हेरेलेइ ऐह बन्द राए। सिर्फ प्रधान, प्रधान भोनेरे वजाई सेइं; मेरे सामने बलिदानेरो हिस्सो खानेरे लेई तैड़ी बिशेलो; तै फाटकेरे ओसारे मरां भोइतां अन्तर गाए, ते इस्से मांमेइं बेइर निस्से।”
परमेशरेरे भवने मां गानेरे नियम
फिरी तैनी अवं उत्तरी फाटके मांमेइं भोइतां भवनेरे सामने आनो; तैखन मीं हेरू कि यहोवारो भवन तैसेरे महिमा सेइं भेरोई जेवरोए; ते अवं तुत्तरेरे भारे झुकी जेव।1 तैखन यहोवाए मीं सेइं ज़ोवं, “ओ नाश भोने बाला मैन्हु, ध्यान देइतां एपनी एछ़्छ़न सेइं तक, ते ज़ैन किछ अवं तीं सेइं अपने भवनेरे सब विधि ते नियमां केरे बारे मां ज़ोई, तैन सब अपने कन्नेईं सेइं शुन; ते भवने मां दाखल भोने ते पवित्र ठारारी सैरी बेइर निसनेरी बत्तन पुड़ ध्यान दे। ते तैना बगावत केरनेबाले मतलब इस्राएली लोकन सेइं ज़ोइयां, परमेशर यहोवा एन ज़ोते: हे इस्राएली लोकव, अपने सेभी भिट्टे कम्मन करां अपने हथ खड़े केरां। ज़ैखन तुसां मेरे लेई चर्भी ते खून च़ाढ़ते थिये, तैखन तुसां परदेशी लोकन ज़ैन केरो तन ते मन दूईये बगैर खतनेरे थिये, मेरी पवित्र ठारी पुड़ एजने देते थिये, कि तैना मेरो भवन अपवित्र केरन; ते तैनेईं मेरो करार ट्लोड़ो ज़ैस सेइं तुश्शां भिट्टां कम्मां बेधी जेआं।2 तुसेईं मेरी पवित्र चीज़ां केरि रक्षा न की, पन तुसेईं अपने मने सेइं बखले लोक मेरी पवित्र ठारी मां मेरी चीज़ां केरि रक्षा केरनेबाले रख्खे।
“एल्हेरेलेइ परमेशर यहोवा एन ज़ोते: इस्राएली लोकन मां ज़ेत्रे परदेशी लोक भोन, ज़ैन केरो तन ते मन दूईये बगैर खतने आन, तैन मरां कोई मेरी पवित्र ठारी मां न एज्जी सखे।
लेवी याजक पदे करां अलग किये जे
“पन लेवी लोक ज़ैना तैस मौके मीं करां दूर भोवरे थिये, ज़ैखन इस्राएली लोक मीं शैरतां एपनी मूरतन पत्ती भेटकी जेवरे थिये, तैन्न अपने पापां केरि सज़ाह मैल्हेली। फिर भी तैना मेरे पवित्र ठारारे दरबान ते सेवक रेइतां मेरी सेवा केरतन तैना होमबलि ते मेलबलि केरनेरे जानबर लोकां केरे लेई बलिदान केरन ते तैन केरि सेवा केरनेरे लेई तैन केरे सामने खड़े राले। किजोकि इस्राएलेरे घरानेरी सेवा तैना तैन केरि मूरती केरे सामने केरते थिये, ते तैन केरे ठोकर खानेरे ते अधर्मे मां फसनेरी वजाह भोइ जेवरे थिये; एल्हेरेलेइ मीं तैन केरे बारे मां कसम खेवरीए कि तैन्न अपने पापां केरि सज़ाह मैल्हे, परमेशर यहोवा एन ज़ोते। तैना मेरे नेड़े न एज्जन, ते न मेरे लेई याजकेरू कम केरन; ते न मेरी कोई पवित्र चीज़ या परमपवित्र चीज़ी सेइं हथ लान; तैना एपनी शर्मिन्दगरां ते ज़ैना भिट्टां कम्मां तैनेईं कियोरन, तैन केरि सज़ाह ई आहे। फिरी भी अवं तैन भवने मां सौंफोरी चीज़ां केरि हिफाज़त केरनेबाले रखेलो; तैस मां सेवारू ज़ेत्रू कम भोए, ते ज़ैन किछ तैस मां केरनू भोए, तैसेरे केरनेबाले तैन्ना भोन।
याजक
“फिरी लेवी याजक ज़ैना सादोकेरे खानदाने मरां आन, ते ज़ैनेईं तैस मौके मेरी पवित्र ठारारी हिफाज़त की ज़ैखन इस्राएली लोक मीं करां भेटकी जेवरे थिये, तैना मेरी सेवा केरनेरे लेई मीं कां एंइते रान, ते मीं कां बलिदान कियोरे जानबरां केरि चर्भी ते खून च़ाढ़नेरे लेई मेरे सामने खड़े भोन, परमेशर यहोवा एन ज़ोते। सिर्फ तैन्ना मेरी पवित्र ठारी पुड़ एंइते रान, ते मेरी मेज़े कां मेरी सेवा केरनेरे लेई एंइते रान, ते मेरी चीज़ां केरि हिफाज़त केरन। ज़ैखन तैनेईं अन्तर अंगनेरे फाटके मांमेइं निस्तां गानू भोए, त सनेरां लिगड़ां लेइतां गान, या ज़ैखन तैना एंत्रीं अंगनेरे फाटके मां या तैसेरे अन्तर सेवा केरते भोन; त तैखन तैना कोई उनालू लिगड़ न लान। तैना दोग्गे पुड़ सनेरी खूब रोड़ी टोपी लान, ते लख्खे मां जाँघियो लान ते लख्खे एरू लिगड़ न लान ज़ैस सेइं तैन पसीनो एज्जे। ज़ैखन तैना बेइरीं अंगने मां लोकन कां गान, तैखन ज़ैना लिगड़ां लेइतां तैना सेवा केरते थिये, तैन खोलतां पवित्र कमरे मां रेखतां होरां लिगड़ां लान ज़ैस सेइं लोक तैन केरे लिगड़ां केरि वजाई सेइं पवित्र न भोन। न तैना टिन्ड बनान ते न तैना बाल लम्मे रखन; तैना सिर्फ दोग कटान। एंत्रीं अंगने मां गांते बार कोई याजक दाछ़रो रस न पीए। तैना विधवा या शैरोरी कौन्शी सेइं ड्लाह न बनान, सिर्फ इस्राएली लोकां केरे खानदाने मरां कुवैरी या एरी विधवा कौन्शी सेइं ड्लाह बनान ज़ै पेइले कोन्ची याजकेरी कौन्श भोए। याजक मेरे लोकन पवित्र ते अपवित्र भोनेरो भेद शिखालते रान, ते शुद्ध ते अशुद्धेरो फर्क समझ़ाते रान। ते ज़ैखन कोई मुकदमो भोए तैखन न्याय केरनेरे लेई भी तैना बिश्शन, ते मेरे कानूनेरे मुताबिक न्याय केरन। ते मेरे सेभी ठहरावरे तिहारां केरे बारे मां भी तैन्ना मेरे कानूने ते विधन मन्न, ते मेरे आरामेरे दिहाड़े पवित्र मन्न। तैना कोन्ची मैन्हेरी लाशी कां भी न गान कि तैना अशुद्ध भोइ गान; सिर्फ अम्मा-बाजी मट्ठां-कुइयां; ढ्ला ते एरी बेइनरे वजाई सेइं ज़ैसारो ड्लाह न भोए भोवरो, तैना अपनो आप अशुद्ध केरि सकतन। ज़ैखन तैना अशुद्ध भोइ गान, तैखन तैन केरे लेई सत दिहाड़े गने गान ते तैखन तैना शुद्ध ठहरन, ते ज़ैस दिहाड़े तैना पवित्र ठारी मतलब एंत्रीं अंगने मां सेवा केरनेरे लेई गांनेरे लेई दाखल भोन, तैस दिहाड़े अपने लेई पापबलि च़ाढ़न, परमेशर यहोवा एन ज़ोते।
“तैन केरो अक्के अपनो हिस्सो भोल्हो, मतलब तैन केरो हिस्सो सिर्फ अव्वें भोल्हो; तुसां तैन इस्राएली लोकन मां कोई ज़मीनरो हिस्सो न देइयथ, ज़ै तैन केरो अपनो भोए; तैन केरो खास हिस्सो अव्वें आईं। तैना अन्नबलि, पापबलि ते दोषबलि खाते रान; ते इस्राएले मां ज़ै चीज़ अर्पण की गाए तै तैन मैलती राए। ते सेभी किसमेरी सेभन करां पेइली फसल ते हर किसमेरी अर्पण कियोरी चीज़ां ज़ैना तुसां सल्हतां च़ढ़तल च़ाढ़तथ, तैना याजकन मैल्हती रान; ते नंव्वे अन्नेरू पेइलू सन्नोरू अट्टू भी याजके देंते रेइयथ, ज़ैस सेइं तुश्शे घरे मां बरकत भोए।3 ज़ैन किछ अपने आप मरेरू भोए या कोन्ची होरि जानबरे मारोरू भोए चाए तैन या च़ुड़ोलोवं या जानबर तैसेरू मास याजक न खाए।
Source notes (3)
- Cross-reference प्रका. 15:8.
- Cross-reference यहे. 1:28.
- Cross-reference व्यव. 26:10.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.