Bhadrawahi Bible
यहेजकेल 22
यरूशलेमेरो पाप
किछ वक्तेरां बाद यहोवाए मीं सेइं ज़ोवं, “ओ नाश भोने बाला मैन्हु, कुन तू तैस खूनी यरूशलेम नगरेरो न्याय न केरेलो? कुन तू तैसेरो न्याय न केरेलो? तैस तैसेरे सारे भिट्टे कम्मां केरे बारे मां ज़ोई दे, कि परमेशर यहोवा एन ज़ोते: हे नगरी तू अपने मझ़ाटे खून केरतिस ज़ैस सेइं तेरो वक्त एज्जे, ते अपने नुक्सानेरे लेई ते अशुद्ध भोनेरे लेई मूरती बनातिस। ज़ै खून तीं कियोरोए, तैस सेइं तू दोषी भोइ, ते ज़ैना मूरती तीं बनेवरिन, तैन केरे वजाई सेइं तू अशुद्ध भोवरिस; तीं अपने अन्तेरे दिहाड़े नेड़े पुज़ाए, ते अपने आखरी सालन तगर पुज़्ज़ी जेई। एल्हेरेलेइ मीं तू कौमन मां बेइज़्ज़त ते सैरी मुल्खां केरे लेई मज़ाक बनाई। हे बेइज़्ज़त ते बड़े हंगामे सेइं भेरतां नगरी, नेड़ेरे ते दूरेरे सारे लोक तेरी हासी बनाले।
“हेर, इस्राएलेरे प्रधान एपनी-एपनी ताकतरे मुताबिक तुसन मां खून केरनेबाले भेवरेन। तीं मां लोकेईं अपने अम्मा बाजी केरि इज़्ज़त न की, ते तीं परदेशी लोकन पुड़ ज़ुलम कियो; ते अनाथ ते विधवा कौन्शन सेइं बुरो बर्ताव कियो। तीं मेरे भवनेरी पवित्र चीज़ां घटिया सेमझ़ी, ते मेरी थैकरी दिहाड़ी अपवित्र कियोरीए। तीं मां लुच्चे लोक खून केरनेरे लेई तियार भोए, ते तेरे किछ लोकेईं पहाड़न पुड़ बलि मूरती केरे लेई कियोरू मास खावं, तीं मां महापाप कियो जेव। तीं मां लोक अपने बाजी केरे कौन्शी सेइं व्यभिचार केरतन; तीं मां लोकेईं मासिक धर्मेरे दौरान जिसमानी रिश्तो बनाव। तीं मां किछ लोकेईं अपने पड़ोसेरे कौन्शी सेइं कुकर्म कियो; ते कोन्चे अपने नुश्शी सेइं कुकर्म केरतां महापाप कियो; ते तीं मां किछ लोकेईं एपनी बेबानी बेइनरी इज़्ज़त लुट्टी। तीं मां खून केरनेरे लेई तैनेईं रिश्पत खाई, तीं ब्याज़ ते सूत नियूं, ते अपने पड़ोसी लोकन पुड़ ज़ुलम केरतां फैइदो उठाव, ते तीं अवं बिसरो, प्रभु यहोवा एन ज़ोते।
“एल्हेरेलेइ हेर, ज़ै फैइदो तीं ज़ुलम केरतां उठेवरोए ते अपने लोकन मां खून कियोरोए, तैस्से क्रोधे मां हथ्थे पुड़ हथ मारोरोए। ज़ैन दिहाड़न मां अवं तेरो न्याय केरेलो, कुन तैन दिहाड़न मां तेरो मन मज़बूत ते तेरे हथ मज़बूत रेई सकेले? मीं यहोवा एन ज़ोवरूए, ते अवं एन्च़रे केरेलो। अवं तेरे लोकन कौमन-कौमन मां तितर-बितर केरेलो, ते मुल्खे-मुल्खे मां छेकतां छ़डेलो, ते तेरी अशुद्धता तीं मरां नाश केरेलो। तू कौमां केरे सामने एपनी नज़री मां अपवित्र ठहरेली; तैखन तीं पतो लग्गेलो कि अवं यहोवा आईं।”
परमेशरेरे क्रोधेरी अग
फिरी यहोवाए मीं सेइं ज़ोवं, “ओ नाश भोने बाला मैन्हु, इस्राएलेरो घरानो मेरी नज़री मां धातरो मैल बनोरोए; तैना सारे भठ्ठे मां पितल ते राँगे धात ते लोंहेरे ते शीशेरे ज़ेरे बनोरेन; तैना चैंदरे मेलेरे बराबर भोइ जेवरेन। एल्हेरेलेइ प्रभु यहोवा एन ज़ोते: एल्हेरेलेइ कि तुसां सारे कि सारे धातरो मेल बेनि जेवरेथ। एल्हेरेलेइ हेरा, अवं तुसन यरूशलेम नगरे मां अकोट्ठे केरनेबालो आईं। ज़ेन्च़रे लोक चाँदी, पितल, लोंह, शीशो, ते राँगो, एल्हेरेलेइ भेट्ठी मां अकोट्ठे केरतां रखोरेन कि तैन अग्गी मां गर्म केरतां गालन, तेन्च़रे अवं तुसन अपने क्रोधेरी जलजलाहटी मां यरूशलेम नगरे मां अकोट्ठे केरतां गालेलो। अवं तुसन अकोट्ठे केरतां तुसन अपने क्रोधेरी अग्गी मां एरे फुकेलो, कि तुस तैस मां गेली गाले। ज़ेन्च़रे चाँदी भेट्ठी मां गाली गाचे, तेन्च़रे तुसां सारे तैस अग्गी मां गालनेथ; तैखन तुसन पतो च़लेलो कि ज़ैनी असन पुड़ अपनि जलजलाहट भड़केवरीए, तै यहोवाए।”
इस्राएलेरे प्रधाना केरो पाप
फिरी यहोवाए मीं सेइं ज़ोवं, “ओ नाश भोने बाला मैन्हु, इस्राएल मुल्खे सेइं ज़ो, तू एरहो मुल्ख आस ज़ै शुद्ध नईं भोवरो, ते क्रोधेरे दिहाड़न तीं पुड़ झ़ड़ी नईं भोवरी; तैसेरे नेबेईं तीं मां बगावतरी साज़िश कियोरीए, तैनेईं गरज़ने बालेरे शेरेरो ज़ेरो शिकार ट्लाव ते लोक खेवरेन, एन्च़रे रखोरे कीमती धने थसोड़तन; ते तीं मां बेड़ि कौन्शां विधवा बनेई गैली। तैसेरे याजकेईं मेरे कानूनेरो मतलब खिच्ची-खिच्ची लेवरोए, मेरी पवित्र चीज़ां अपवित्र की; तैनेईं पवित्र ते अपवित्र चीज़न मां फर्क न मन्नो, ते न होरन शुद्ध-अशुद्धेरो भेद शिखालो, ते तैना मेरे आरामेरे दिहाड़ां केरे बारे मां बे फिक्र रहतन, ज़ैस सेइं मेरी आदर न भोए। इस्राएलेरे प्रधान गिद्दां केरे ज़ेरे शिकार केरतन, ते अन्याये सेइं फैइदो उठानेरे लेई खून केरतन ते मैन्हु केरो कत्ल केरने पुड़ खड़े रहतन।1 तैसेरे नबी तैन केरे लेई कच़्च़ी सुफेदी केरतन, तैन केरू दर्शन झूठू आहे; यहोवारे ज़ोने बगैर भी तैना इन ज़ोइतां झूठी नबूवत केरतन कि ‘प्रभु यहोवा इन ज़ोते।’ इड़ी तगर कि मुल्खेरे आम लोक भी ज़ुलम केरतन होरि केरू धन लुटतन, तैना गरीब लोकन पुड़ ज़ुलम केरतन, ते न्यायेरो फिक्र केरतां शैरतां परदेशी लोकन सेइं ज़ुलम केरतन। मीं तैन मरां एरहो मैन्हु तोपनो चाव, ज़ै बाड़े सुधारे ते मुल्खेरे लेई नाके पुड़ एरहो खड़ो राए कि मीं तै नाश न केरनो पे, पन एरहो ज़ेरो कोई न मैल्हो। एल्हेरेलेइ मीं तैन पुड़ अपनो क्रोध भड़कव ते अपने सरकरी अग्गी सेइं तैना भस्म केरि छ़डे, मीं तैन्न तैन केरे बुरे कम्मां केरे मुताबिक तैन सज़ाह दित्ती, परमेशर यहोवा एन ज़ोते।”2
Source notes (2)
- Cross-reference सप. 3:3.
- Cross-reference यहे. 11:21;9:10.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.