Bhadrawahi Bible
निर्गमन 28
याजकां केरां पवित्र लिगड़ां
“फिरी तू इस्राएली लोकन मरां अपने ढ्ला हारून, नादाब, अबीहू, एलीआजर ते ईतामार नव्वेंरे तैसेरे मट्ठन एप्पु कां ऐन्हां कि तैना मेरे लेई याजकेरू कम केरन। ते तू अपने ढ्ला हारूनेरे लेई शानदार ते शोभारे लेई पवित्र लिगड़ां बनावेइयां। ते ज़ेत्रां केरे दिले मां अक्ले, ते ज़ैना मीं अक्ल देनेबाली आत्मा सेइं भरपूर कियोरेन, तैन तू हारूनेरे लेई लिगड़ां बनानेरो हुक्म दे, कि तैना मेरे सामने याजकेरू कम केरनेरे लेई पवित्र बन्न। ते ज़ैना लिगड़ां तैनेईं बनाना भोल्हां तैना इना आन, मतलब सिनाबन्द ते एपोद, ते बागा, ते च़ेवर खाने बालो अंगरखो, याजकेरो टोप, ते कमरबन्ध, इन्ना पवित्र लिगड़ां तेरे ढ्ला हारून ते तैसेरे मट्ठां केरे लेई बनां गान कि तैना मेरे लेई याजकेरू कम केरन। ते तैना सोन्ने ते नीले ते बैंगनी ते लाल रंगेरे ते सूक्ष्म सनेरो कपड़ो आन्न।
एपोद ते पटको
“तैना एपोदे सोन्ने, नीले, बैंगनी ते लाल रंगे बट्टोरी सूक्ष्म सनेरो कपड़ो बनान, ज़ैन कि रोड़ेच़ारे कढ़ेईयेरू कम केरनेबालेरे हथ्थेरू कम भोए। ते तैन इस तरीके सेइं ज़ोड़ू गाए, कि तैसेरे दूईये कूने एप्पु मांमेइं मिलोरे रान। ते एपोदे पुड़ ज़ै कढ़ाई कियोरो पटको भोल्हो, तैसेरी बनावट तैसेरी ज़ेरि भोए, ते तैना दूईये बगैर ज़ोड़ेरे भोन, ते सोन्ने, ते नीले बैंगनी ते लाल रंगेबाले ते बट्टोरी सूक्ष्म सनेरे कपड़ेरी भोन। फिरी दूई सुलैमानी मणि एन्हतां तैन पुड़ इस्राएलेरे मट्ठां केरां नंव्वां घड़ेइयां। तैन केरे नंव्वन मरां शा त अक मेणि पुड़, ते बाकी शा, नव्वां होरि मेणि पुड़, इस्राएली केरे मट्ठां केरे ज़रमनेरे मुताबिक घड़ेइयां। मणि गढ़ने बालेरे कम्मेरे ज़ेरे ज़ेन्च़रे छाप घड़ी गाचे, तेरही तैन दूई मेणिन पुड़ इस्राएली केरे मट्ठां केरां नव्वां; ते तैना सोन्नेरे खानन मां ज़ोड़ां। ते दूईये मेणिन एपोदेरे कंधे पुड़ लुवेइयां, तै इस्राएली केरे हमेशा याद करानेबाली मणि राहेली, मतलब हारून तैन केरां नव्वां यहोवारे सामने अपने दूईये कंधन पुड़ याद केरनेरे लेई लेइतां रखन।
“फिरी सोन्नेरे खाने बनावेइयां। ते डोरी केरे ज़ेरे पलेटतां जंजीर शुद्ध सोन्नेरी बनावेइयां, ते पलेटतां तै जंजीरी तैन खानन मां पलैटनी।”
सीनाबन्ध या चपरास
“फिरी न्याय केरनेरे लेई चपरास भी कढ़ाईयरे कम्मे सेइं बनावेइयां, एपोदेरू सामान सोन्नू, ते नीले, बैंगनी ते लाल रंगेरे ते बट्टोरी सूक्ष्म सनेरे कपड़ेरी बनावेइयां। तै च़ेवर कून्न बैली ते दोरही भोए, ते तैसेरी लम्बाई ते चौड़ाई अक-अक ढलाइठ भोए। ते तैस मां च़ेवर किसमां केरि मणि लेइयां। पेइली बारी मां त माणिक्य, पुखराज ते लालड़ी भोए। दूइयोवं बारी मां मरकत, नीलमणि ते हीरा; ट्लेइयोवं बारी मां लशम, सूर्यकांत ते नीलम; ते च़ेवरोवं बारी मां फीरोजा, सुलैमानी मणि ते यशब भोए; एना सब सोन्नेरे खानन मां लाए गान। ते इस्राएलेरे मट्ठां केरां ज़ेत्रां नव्वां केरि गिनतरे ज़िरिये बारहे नव्वां घड़ां 12 गोट्लन मरां एक्की-एकेरू नवं एक्की-एक्की मेणि पुड़ घेड़तां ज़ेरि छाप घड़ी गाचे। फिरी तू चपरासी पुड़ डोरी केरू ज़ेरू बुनोरे शुद्ध सोन्नेरी शंगल बनावेइयां। ते चपरासी मां सोन्नेरी दूई केड़ी लुवेइयां, ते दूईये केड़न इन चपरासेरे दूईने पुड़ बह लुवेइयां। ते सोन्नेरी दूईने बुनोरी दूईये शंगलन तैन दूईने केड़न मां ज़ै चपरासेरे दोग्गन पुड़ भोल्ही लुवेइयां। ते बुनोरी दूईये शंगलां केरे दूईये बाकी च़ोटन दूईये खातन मां पलेटतां एपोदेरे दूईये कंधां केरे बन्धन पुड़ तैन केरे सामने लुवेइयां। फिरी सोन्नेरी दूई होरि केड़ी बनावेइतां चपरासेरे दूईये कून्न पुड़, तैसेरी तैस कोरी पुड़ ज़ै एपोदेरे सामनेरे पासे भोल्ही लुवेइयां। फिरी तैन केरे अलावा सोन्नेरी दूई होरि केड़ी बनावेइतां एपोदेरे दूईये कंधां केरे बन्धन पुड़, बुना तैन केरे सामने ते तैसेरे जोड़े कां एपोद कढ़ाई कियोरे पटके पुड़ लुवेइयां। ते सिनाबन्द एपनी केड़ी केरे ज़िरिये केड़न मां नीले फीते सेइं बन्धो गाए, इस तरीके तै एपोदेरे कढ़ाई कियोरे पटके पुड़ टिकोरी राए, ते सिनाबन्द एपोदे पुड़ेरां घिशके नन्ना। ते ज़ैखन-ज़ैखन हारून पवित्र ठारी मां दाखल भोए, तैखन-तैखन तै न्यायेरो सिनाबन्द अपने दिले पुड़ इस्राएली केरां नव्वां लुवेइतां रखन, ज़ैस सेइं यहोवारे सामने तैन केरि यादगार राए। ते तू न्यायेरी चपरासी मां ऊरीम ते तुम्मीमे1 रेखां, ते ज़ैखन-ज़ैखन हारून यहोवारे सामने दाखल भोए, तैखन-तैखन तै तैसेरे दिले पुड़ भोए; इस तरीके हारून इस्राएली केरे लेई यहोवारो न्याय अपने दिले पुड़ यहोवारे सामने हमेशा लग्गोरो राए।
बाकी याजकां केरां लिगड़ां
“फिरी एपोदेरो चोगो पूरे नीले रंगेरो बनावेइयां। तैन केरि बनावट एरी भोए कि तैसेरे मझ़ाटे क्रोड़ी छ़डनेरे लेई सुराख भोए, ते तैस सुराखेरी चौड़ाई ते बख्तरेरे सुराखेरी ज़ेरि अक बुनोरी कोर भोए कि तै छ़िंदोए नन्ना। ते तैसेरे बुनीयें घेरे मां च़ेवरे पासन नीले, बैंगनी ते लाल रंगेरे कपड़ेरे अनार बनावेइयां, ते तैन केरे मझ़मेइं च़ेवरे पासन सोन्नेरी घेन्टी लुवेइयां। मतलब अक सोन्नेरी घैंटी ते अक अनार, ते फिरी अक सोन्नेरी घैंटी ते अक अनार, एस्से तरीके चोलेरे बुननियें बाले घेरे मां च़ेवरे पासन एरू भोए। ते हारून तैस चोले सेवा केरनेरे मौके लाए, कि ज़ैखन-ज़ैखन तै पवित्र ठारारे नेड़े यहोवारे सामने गाए, या बेइर निस्से, ज़ैखन-ज़ैखन तैसेरो शब्द शुनोरो न लोड़े, नईं त तै मेरि गालो।
“फिरी शुद्ध सोन्नेरी अक पट्टी बनावेइयां, ते ज़ेरि छापी मां तेरे ज़ेरे तैस मां इना लफज़ घड़े गान, ‘मतलब यहोवारे लेई पवित्र।’ ते तैस्से नीले फीते सेइं बेन्धथ; ते तै पेगड़रे सामनेरे हिस्से पुड़ राए। ते तै हारूनेरे कुपाए पुड़ राए, एल्हेरेलेइ इस्राएली ज़ैन किछ पवित्र ठहरान, मतलब ज़ेत्री पवित्र चीज़ां च़ढ़तली मां च़ाढ़न तैन पवित्र चीज़ां केरो दोष हारून छ़ूतो राए, ते तै हमेशा तैसेरे कुपाए पुड़ राए, ज़ैस सेइं यहोवा खुश भोए।
“चोगे सूक्ष्म सनेरे कपड़ेरो च़ेवर खानन बालो बनावेइयां, ते अक पगड़ी भी सूक्ष्म सनरे कपड़ेरी बनावेइयां ते बेलबूटे केरि कढ़ाईयरू कम कियोरे अक मझ़ बन्धने जो भी बनावेइयां। फिरी हारूनेरां मट्ठां केरे लेई भी चोगो ते कमरबन्ध, ते टोपी भी बनावेइयां इना लिगड़ां भी शान ते शोभारे लेई बन्न। अपने ढ्ला हारून ते तैसेरे मट्ठन इनां सब लिगड़ां लुवेइतां ते तैन केरू अभिषेक ते संस्कार केरां, ते तैन पवित्र केरां कि तैना मेरे लेई याजकेरू कम केरन। ते तैन केरे लेई सनेरे कपड़ां केरे ज़ाँघिये बनावेइयां ज़ैस सेइं तैन केरि जान ढकोरी राए, ते तैना लख्खे करां पट्टन तगर भोन। ते ज़ैखन-ज़ैखन हारून या तैसेरां मट्ठां मिलापे बाले तेम्बु मां दाखल भोन, या पवित्र ठारी मां सेवा केरने जो वेदी कां एज्जन तैखन-तैखन तैना तैस ज़ाँघिये लेइतां रखन, एरू न भोए कि तैना पापी ठहरे गान ते मारे गान, इन हारूनेरे लेई ते तैसेरे बाद तैसेरी पीढ़ी केरे लेई भी हमेशारी विधि ठहरे।
Source notes (1)
- Footnote ऊरीम ते तुम्मीमे इना परमेशरेरी मेर्ज़रे बारे मां याजकेरे ज़िरिये इस्तेमाल किये गानी बैली कोन्ची किसमेरी चीज़ां थी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.