Bhadrawahi Bible
निर्गमन 29
याजक पदेरे लेई अभिषेक
“तैन पवित्र केरनेरे लेई ज़ैन कम तीं तैन करां करानू भोल्हु कि तैना मेरे लेई याजकेरू कम केरन, तैना इने: अक बगैर नुक्से बछ़ड़ू ते दूई बगैर नुक्से हुड़ नेने, ते अखमीरी रोट्टी, ते तेले सेइं सन्नोरे अट्टेरे अखमीरे फुलके, ते तेले सेइं च़ोपड़ोरे अखमीरे बड़े भी नेइतां, इना सब गेहुं केरे अट्टेरे बनावेइयां। एना एक्की टोकरी मां रेखतां तैस टोकरी तैस बछ़ड़े ते तैना दूईने हुड़न सने मेरे सामने एज्जां। फिरी हारून ते तैसेरां मट्ठां मिलापे बाले तेम्बेरे दारेरे सामने नेइतां पैनी सेइं तैना निहेइयां। तैखन तैना लिगड़ां नेइतां हारूने अंगरखो ते एपोदेरो चोलो लुवेइयां, ते एपोद ते चपरास, ते एपोदेरो बनोरो पटको भी बेन्धा। ते तैसेरे दोग्गे पुड़ पगड़ी भी रेखां, ते पेगड़ी पुड़ पवित्र ताज भी रेखां। तैखन अभिषेकेरो तेल नेइतां तैसेरे दोग्गे पुड़ छ़ेडतां तैसेरू अभिषेक केरां। फिरी तैसेरे मट्ठन भी नेड़े नेइतां तैन चोगे लुवेइयां, ते तैसेरे मतलब हारून ते तैसेरे मट्ठन मझ़ बन्धन ते तैन केरे क्रोड़ी पुड़ टोपी रेखां, ज़ैस सेइं तैसेरे वंशज याजकेरू कम हमेशा केरन1। एस्से तरीके सेइं हारून ते तैसेरे मट्ठां केरू संस्कार केरां।
“तैखन बछ़ड़े मिलापे बाले तेम्बेरे सामने नेइतां एज्जथ, ते हारून ते तैसेरां मट्ठां बछ़ड़ेरे क्रोड़ी पुड़ अपनो-अपनो हथ रखन। तैखन तैस बछ़ड़े यहोवारे सामने मिलापे बाले तेम्बेरे दारे पुड़ बलिदान केरा। ते बछ़ड़ेरे खूने मरां किछ नेइतां अपनि एंगलोई सेइं वेदरे शिंगन पुड़ लेइयां, ते बच़ोरो सब खून वेदरे पाए पुड़ उलटानो। ते ज़ैस चेर्भी सेइं आंट्लां ढेकोरी रेइचन, ते ज़ै झिल्ली कलैज़ेरे बह रहचे, तैन ते दूईये गुर्दां केरि बेइही चेर्भी समेत नेइतां सब वेदी पुड़ फुकां। पन बछ़ड़ेरू मास, ते खाड़ी, ते गोबर, डेरन करां बेइर अग्गी मां फुक्की छ़ेडथ, किजोकि ई पापबलि भोल्ही।
“फिरी अक हुड़ नेइतां, हारून ते तैसेरां मट्ठां तैसेरे क्रोड़ी पुड़ अपनो-अपनो हथ रखन, तैखन तैस हुड़े बलि केरथ, ते तैसेरो खून नेइतां वेदी पुड़ च़ेवरे पासन छिड़कथ। ते तैस हुड़ेरे टुक्ड़े-टुक्ड़े केटतां, ते तैसेरी आंट्लां ते पव धोइतां तैसेरे टुक्ड़े ते क्रोड़ी पुड़ रेखां। तैखन तैस पूरे हुड़े वेदी पुड़ फुकां, तै त यहोवारे लेई होमबलि भोल्ही, ते खुशबू ते यहोवारे लेई हबन भोल्हु।
“फिरी होरि हुड़े नेइयां; हारून ते तैसेरां मट्ठां तैसेरे दोग्गे पुड़ अपने-अपने हथ रखन, तैखन तैस हुड़े बलि केरां, ते तैसेरे खूने मरां किछ नेइतां हारून ते तैसेरां मट्ठां केरे देइने कन्ने पुड़, ते तैन केरे देइने हथ्थे ते पव्वेरे नोठन पुड़ लेइयां, ते खूने वेदी पुड़ च़ेवरे पासन छ़िड़कां। फिरी वेदी पुड़ेरे खूने, ते अभिषेकेरो तेल, इन दूईयन मरां किछ-किछ नेइतां हारून ते तैसेरे लिगड़न पुड़, ते तैसेरे मट्ठन ते तैन केरे लिगड़न पुड़ भी छिड़कथ; तैखन तैना अपना लिगड़न समेत ते तैसेरां मट्ठां भी अपने-अपने लिगड़न समेत पवित्र भोइ गान। तैखन हुड़े संस्कारे बालो बुझ़तां तैस मरां किछ चर्भी ते मोट्टू पौंछ़ड़, ते ज़ैस चेर्भी सेइं एंट्लोड़ी ढेकोरी रेइचन तैस, ते कलैज़े पुड़ेरी झिल्ली, ते चेर्भी समेत दूईये गुर्दे, ते देइनी ज़ंघ नेइयथ। ते अखमीरी रोट्टरी टोकरी ज़ै यहोवारे सामने रख्खोरी भोल्ही तैस मरां भी अक रोट्टी, ते तेले सेइं सन्नोरे अट्टेरो अक फुलको, ते अक बड़ो नेइतां, इन सेब्भन हारून ते तैसेरे मट्ठां केरे हथ्थे मां रेखतां हिलाई गानेबाली भेंट ठहरेइतां यहोवारे सामने हिलेइ गान। तैखन तैना चीज़ां तैन केरे हथ्थन मरां नेइतां होमबलि च़ाढ़नेरि वेदी पुड़ फुक्की छ़डां, ज़ैस सेइं तै यहोवारे सामने खुश केरनेबाली खुशबूदार खुशबू भोए, ते तैन यहोवारे लेई हबन भोल्हु।
“फिरी हारूनेरे संस्कारेरो ज़ै हुड़ भोल्हो तैसेरी छाती नेइतां हिलाई गानेरी च़ढ़तलरे लेई यहोवारे सामने हिलेइयां, ते तै तेरो हिस्सो भोनोए। ते हारून ते तैसेरे मट्ठां केरे संस्कारेरे ज़ैना हुड़ भोल्हे, तैस मरां हिलाई गानेरी च़ढ़तली बाली छाती ज़ै हिलाई गानीए, ते सल्ली गानेबाली भेंट ज़ंघन समेत सल्ली गानीए, एन दूईने पवित्र ठहरेइयां। ते इना हमेशारी विधि ते रीति पुड़ इस्राएली केरे तरफां हारून ते तैसेरे मट्ठां केरो हिस्सो भोल्हो, किजोकि ऐह सल्ली गानेबाली च़ढ़तल ठहरेवरीए, ते ऐह इस्राएली लोकां केरे तरफां तैन केरि मेलबेलन मरां यहोवारे लेई सल्ली गानेबाली च़ढ़तल भोल्ही।
“हारूनेरां ज़ैना पवित्र लिगड़ां भोल्हां तैना तैसेरे बाद तैसेरे पोट्लड़न मैलतां रान, ज़ैस सेइं तैन लेइतां तैन केरू अभिषेक ते संस्कार कियूं गाए। तैसेरे मट्ठां केरि जगाई पुड़ ज़ै याजक भोल्हो, तै ज़ैखन पवित्र ठारी मां सेवा केरने लेई मिलापे बाले तेम्बु मां पेइलो एज्जेलो, तैखन तैना लिगड़ां सत दिहाड़न तगर लग्गोरां रखन।
“फिरी याजकेरे संस्कारेरो ज़ै हुड़ भोल्हो तैस नेइतां तैसेरू मास कोन्ची पवित्र ठारी मां पकेइयथ; तैखन हारून अपने मट्ठन समेत तैस हुड़ेरू मास ते टोकरारी रोट्टी, दूईये मिलापे बाले तेम्बेरे दारे पुड़ खाए। ज़ैन चीज़न सेइं तैन केरू संस्कार ते तैन पवित्र केरनेरे लेई प्रायश्चित कियूं गालू तैन तैना खान, पन होरि कुलेरो कोई तैन न खाए, किजोकि तैना पवित्रन। अगर संस्कार बाले मासे या रोट्टी मरां किछ झ़ेझ़ां तगर बच़ेरू राए, त तैस बच़ोरे अग्गी मां फुकथ, ते खाव न गाए, किजोकि तैन पवित्र भोल्हु।
“मीं तीं ज़ैना हुक्म दित्तोरेन, तैन सेब्भी केरे मुताबिक तू हारून ते तैसेरे मट्ठन सेइं केरां, ते सत दिहाड़न तगर तैन केरू संस्कार केरतो रेइयां। मतलब पापबेलरू अक बछ़ड़ू प्रायश्चतरे लेई रोज़ च़ैढ़ां। ते वेदी भी प्रायश्चित केरनेरे मौके शुद्ध केरां, ते तैस पवित्र केरनेरे लेई तैसेरू अभिषेक केरां। सत दिहाड़न तगर वेदी केरे लेई प्रायश्चित केरतां तैस पवित्र केरां ते वेदी परमपवित्र ठहरेली; ते ज़ैन किछ तैस सेइं हुरेलू तैन भी पवित्र भोइ गालू।
रोज़ेरी भेंट
“ज़ैन तीं वेदी पुड़ रोज़ च़ाढ़नू भोल्हु तैन इन आहे, मतलब रोज़ एक्की-एक्की सालेरां दूई गबड़ां। अक गबड़ू त झ़ेझ़ेरे वक्ते, ते अक ड्लोझ़रे मौके च़ाढ़नू। ते एक्की गबड़े सेइं साथी मैदेरो च़ेवरोवं हिस्सो झ़ुसतां कढोरे तेले2 सेइं सन्नोरे एपारो दशोवं हिस्सो मैदो, ते पीनेरी च़ढ़तलरे लेई च़ेवरोवं हिस्सो दाछ़रो रस देइयथ। ते होरू गबड़ू ड्लवझ़रे मौके च़ाढ़नू, ते तैस सेइं साथी झ़ेझ़ेरे रीतरे मुताबिक अन्नबलि ते पीनेरी च़ढ़तल दूईये देनी, ज़ैस सेइं तै खुशबूदार ते यहोवारे लेई हबन भोए। तुश्शी पीढ़ी करां पीढ़ी तगर यहोवारे सामने मिलापे बाले तेम्बेरे दारे पुड़ हमेशारी होमबलि भोती राए, ई तै जगाई ज़ैस मां अवं तुसन लोकन सेइं एल्हेरेलेइ मिलतो रेईं कि तुसन सेइं गल्लां केरि अवं इस्राएली लोकन सेइं तैड़ी मिलतो रालो, ते तै तेम्बु मेरे तेजे सेइं पवित्र कियो गाए। ते अवं मिलापे बाले तेम्बु ते वेदी पवित्र केरेलो, ते हारून ते तैसेरे मट्ठन भी पवित्र केरेलो कि तैना मेरे लेई याजकेरू कम केरन। ते अवं इस्राएली केरे दरमियान एइतो रालो, ते अवं तैन केरो परमेशर भोनोईं। तैखन तैन्न पतो लग्गेलो कि अवं तैन केरो यहोवा परमेशर आईं, ज़ैने तैना मिस्र मुल्खेरां एल्हेरेलेइ केढतां आनोरेन, कि तैन केरे दरमियाने मां एइतां बिश्शी, अव्वें तैन केरो परमेशर यहोवा आईं।
Source notes (2)
- Footnote वंशज याजकेरू कम हमेशा केरन हमेशारे हुक्मेरे मुताबिक याजक पदे पुड़ हमेशारू तैन केरू हक राए।
- Footnote कढोरे तेले लगभग अक किल्लो ज़ैतूने तेल।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.