Bhadrawahi Bible
एस्तेर 2
एस्तेर महा रानी बनाई गानी
किछ वक्तेरां बाद ज़ैखन क्षयर्ष राज़ेरो क्रोध ठंडो भोव, त तैखन तैनी वशती रानी ते ज़ैन कम तैसां कियोरू थियूं, ते तैसेरे बारे मां ज़ै हुक्म दित्तोरो थियो तै याद कियो। तैखन राज़ेरे खास सेवक ज़ोने लगे, “राज़ेरे लेई खूबसूरत ते जुवान कुइयां तोप्पी गान। ते राज़े अपने राज़ेरे सैरी सूबन मां लोक एल्हेरेलेइ च़ुने कि सैरी खूबसूरत कुइयां शूशन राज़गढ़े मां रनवासे मां अकोट्ठी केरन ते कौन्शां केरे लेई इंतज़ाम केरनेबाले हेगे, ज़ै राज़ेरो खोजो थियो सौंफी देन। ते तैन शुद्ध केरनेरे काबल चीज़ां दित्ती गान। तैखन तैन मरां ज़ै कुई राज़े पसंद एज्जे, तै वशती रैनरी ठैरी महा रानी बनाई गाए।” ऐह गल राज़े पसंद आईं ते तैनी तैन्ने कियूं।
तैस दौरान शूशन राज़गढ़े मां मोर्दकै नंव्वेरो अक यहूदी रहतो थियो, ज़ैन कीश नंव्वेरे एक्की बिन्यामीनी मैन्हेरू पड़पोट्लड़ू, ते शिमीएरो पोट्लड़ू, ते याईर एरू मट्ठू थियूं। तै तैन गुलामन सेइं साथी यरूशलेम नगरे मरां गुलैमी मां जेवरो थियो, ज़ैना बाबेलेरे राज़े नबूकदनेस्सरे, यहूदारे राज़े यकोन्याह सेइं साथी गुलाम बनेइतां नेवरे थिये। तैनी हदास्सा नंव्वेरी चाचेरी कुई, ज़ैस जो एस्तेर भी ज़ोते थिये, पालोरी थी। किजोकि तैसारे अम्मा बाजी मेरि जेवरे थिये, ते तै कुई बड़ी खूबसूरत ते तैसारू रूप बड़ू रोड़ू थियूं, ते ज़ैखन तैसारे अम्मा बाजी मेरि जेवरे थिये, तैखन मोर्दकै तै अपनि कुई केरतां पालोरी थी। ज़ैखन राज़ेरो हुक्म ते नियम शुनाए जे, ते बेड़ि जुवान कौन्शां, राज़ेरे शूशन क़िले मां हेगेरे अधिकारे मां अकोट्ठी की, तैखन एस्तेर भी राज़ेरे मेहले मां कौन्शां केरे लेई इंतज़ाम केरनेबाले हेगेरे अधिकारे मां सौंफी जेई। तै कुई हेगे रोड़ी लग्गी; ते तै तैस पुड़ खुशी भोव, ते तैस बगैर च़िर लेइतां राज़ेरे मेहले मां सब सज़नेरी ते तियार भोनेरी चीज़ां, ते तैसारे खानेरो इंतज़ाम, ते तैसारे लेई सत च़ुनोरी कम केरनेबैली भी दित्ती, ते तैस ते तैसारी सहेली अक रनवासे मां सेभन करां रोड़ी ठार भी दित्ती। एस्तेरां न अपनि कौम कोन्ची सेइं ज़ोवरी थी, ते न अपनो कुल। किजोकि मोर्दकै तैस हुक्म दित्तोरो थियो, कि अपनि कौम न ज़ोए। मोर्दकै त रोज़ रनवासेरे अंगने मां हंठतो थियो, ताके तैस पतो लग्गे कि एस्तेर केरही आहे ते तैस सेइं कुन भोइ राहोरूए?
ज़ैखन एक्की-एक्की कुइयरी बारी आई, कि तै क्षयर्ष राज़े कां गाए, ते इन तैस वक्त भोवं ज़ैखन तैस सेइं साथी कौन्शां केरे ठहरावरे नियमां केरे मुताबिक 12 महीन्न तगर बर्ताव कियोरो थियो। मतलब तैन केरे शुद्ध केरनेरी खुशबूदार चीज़ां, ते कौन्शां केरे शुद्ध केरनेरे दिहाड़े इस तरीके सेइं बीती जे, कि शा महीन्न तगर गन्धरसेरो तेल लव गातो थियो, ते शा महीन्न तगर खुशबूदार चीज़ां ते कौन्शां केरू शुद्ध केरनेरू बाकी सामान लवं गातू थियूं। एस तरीके सेइं ज़ैखन तै कुई राज़े कां गाती थी, तैखन ज़ैन किछ तै कुई चाती थी कि रनवासे मरां मेहले ने, तैस दित्तू गातू थियूं। तै ड्लवझ़ां गाती थी ते होरसां झ़ेझ़ां वापस एइती थी, ते वापस एइतां रनवासेरे होरी घरे मां गेइतां रखैलां केरे अधिकारी राज़ेरे खोजे शाशगजेरे अधिकारे मां भोइ गाती थी, ते फिरी राज़े कां न थी गाती। अगर तै राज़े खुशी एइती थी, त नवं ज़ोइतां तै कुजाई गाती थी।
ज़ैखन मोर्दकैरे चाचे अबीहैलेरी कुई एस्तेर, ज़ै मोर्दकै अपनि कुई केरतां पालोरी थी, तैसारी बारी अई कि तै राज़े कां गाए, तैखन कौन्शां केरे लेई इंतज़ाम केरनेबाले राज़ेरे खोजे हेगे तैसारे लेई रखोरू थियूं, तैस करां जादे तैसां होरू किछ न मग्गु। ज़ेत्रे लोकेईं एस्तेर लाही, तैना सब तैस हेरतां खुशी भोए। एस्तेर राज़ेरे मेहले मां क्षयर्ष राज़ेरे राज़ केरनेरे सत्तोवं सालेरे तेबेत नंव्वेरे दशोवं महीने मां पुज़ाई जेई। ते राज़े एस्तेरी सेइं बाकी सेभी कौन्शन करां जादे प्यार कियो, ते बाकी सब कुइयन करां जादे तैसेरे सिद्धी नज़र तैस्से पुड़ भोइ, इस वजाई सेइं तैने तैसेरे दोग्गे पुड़ राज़मुकुट रख्खू ते तै वशती एरे ठैरी पुड़ रानी बनाई। तैखन राज़े अपने सेभी हाकिमन ते अधिकैरन अक बड़ी धाम दित्ती, ते तैस जो एस्तेर रैनरी धाम ज़ोवं। ते सूबन मां छुट्टी दुवाई1, ते तैनी अपने खुले दिले सेइं इनामां भी बन्टां। ज़ैखन कुइयां होरी फेरे अकोट्ठी कीजेई, तैखन मोर्दकै2 राज़ेरे मेहलेरे फाटके पुड़ बिशोरो थियो। एस्तेरां अपनि कौम ते कुलेरे बारे मां न थियूं ज़ोवरू, किजोकि मोर्दकै तैस हुक्म दित्तोरो थियो, कि तै न ज़ोए। ते एस्तेर मोर्दकैरी गल मनती थी, ज़ेन्च़रे कि तै अपने पालन पोशन केरनेरे मौके मनती थी। तैन्ने दिहाड़न मां ज़ैखन मोर्दकै राज़ेरे मेहलेरे फाटके पुड़ बिशतो थियो, तैखन राज़े ज़ैना खोजे मेहलेरे फाटकेरे पहरदार भी थिये, तैन मरां बिगताना ते तेरेश नंव्वेरे दूई ज़नेईं क्षयर्ष राज़े सेइं रूशतां तैस मारनेरी योजना बनाई। पन ज़ैखन मोर्दकै तैस गल्लरो पतो लग्गो, ते तैनी एस्तेर रैनी सेइं तै गल शुनाई, ते एस्तेर मोर्दकैरू नवं घिन्तां राज़े सेइं ज़ोवं। तैखन शाही दस्तावेज़न मां जांच पड़ताल केरने पुड़ पतो लग्गो कि ऐह गल सच़्च़े त तैना दूईये खोजे बुट्टे पुड़ टंगे, ते इस बारे मां राज़ेरे सामने इतिहासेरे किताबी मां लिखू जेवं।
Source notes (2)
- Footnote छुट्टी दुवाई मतलब प्रदेशे मां टेकसे करां छूट दुवाई
- Footnote मोर्दकै मोर्दकै शाही आदालतरो अक अधिकारी थियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.