Bhadrawahi Bible
एस्तेर 1
वशती रानी पटरानी भोनेरे दर्जे करां हटाई गानी
क्षयर्ष नंव्वेरे राज़ेरे राज़ केरनेरे दिहाड़न मां एना गल्लां भोइ: ऐह तैए क्षयर्ष राज़ोए, ज़ै भारते करां लेइतां कूश1 मुल्खे तगर 127 सूबन पुड़ राज़ केरतो थियो। तैन्ने दिहाड़न मां ज़ैखन क्षयर्ष राज़ो शूशन क़िले मरां राज़ केरतो थियो। तैड़ी तैनी अपने राज़ केरनेरे ट्लेइयोवं साले मां अपने सारे हाकिमन ते अधिकैरन धाम दित्ती। फारस ते मादै मुल्ख सेनापति ते सूबां-सूबां केरे प्रधान ते हाकिम तैसेरे सामने हज़ार भोए। तै तैन्न 180 दिहाड़न तगर अपने हुकूमतरी शान-ओ-शोकत ते बेड़ी कीमती चीज़ां हिरातो राव। एना धांमरे दिहाड़े बीतनेरे बाद भी तैनी सारे लोक ज़ैना शूशन नंव्वेरे राज़गढ़े मां अकोट्ठे भोवरे थिये धाम दित्ती, ऐह धाम शूशन मेहलेरे बागरे अंगने मां सत दिहाड़े च़लती राई। तैट्ठेरे पड़दे छ़ित्ते ते नीले सूट्लेरे थिये, ते सन ते बैंगनी रंगेरी डोरन सेइं चैंदरे छल्लन मां, संगमरमरेरे खम्भन सेइं लगोरे थिये; ते तैट्ठेरे तखत सोन्ने-चैंदरे थिये, ते लाल ते छ़ित्ते ते हेइढ्ले ते काले संगमरमरेरे बनोरे फर्शे पुड़ रखोरो थिये। तैस धामी मां शाही शराब अलग-अलग किसमेरे सोन्नेरे भांडन मां छ़ेडतां राज़ेरे महरबान भोनेरे वजाई सेइं खुल्ले दिले सेइं पियाई गाती थी। राज़े अपने भवनेरे सेभी भण्डेरन हुक्म दित्तोरो थियो, कि कोन्ची शराब पीने पुड़ मजबूर न केरथ। पन कानूनेरे मुताबिक हर कोई मेहमान अपने मेर्ज़रे मुताबिक ज़ेत्रो पीनो चाते पी सखते। तैस वक्ते वशती रैना भी अपने राज़े क्षयर्षेरे मेहले मां कौन्शन भी धाम दित्ती।
धांमरे सत्तोवं दिहाड़े ज़ैखन राज़ेरो मन शराब पीतां मसत थियो, तैखन तैनी महूमान, बिजता, हर्बोना, बिगता, अबगता, जेतेर ते कर्कस नंव्वेरे सत्ते खोजन हुक्म दित्तो, ज़ैना क्षयर्ष राज़ेरे सामने सेवा केरते थिये, कि वशती रैनी राज़मुकुट लुवेइतां राज़ेरे सामने हाज़र केरा। ज़ैस सेइं कि एवरे लोकन ते हाकिमन पुड़ तैसारी खूबसूरती बांदी भोए। किजोकि तै हेरनी बड़ी खूबसूरत थी। पन खोजां केरे ज़िरिये राज़ेरो तै हुक्म मैलतां वशती रैना एजनेरे लेई इन्कार कियो। ज़ैखन राज़े एस गल्लरो पतो लग्गो तैखन राज़े बड़ी सरक अई।
तैखन राज़े वक्ते-वक्तेरो भेद ज़ान्ने बाले पंडतन करां पुछ़ू, (राज़ो त कानून ते न्यायेरे सारे ज्ञानी लोकन सेइं एन्च़रे केरतो थियो। तैस कां कर्शना, शेतार, अदमाता, तर्शीश, मेरेस, मर्सना ते ममूकान नंव्वेरे, फारस ते मादै मुल्खेरे सत प्रधान थिये, तैना राज़ेरू दर्शन केरते, ते हुकूमतरे खास-खास ओधन पुड़ च़ुनोरे थिये।) राज़े पुछ़ू, “वशती रैनां क्षयर्षेरो खोजां केरे ज़िरिये दित्तोरो हुक्म ट्लोड़ोरोए, त कानूनेरे मुताबिक तैस सेइं कुन कियूं गाए?” तैखन ममूकाने राज़े ते हाकिमां केरे सामने जुवाब दित्तो, “वशती रैना ज़ैन गलत कम कियोरूए, तैन सिर्फ राज़ेरे लेई नईं बल्के सेभी हाकिमां केरे लेई ते सेभी प्रादेशन मां रानेबाले ज़ैना क्षयर्षेरे राज़ेरे सेभी सूबन मां रहतन। किजोकि वशती रैनरी चर्चा सैरी कौन्शन मां भोल्ही ते ज़ैखन एन ज़ोवं गालू, ‘क्षयर्ष राज़े एपनी रैनी वशती अपने सामने एजनेरे लेई हुक्म दित्तो पन तै न आई,’ तैखन तैना भी अपने-अपने मुन्शन घटिया सेमझ़ेली। अज़्ज़ेरे दिहाड़े फारस ते मादी हाकिमां केरि कौन्शां ज़ैनेईं रैनरी ऐह गल शुनोरीए, त तैना भी राज़ेरे हाकिमन सेइं एरहो सलूख केरेली। एन्च़रे सेइं बड़ी नफरत ते क्रोध पैदा भोल्हो। अगर राज़े मन्ज़ूर भोए, ते ऐह हुक्म दे, ज़ै कधे न बेदलोए ते फारसी ते मादी लोकां केरे कानूने मां लिखू भी गाए, कि रानी वशती क्षयर्ष राज़ेरे सामने कधी न एज्जी सखे, ते राज़ो पटरैनरो दर्जो कोन्ची होरी कौन्शी दे ज़ै राज़ेरो हुक्म मन्ने। ते ज़ैखन राज़ेरो ऐह हुक्म सारे राज़े मां शुनाव गालो, तैखन सैरी कौन्शां, अपने-अपने मुन्शां केरि चाहे तै आम भोए, चाए खास भोए इज़्ज़त केरेली।” ऐह गल राज़े ते हाकिमन पसंद आईं ते राज़े ममूकानेरी सलाह मन्नी ते अपने हर एक्की सूबे मां, हर एक्की कौमरे भाषाई ते लिपि मां चिट्ठी भेज़ी, कि सब मड़द अपने-अपने घरे मां अधिकार च़लान, ते अपनि कौमरे भाषा केरतां ज़ोन।
Source notes (1)
- Footnote कूश अज़ इस मुल्खे जो एथोपिया ज़ोतन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.