Bhadrawahi Bible
सभोपदेशक 4:9
Verse 9 is marked below, with the whole chapter around it. Read from the start
मीं फिरी नज़र दित्ती ते मीं तै सारो ज़ुलम लाव ज़ै दुनियाई मां भोतो थियो। मीं तैन केरां ऐंखरू भी लहां ज़ैन पुड़ ज़ुलम भोतो थियो, तैन तसल्ली देनेबालो कोई नईं! ज़ुलम केरनेबालां केरे हथ्थे मां शक्ति थी, पन ज़ैन पुड़ ज़ुलम भोतो थियो तैन तसल्ली देनेबालो कोई न थियो। एल्हेरेलेइ फिरी मीं एरू लग्गू कि ज़ींते लोकन करां जादे मर्रोरे लोक रोड़े आन; ते तैन दूईने करां जादे धन तैए ज़ै पैदा नईं भोवरो, ज़ैनी तै बुराई ज़ै दुनियाई मां भोतीए लाहोरी भी नईं।
खुदगरज़ मेहनत बेकार
तैखन मीं सब मेहनतरां कम्मां ते सब कामयाब कम्मां लहां ज़ैना लोक अपने पड़ोसी सेइं जलनरे वजाई सेइं केरतन। इन भी बेकारे ते हवा ट्लानी आहे।
बेवकूफ अपने छैती पुड़ हथ रेखतां बिश्शी गाते, ते अपने आपे बरबाद केरि देते।
सुखे सेइं अक मुठड़ी तैन दूई मुठड़न करां रोड़ीए, ज़ैन सेइं मेहनत ते हवा ट्लानी भोए।
फिरी मीं ऐह गल दुनियाई मां लाई तै भी बेकारे। कोई अकैल्लो रहते ते तैसेरो कोई नईं; न तैसेरां मट्ठन, न ढ्लाए, त फिरी भी तैसेरे मेहनतरो अन्त न भोए; न तैसेरी एछ़्छ़ी दौलती सेइं रज़्ज़न, ते न तै ज़ोए, अवं केसेरे लेई मेहनत केरताईं ते अपने ज़िन्दगी बगैर सुखे रखताईं? इन भी बेकार ते दुखे सेइं भेरतां कम्मे।
दोस्तेरी कीमत
एक्की करां दूई रोड़ेन, तैन केरि मेहनतरो रोड़ो फल भोते। किजोकि अगर तैन मरां अक बिछ़ड़े, त होरो तैस खड़े केरेलो; पन अफ़सोस तैस पुड़, ज़ै अकैल्लो भोइतां खिरके, ते तैस कोई खड़ो केरनेबालो न भोए। फिरी अगर दूई ज़ने अकोट्ठे झ़ुलतन त तैन निग्घू लग्गेलू, पन अकैल्लो केन्च़रे निग्घो रेइ सकते? अगर कोई अकैल्ले पुड़ हावी भोए त भोए, पन अगर दूई ज़ने भोन तैना तैसेरो सामनो केरि सकेले। ज़ै रस्सी ट्लाई डोरिन सेइं बनाई गातीए तै जल्दी न ट्लुटे।
मुशूर भोतू गानू
अक्लमन्द मट्ठू गरीब भोने पुड़ भी एरे बुढे ते बेवकूफ राज़े करां भी रोड़ूए ज़ै सलाह न मन्ने। चाहे तै तैस रियासती मां धने बगैर पैदा भोवरो भोए या कैदखाने मरां निस्तां राज़ो बनोरो भोए। मीं सारे ज़ींते ज़ेत्रे दुनियाई मां आन लेवरेन ते अवं इन ज़ानताईं कि लोक तैस जुवाने पत्ती च़लतन ते तैए नंव्वो राज़ो बनते। तैना बड़े लोक इस जुवाने पत्ती च़लतन। फिर भी एजने बाले वक्ते मां तैस सेइं लोक खुशी न भोल्हे। इस मां कोई शक नईं ई भी बेकारे ते हवा ट्लानीए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.