Bhadrawahi Bible
सभोपदेशक 5
परमेशरेरो डर मन्नो ते वाधो पूरो केरनो
ज़ैखन तू परमेशरेरे घरे मां गास त ध्याने सेइं अन्तर पव छ़ेडां, शुन्नेरे लेई नेड़े गानू बेवकूफेरे बलिदान च़ाढ़ने करां रोड़ूए; किजोकि तैना न ज़ान्न कि तैना बुरू केरतन। गल्‍लां केरने मां तू लूश न केरां, ते अपने मने मरां टारी गल परमेशरेरे सामने न केढां, किजोकि परमेशर सुर्गे मांए, ते तू धेरती पुड़ आस; एल्हेरेलेइ तेरी गल्‍लां थोड़ी भोन।
किजोकि ज़ेन्च़रे जादे कम्मेरे वजाई सेइं मैन्हु सुपनु हेरते, तेन्च़रे हेछी गल्‍लां केरनेबालो बेवकूफ मन्नो गाते।
ज़ैखन तू परमेशरे कां मिन्नत मन्नस, त तैस पूरी केरने मां च़िर न लेइयां; किजोकि तै बेवकूफन सेइं खुश न भोए। ज़ै मिन्नत तीं मन्नोरी भोए तैस पूरी केरां। मिन्नत मेनतां पूरी न केरनेरां केरतां मिन्नत मन्नोरी न लोड़े। तेरी ज़बान तीं करां पाप न कराए, ते परमेशरेरे दूतेरे सामने एन न ज़ोइयां कि एन गेलती सेइं भोवं; परमेशर तेरी गल शुन्तां किजो नाराज़ भोए, ते तेरे हथ्थां केरे कम्मन बरबाद केरे?
किजोकि हछे सुपना केरि वजाई सेइं हेछी गल्‍लां भोइचन; पन तू परमेशरेरो डर मेन्नां।
हासिल केरनू ते आदर बेकारे
अगर तू कोन्ची इलाके मां गरीबन पुड़ ज़ुलम ते न्याय ते धर्मे बिगाड़तो हेरस, त इस सेइं हैरान न भोइयां; किजोकि एक्‍की अधिकैरी करां बड्डो होरो भोते, ज़ैस इना गल्‍लां केरि खबर रहतीए, ते तैन करां भी होरे बड्डे अधिकारी भोतन। ज़मीनरी पैदावार सेब्भी केरे लेई आहे, बल्के ज़मीनरी पैदावारी सेइं राज़ो भी कम कढते।
ज़ै रुपेइयन सेइं प्यार केरते, तै दौलती सेइं न रज़्ज़ेलो, ते ज़ै दौलती सेइं प्यार केरते, तै दौलत बधने सेइं भी न रज़्ज़े, एन भी बेकारे।
ज़ैखन जाईदात बधतीए त तैसेरे खानेबाले भी बद्धतन, ते तैसेरे मालिके इसेरे अलावा होरो कुन फैइदो भोइ सकते, कि तैस जाईदाती अपने एछ़्छ़न सेइं हेरे?
मेहनत केरनेबालो चाहे तै थोड़ू खाए या जादे, फिर भी तैस निड्ल सुखे सेइं एइतीए। पन अमीरेरी दौलत बधने सेइं तैसेरी निड्ल खतम भोइ गाचे।
मीं दुनियाई मां अक बड़ी बुरी बला लाहोरीए; मतलब तै दौलत ज़ै तैसेरे मालिके अपने नुक्सानेरे लेई जम्हां कियोरी भोए। ते तै दौलत कोन्ची बुरे कम्मे मां उड़ी गातीए; त तैसेरे घरे मां मट्ठू पैदा भोते, पन तैसेरे हथ्थे मां मट्ठे देनेरे लेई किछ भी बाकी न राए। ज़ेन्च़रे तै अपने अम्मरे पेटे मरां नग्गो एइते 1तेन्च़रे वापस नग्गो गालो, ते तैस एपनी कमैई मरां किछ भी हासिल न भोए, ज़ैस तै एप्पु सेइं साथी नेइ सके। ऐह भी अक बड़ी बुरी बला आहे, ज़ेन्च़रे तै अव तेन्च़रे च़लो गालो; तैस बेकार मेहनती सेइं तैस कुन फैइदोए? तै सैरी उमरी आंधरे मां खाते, ते दुख तकलीफरी मुसीबती मां अपने दिहाड़े कटतो रहते।
हेरा, ज़ै रोड़ी गल मीं लाहोरीए, बल्के ज़ै ठीके, तै ई आहे कि मैन्हु खाए ते पीए ते अपने मेहनती सेइं ज़ै तै दुनियाई मां केरते, अपने सारे उमर भर ज़ै परमेशरे तैस दित्तोरीए, सुखी राए किजोकि तैसेरो हिस्सो ईए आहे। बल्के हर अक मैन्हु ज़ैस परमेशरे धन दौलत दित्तोरीए, ते तैस सेइं आनन्द केरने ते अपनो हिस्सो नेइतां एपनी मेहनतरो आनन्द केरनेरी शक्ति भी परमेशरे दित्तोरीए इन परमेशरेरू वरदाने। इस ज़िन्दगरे दिहाड़े तैस बड़े याद राले, किजोकि परमेशर तैसेरी शुनी-शुनी तैसेरे मने खुश रखते।
Source notes (1)
- Footnote नग्गो एइते मतलब कि खाली हथ्थेइं
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.