Bhadrawahi Bible
व्यवस्थाविवरण 24
फारख्ती ते दुबारां ड्लाह
“कोई मड़द कोन्ची कौन्शी सेइं ड्लाह बनाए, ते तैसेरे बाद तैस मां एरी बुराई मैल्हे त तै तैस सेइं खुश न भोए, त तै तैसारे लेई फारख्ती लिखतां तैसारे हथ्थे मां देइतां तैस अपने घरे मरां कढे। ते ज़ैखन तै तैसेरे घरे मरां निस्सी गाए, तैखन होरि मड़दे सेइं ड्लाह बनेई सकतीए। पन अगर तै होरो मड़दे भी तैस न सुखाए, ते तै तैसारे लेई फारख्ती लिखतां तैसेरे हथ्थे मां देइतां तैस अपने घरे मरां कढे, या तै होरो मड़द ज़ैनी तै अपनि कौन्श बनेवरी भोए मेरि गाए, त तैसेरो पेइलो मुन्श, ज़ैनी तै कढोरी भोए, तैसेरे अशुद्ध भोनेरे पत्ती तैस अपनि कौन्श न बनेई सके किजोकि ई यहोवारे सामने भिट्टी गल्ले। एन्च़रां तू तैस मुल्खे पापी न बनेइयां, ज़ैस तेरो परमेशर यहोवा तेरो हिस्सो केरतां तीं देते।
अलग-अलग कानून
“ज़ैस मड़देरो नंव्वो-नंव्वो ड्लाह बनोरो भोए, तै सेनाई सेइं साथी न गाए ते न कोन्ची कम्मेरो भार तैस पुड़ छ़डो गाए; तै पूरे साले अपने घरे मां आज़ाद रेइतां अपनि ड्लाहोरी कौन्शी खुश केरतो राए।
“कोई मैन्हु ढ्लाट या तैसेरे बेइयें ढ्लेइटोल बन्धे न रख्खे; किजोकि तैन त एरू कि जानी बन्धे रखनू भोवं।
अगुवा केरनू
“कोई अपने कोन्ची इस्राएली ढ्लाए गुलाम बनाने या बेच़नेरे खियाले सेइं अगुवा केरतो ट्लाव गाए, त एरहो ज़ेरो च़ोर मारो गाए; एरी बुराई अपने दरमियाने मरां दूर केरां।
“कोढ़ेरो रोगेरे बारे मां हुशार रानू, ते ज़ैन किछ लेवी याजक तुसन शिखालन तैसेरे मुताबिक कोशिश केरने मां एतिहात केरनी; ज़ेरो हुक्म मीं तैन्न दित्तोरोए तेरहु केरने मां एतिहात केरनी। याद रख कि तेरे परमेशर यहोवाए, ज़ैखन तुस मिस्र मुल्खे मरां एज्जी राहोरे थिये, तैखन बत्तां मिर्यामी सेइं कुन कियोरू थियूं।
“ज़ैखन तू अपने कोन्ची ढ्लाए जो किछ ओधार देस, तैखन बन्धे रखनेरी चीज़ आन्नेरे लेई तैसेरे घरे मां न गेइयां। तू बेइर खड़ो रेइयां, ते ज़ैस तू ओधार दे तैए बन्धेरी चीज़ तीं कां बेइर आनेलो। ते अगर तै मैन्हु गरीब भोए, त तैसेरू बन्धू एप्पु कां रेखतां न झ़ुल्लां; दिहाड़ो डुबते-डुबते तैस तैन बन्धू ज़रूर वापस देइयां, एल्हेरेलेइ कि तै अपनि च़ादर पलेटतां झ़ुल्ली सके ते तीं बरकत दे; ते इन तेरे परमेशर यहोवारी नज़री मां धार्मिकतारू कम ठहरेलो।
“कोई मज़दूर ज़ै दीन ते गरीब भोए, चाहे तै तेरे ढ्लान मरां भोए चाहे तेरे मुल्खेरे फाटकां केरे अन्तर रानेबालो कोई परदेशी भोए, तैस पुड़ अंधेर न केरां; इन ज़ैनतां कि तै दीने ते तेरो मन मज़दूरी मां लग्गोरो रहते, मज़दूरी केरनेरे दिहाड़े, दिहाड़ो डुबने करां पेइले तू तैसेरी मज़दूरी देइयां; एरू न भोए कि तै तेरे वजाई सेइं यहोवा परमेशरे कां फरियाद केरे, ते तू पापी भोस।
“मट्ठेरे वजाई सेइं बाजी मारो न गाए, ते न बाजी केरे वजाई सेइं मट्ठू मारू गाए; ज़ैनी पाप कियोरो भोए तैए तैस पापेरे वजाई सेइं मारो गाए।
“कोन्ची परदेशी मैन्हु या अनाथ बच्चेरो अन्याये न केरथ, ते न कोन्ची विधवा कौन्शरां लिगड़न बन्धे रेखां; ते इन याद रखनू कि तू मिस्र मुल्खे मां गुलाम थियो, ते तेरो परमेशर यहोवाए तू तैट्ठां आज़ाद कियो; इस वजाई अवं तीं ई हुक्म देताईं।
“ज़ैखन तू अपने पकोरे उडारे मां फसल कटने गास, ते अक फक्की उडारे मां बिस्रोइतां रेही गाए, त तैस आन्नेरे लेई फिरी वापस न गेइयां; तै परदेशी, अनाथ, ते विधवा कौन्शरे लेई भोए; एल्हेरेलेइ कि परमेशर यहोवा तेरे सब कम्मन मां तीं बरकत दे। ज़ैखन तू अपने ज़ैतूनेरे बुट्टन पुड़ां फल कढस, तैखन डैलड़ी दुबारां न झ़ैड़ां; तैना परदेशी, अनाथ, ते विधवा कौन्शरे लेई राने देइयां। ज़ैखन तू अपनि दाछ़री बागरो फल ट्लोड़स, त तैसेरो दानो-दानो ट्लोड़तां न ऐन्हां; तैना परदेशी, अनाथ ते विधवा कौन्शरे लेई राने देइयां। ते इन याद रखनू कि तू मिस्र मुल्खे मां गुलाम थियो; इस वजाई अवं तीं ई हुक्म देताईं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.