Bhadrawahi Bible
व्यवस्थाविवरण 23
कौन यहोवारे सभाई मां न एज्जी सके
“ज़ेसेरे अण्ड ढ्लेन्च़ोरे या गुपत अंग कट्टोरो भोए तै यहोवारे सभाई मां न एज्जे।
“कोई कुकर्मे सेइं ज़र्मोरो यहोवारे सभाई मां न एज्जे; ते दश पीढ़न तगर तैसेरे खानदाने मरां कोई यहोवारे सभाई मां न एज्जी बटे।
“कोई अम्मोनी या मोआबी कौमन मैन्हन मरां यहोवारी सभाई मां न एज्जे; तैन केरि दशोवं पीढ़ी तगरेरो कोई यहोवारे सभाई मां कधी न एज्जे; इस वजाई सेइं कि ज़ैखन तुस मिस्र मुल्खे मरां निस्तां एवरे थी तैखन तैनेईं अन्न पानी नेइतां बत्ती मां तुस सेइं मुलाकात न की, ते इन भी कि तैनेईं अरम्नहरैम मुल्खेरे पतोर नगरे बाले बोरेरे मट्ठू बिलामे तीं लानत देनेरे लेई दक्षिणा दित्ती। पन तेरे परमेशर यहोवाए बिलामेरी न शुनी; पन तेरे परमेशर यहोवाए तेरे लेई तैसेरे लानत बरकती मां बेदली दित्ती, एल्हेरेलेइ कि तेरो परमेशर यहोवा तीं सेइं प्यार केरतो थियो। ज़िन्दगी भर किछ नईं ज़ैस सेइं तैन केरो सुख ते भलियाई बधे।
“कोन्ची एदोमी सेइं नफरत न केरां, किजोकि तै तेरो ढ्लाए; कोन्ची मिस्री सेइं भी नफरत न केरां, किजोकि तैसेरे मुल्खे मां तू परदेशी भोइतां राहोरो थियो। तैन केरां ज़ैना पड़पोट्लड़ां पैदा भोन तैना यहोवारे सभाई मां एज्जन।
डेरां केरि साफ-सफाई
“ज़ैखन तू दुश्मन्न सेइं लड़ने जो गेइतां डेरे बनास, तैखन हर किसमेरी बुरी गल्लन करां बेच़तां रेइयां। अगर तेरे दरमियान कोई मड़द राती धात निसनेरे वजाई सेइं अशुद्ध भोवरो भोए, त तै डेरन करां बेइर गाए, ते डेरन मां अन्तर न एज्जे; पन ड्लवझ़ी करां थोड़े ज़ेरे पेइले तै निहान दे, ते ज़ैखन दिहाड़ो डुबी गाए तैखन डेरन मां एज्जे।
“डेरन करां बेइर शौच केरनेरी ठार बनानी, ते शौच केरनेरे लेई तैट्ठी गानू; ते तीं कां संदरन सने अक बंगड़ोई भी राए; ते ज़ैखन तू बेइरोवं बिशस, तैखन तैस सेइं घेड़तां अपने मल ढेकतां छ़ेडां। किजोकि तेरो परमेशर यहोवा तीं बच़ाने ते तेरे दुश्मन्न तीं करां हाराने जो तेरे डेरां केरे दरमियान च़लतो रालो, एल्हेरेलेइ तेरे डेरे पवित्र राहोरे लोड़न, एरू न भोए कि तै तेरे दरमियाने मां कोई भिट्टी चीज़ हेरतां तीं करां दूर भोइ गाए।
नश्शने बालो गुलाम
“ज़ै गुलाम अपने मालिके करां नेशतां तीं कां एइतां तेरी आस ट्लाए तैस तैसेरे मालिके हथ्थे न देइयां; तै तेरे दरमियान ज़ैन नगर तैस रोड़ू लग्गे तैस्से मां तीं साथी राए; ते तू तैस पुड़ ज़ुलम न केरां।
व्यभिचार नईं केरनो
“इस्राएली कौन्शन मरां कोई देवदासी न भोए, ते न इस्राएली लोकन मरां कोई मड़द एरू बुरो कम केरनेबालो भोए। तू वेश्यापनेरी कमाई या कुतरेरी कमाई कोन्ची बन्धू मुकानेरे लेई अपने परमेशर यहोवारे घरे मां न एना; किजोकि तेरे परमेशर यहोवारे नेड़े इना दूईये कमाई भिट्टू कम्मे।1
सूते पुड़ ओधार
“अपने कोन्ची ढ्ला जो सूते पुड़ ओधार न देइयां, चाहे रुपेइयो भोए, चाहे खानेरी चीज़ां भोन, चाहे कोई चीज़ भोए ज़ै सूते पुड़ दित्ती गातीए, तैस सूते पुड़ न देइयां। तू परदेशी सूते पुड़ ओधार त दे, पन अपने कोन्ची ढ्ला सेइं एरू न केरां, ताके ज़ैस मुल्खेरो अधिकारी भोनेरे लेई तू गेइ राहोरोस, तैड़ी ज़ैस-ज़ैस कम्मे मां अपनो हथ लास, तैन सेब्भन मां तेरो परमेशर यहोवा तीं बरकत दे।
मन्नत
“ज़ैखन तू अपने परमेशर यहोवारे लेई बन्धू केरस, त तैस पूरी केरने मां च़िर न केरां; किजोकि तेरो परमेशर यहोवा तैस पक्को तीं करां नेलो, ते च़िर केरने सेइं तू पापी ठहरेलो। पन अगर तू मन्नत न मन्नस, त तेरो कोई पाप नईं। ज़ैन किछ तेरे ज़बानरां निस्से तैस पूरू केरने मां एतिहात केरां; तू अपने ज़बानरां वचन देइतां अपनि इच्छा सेइं अपने परमेशर यहोवारी ज़ेरि मन्नत मन्नस, तेरही ऐज़ैदी सेइं तैस पूरी केरां।
पड़ोसेरी फसल
“ज़ैखन तू कोन्ची होरेरी दाछ़री बागी मां गास, तैखन पेट भेरतां मन पसंद दाछ़ खाने त खा, पन अपने टोकरी मां किछ न रेखां। ते ज़ैखन तू कोन्ची होरेरे खड़े फसलरे उडारे मां गास, तैखन तू हथ्थे सेइं शिल्लां ट्लोड़ी सकतस, पन कोन्ची होरेरे खड़े फसलरे ऊडार पुड़ ड्लात न लेइयां।
Source notes (1)
- Footnote हेरा 1 राज़ो 14:24; होशे 4:14; अमोस 2:7 मन्दरेरी वेश्या बनानी इस्राएले मां अक परेशानी थी। एरी लोक कनानी मन्दरे मां भोते थी,
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.