Bhadrawahi Bible
व्यवस्थाविवरण 22
किछ होरे कानून
“तू अपने इस्राएली ढ्लाएरे गोरू या गब्बां टेपलोरां लेहितां अनज़ान न भोइयां, तैन ज़रूर तैस कां पुज़ेइयां। पन अगर तेरो तै ढ्ला नेड़े न रहतो भोए, या तू तैस न ज़ानतो भोस, त तैस जानबरे अपने घरे अन्तर ऐन्हां, ते ज़ांतगर तेरो तै ढ्ला तैस न तोप्पे तांतगर तै तीं कां राए; ते ज़ैखन तै तैस तोप्पे तैखन तैस देइयां। ते तैसेरे गधे या लिगड़ां केरे बारे मां, बल्के तैसेरी कोई चीज़ कि न भोए, ज़ै तैस करां हेरोरि भोए ते तीं मैल्हे, तैसेरे बारे मां भी एरू केरां; तू लेइतां नज़र अनदाज़ न केरां।
“तू अपने ढ्लाएरे गधे या दांते ज़ैस बत्ती मां बिछ़ड़ोरो हेरतां अहेरी न केरां; तैस खड़ो केरने मां ज़रूर तैसेरी मद्दत केरां।
“कोई कौन्श मड़देरां लिगड़ां न लाए, ते न कोई मड़द कौन्शां केरां लिगड़ां लाए; किजोकि एन कम्मां केरनेबाले तेरे परमेशर यहोवारी नज़री मां भिट्टे आन।
“अगर बुट या धेरती पुड़ तेरे सामने बत्ती मां च़ुड़ोलू केरो आल्हो मैल्हे, चाहे तैस मां बच्चे भोन चाहे बेट्टी, ते तैन बच्चन या बेट्टन पुड़ तैन केरि अम्मा बिशोरीए भोए, त बच्चन सने अम्मा न ऐनथ; बच्चन अपने लेई त ने, पन तैन केरि अम्मा ज़रूर शैरां; एल्हेरेलेइ कि तेरू भलू भोए, ते तेरी उमर लम्मी भोए।
“ज़ैखन तू नंव्वू घर बनास तैखन तैसेरी छती पुड़ च़ेवरे पासन दिवार बनानी, एरू न भोए कि कोई मैन्हु छती पुड़ेरां खिरकी गाए, ते तू अपने टब्बरे पुड़ खूनेरो दोष लास।
“अपनि दाछ़री बागी मां दूई किसमां केरू बीज़ नईं बेनू, एरू न भोए कि तैसेरी सारी पैदावार, मतलब तेरू बेवरू बीज़ ते दाछ़री बागरी पैदावार दूईये अपवित्र ठहरन।1 दांत ते गधो दूईये साथी जोट्लतां हल न च़लेइयां। उन्ना ते सनेरी मिलावटी सेइं बनोरां लिगड़ां न लेइयां।
“अपने पलैटनेरे लिगड़ेरे च़ेवरे पासन पुड़ झालर लेइयां केरां।
ड्लाहेरे बारे मां कानून
“कोई मड़द कोन्ची कौन्शी सेइं ड्लाह बनाए, ते तैस सेइं जिसमानी रिश्तो बनानेरे बाद तैस सेइं नफरत केरे, ते तै तैस कौन्शी बदनाम केरे, ते इन ज़ोइतां तैस पुड़ कुकर्म केरनेरो दोष लाए, ‘इस कौन्शी सेइं मीं ड्लाह बनाव, ते ज़ैखन तैस सेइं जिसमानी रिश्तो बनाव तैखन तैस मां कुवारी भोनेरू सबूत न मैल्हू,’ त तैस कुइयरे अम्मा-बाजी तैसारे कुवारे भोनेरू सबूत नेइतां नगरेरे बुज़ुर्ग लोकन कां नगरेरे बेइर गान। ते तैस कुइयरो बाजी बुज़ुर्ग लोकन सेइं ज़ोए, ‘मीं अपनि कुई इस मड़दे जो ड्लाही, ते तै तैस सेइं नफरत केरते; ते तै त इन ज़ोइतां तैस पुड़ कुकर्म केरनेरो दोष लाते, कि मीं तेरी कुइये मां कुवारे भोनेरू सबूत न मैल्हू। पन मेरी कुइयरे कुवारे भोनेरे निशान इना आन।’ तैखन तैसेरे अम्मा-बाजी नगरेरे बुज़ुर्ग लोकां केरे सामने तैस च़ादरी खिलारन। तैखन नगरेरे बुज़ुर्ग तैस मड़दे ट्लेइतां सज़ाह देन, ते तैस पुड़ 100 शेकेल चैंदरे सिक्के जुर्मानो भी लेइतां तैस कुइयरे बाजी जो दे, एल्हेरेलेइ कि तैनी अक इस्राएली कुई बदनाम कियोरीए; ते तै तैसेरी कौन्श बनोरी राए, ते तै ज़िन्दगी भर तैस कौन्शी शैरी न बटे। पन अगर तैस कुइयरू कुवारे भोनेरू सबूत न मैल्हे, ते तैस मड़देरी गल सच़ भोए, त तैना सियाने तैस कुइये तैसेरे बाजी केरे घरेरे दारे पुड़ नेन, ते तैस नगरेरे मड़द तैस घोड़ेईं देइतां मैरी छ़डन; तैसां त अपने बाजी केरे अधीने2 रहते वक्ते मां वेश्यारू कम केरतां बुराई कियोरीए; एन्च़रां तू अपने दरमियाने मरां एरी बुराई दूर केरां।
व्यभिचार केरनेरी सज़ाह
“अगर कोई मड़द होरि मड़देरी कौन्शी सेइं जिसमानी रिश्तो बनातो मैल्हे, त ज़ै मड़द तैस कौन्शी सेइं साथी जिसमानी रिश्तो बनातो भोए, तै ते तै कौन्श दूईये मारां गान; एन्च़रां सेइं तू एरी बुराई इस्राएले मरां दूर केरां।
“अगर कोन्ची कुवारी कुइयरे ड्लाहेरी गल च़लोरी भोए, ते कोई होरो मड़द तैस नगरे मां मैलतां तैस सेइं जिसमानी रिश्तो बनाए, त तुस तैन दूईयने तैस नगरेरे फाटकेरे बेइर नेइतां तैन पुड़ घोड़ेईं देइतां तैना मैरी छ़ेडथ, तै कुई त एल्हेरेलेइ कि तै नगरे मां रेइतां भी तैसां चिन्डां न मैरी, ते तै मड़द इस वजाई सेइं कि तैनी पड़ोसेरी कौन्श बेइज़्ज़त कियोरीए; एन्च़रां तू अपने दरमियाने मरां एरी बुराई दूर केरां।
“पन अगर कोई मड़द कोन्ची कुइये ज़ेसेरे ड्लाहेरी गल लगोरी भोए मैइदाने मां मैलतां ज़बरदस्ती तैस सेइं जिसमानी रिश्तो बनाए, त सिर्फ तै मड़द मारो राए, ज़ैनी तैस सेइं जिसमानी रिश्तो बनेवरो भोए। ते तैस कुइये सेइं किछ न केरा; तैस कुइयरो पाप मौतरे सज़ाहरे काबल नईं, किजोकि ज़ेन्च़रे कोई अपने पड़ोसी पुड़ हमलो केरतां तैस मैरी छ़डे, तेरही ई गल भी ठहरेली; कि तैस मड़दे तै कुई मैइदाने मां मैल्ही, ते तैसां चिन्डां त मैरी, पन तैस कोई बच़ानेबालो न मैल्हो।
“अगर कोन्ची मड़दे कोई कुवारी कुई मैल्हे ज़ेसेरी कुड़माइ न भोए भोवरी, ते तै तैस ट्लेइतां तैस सेइं जिसमानी रिश्तो बनाए, ते तैना ट्लां गान, त ज़ैनी मड़दे तैस सेइं कुकर्म कियोरो भोए तै तैस कुइयरे बाजी जो 50 शेकेल चाँदी दे, ते तै तैसेरी कौन्श भोए, तैनी तै बेइज़्ज़त की, इस वजाई सेइं तै ज़िन्दगी भर तैस न शैरी बटे।
“कोई सोवक अम्मा3 अपनि कौन्श न बनाए, तै अपने बाजी केरू छ़ुंहूं न खोल्ले।
Source notes (3)
- Footnote तैना पवित्र समझ़ेले
- Footnote बाजी केरे अधीने अपने बाजी केरे घरे रहते वक्ते
- Footnote सोवक अम्मा तैन केरे बाजी केरे बड़े कौन्शन मरां अक।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.