Bhadrawahi Bible
व्यवस्थाविवरण 21
अनज़ाने कत्लेरे बारे मां कानून
“अगर तैस मुल्खेरे मैइदाने मां ज़ै तेरो परमेशर यहोवा तीं देते कोन्ची लाश पेवरी मैल्हे, ते ई पतो न च़ले कि तै केनि मारोरोए, त तेरे बुज़ुर्ग ते हाकिम निस्तां तैस लाशरे च़ेवरे पासे अक-अक नगर नापन कि को ठार केत्री दूरे; तैखन ज़ैन नगर तैस लाशरे सेब्भन करां नेड़े भोए, तैसेरे बुज़ुर्ग अक एरी बछ़ड़ी नेन, ज़ै कोन्ची कम्मे न भोए लेवरी, ते ज़ैस पुड़ कधी जुऊं न भोए रखोरू। तैखन तैस नगरेरे बुज़ुर्ग तैस बेछ़ड़ी एक्की पूरे साल बगनेबाले दरियारे एरे वैदी मांजो ज़ैस वैदी हल न भोए च़लेवरी मां तैस बेछ़रो मेट्टू ट्लोड़न। ते लेवी याजक भी नेड़े एज्जन, किजोकि तेरे परमेशर यहोवाए तैना च़ुनोरेन कि तैसेरी सेवा केरन ते तैसेरे नंव्वें सेइं आशिर्वाद देन, ते तैन केरे ज़ोनेरे मुताबिक हर अक झगड़ो ते मार देनेरो मुकदमे मां फैसलो केरनेबालो भोए। फिरी ज़ैन नगर तैस लाशरे सेब्भना नेड़े भोए, तैसेरे सब बुज़ुर्ग तैस बेछ़ी पुड़ ज़ैसारो मेट्टू वैदी मां ट्लोड़ोरो भोए अपने-अपने हथ धोइतां ज़ोन, ‘ई खून असेईं नईं कियोरो, ते न इन कम इश्शी एछ़्छ़ी केरे सामने भोवरूए। एल्हेरेलेइ, हे यहोवा, अपने छुटेवरे इस्राएली लोकां केरो पाप ढेकतां बेकसूरेरो खूनेरो पाप अपने इस्राएली लोकां केरे दोग्गन पुड़ेरां दूर केर।’ तैखन तैस खूनेरो दोष तैन्न माफ़ कियो गालो। एन्च़रां तैन कम केरतां ज़ैन यहोवारी नज़री मां ठीके तू बेकसूरे खूनेरो दोष अपने दरमियाने मरां दूर केरां।
जंगी गुलाम कौन्शां केरे बारे मां
“ज़ैखन तू अपने दुश्मन्न सेइं जंग केरने जो गास, ते तेरो परमेशर यहोवा तैन्न तेरे हथ्थे मां केरे, ते तू तैन कैदी बनास, तैखन अगर कैदी कियोरे लोकन मरां कोन्ची खूबसूरत कौन्शी लेहितां तै तीं पसंद एज्जे, ते तैस सेइं ड्लाह बनानो चास, त तैस अपने घरे मां अन्तर ऐन्हां, ते तै अपनो दोग कट्टाए, ते नो कटाए, ते अपना कैदी लिगड़ां खोलतां तेरे घरे मां पूरे महीने रेइतां अपने अम्मा बाजी केरे लेई शोग केरती गाए; तैसेरे बाद तू तैस कां गेइयां, ते तू तैसारो मुन्श ते तै तेरी कौन्श भोल्ही। फिरी अगर तै तीं रोड़ी न लग्गे, त ज़ैड़ी तै गानू चाहे तैड़ी तैस गाने देइयां; तैसेरी कीमत नेइतां कोन्ची जो न बेच़ां, किजोकि तैस सेइं तेरो जिसमानी रिश्तो थियो, इस वजाई सेइं तैस सेइं नौकरानी कौन्शरो ज़ेरो सलूख न केरां।
बड्डे भोनेरू हक
“अगर कोन्ची मड़देरी दूई कौन्शां भोन, ते तैस अक ट्लारी ते होरि ट्लारी न भोए, ते ट्लारी ते ज़ै ट्लारी न भोए दूईये कौन्शां केरां मट्ठां भोन, पन बड्डू मट्ठू ज़ै ट्लारी न भोए तैसारू भोए, त ज़ैखन तै अपने मट्ठन जो अपनि जाईदात बन्टे, तैखन अगर ज़ै ट्लारी नईं तैसारू मट्ठू ज़ैन सच़्च़े बड्डूए अगर ज़ींतू भोए, त तै ट्लारे मट्ठे बड्डेरू हक न देइ सकेलो; तै इन सेमझ़तां कि ज़ै ट्लारी न भोए तैसारू मट्ठू मेरी ताकतरो पेइलो फले, ते बड्डे भोनेरो अधिकार तैसेरो आहे, तैस अपनि सैरी जाईदाती मरां दूई हिस्से देइतां ज़ेठो मेन्नां।
ढीठ मट्ठा
“अगर केन्चेरू मट्ठू ढीठ ते बगावत केरनेबालू मट्ठू भोए, ज़ैन अपने अम्मा-बाजी केरि गल न मन्ने, पन हदैइत देने पुड़ भी तैन केरि न शुने, त तैसेरे अम्मा-बाजी तैस ट्लेइतां अपने नगरे करां बेइर फाटकेरे नेड़े नगरेरे बुज़ुर्गन कां नेन, ते तैना नगरेरे बुज़ुर्गन सेइं ज़ोन, ‘इश्शू इन मट्ठू ढीठ ते ज़िद्दी लड़ाई केरने बालूए, इन इश्शी न शुने; इन बिगड़ेरू ते पीने बालूए।’ तैखन तैस नगरेरे सब मड़द तैस घोड़ेईं देइतां मैरी छ़डन, इस तरीके सेइं तू अपने दरमियाने मरां एरी बुराई दूर केरां, तैखन सारे इस्राएली शुन्तां डेरि गाले।
मौतरी सज़ाह
“फिरी अगर कोन्ची मैन्हे एरहो पाप कियोरो भोए, ज़ेसेरी सज़ाह मौत भोए। ते तैस मैन्हु मारस ते तैसेरी लाशी बुट्टे पुड़ टंगी गाए, त तै लाश राती बुट्टे पुड़ टंगोरी न लोड़े राहोरी, ज़रूर तैस्से दिहाड़े तै दब्बो गाए, किजोकि ज़ै टंगो जेवरो भोते तै परमेशरेरी तरफां लानती भोते; एल्हेरेलेइ ज़ै मुल्ख तेरो परमेशर यहोवा तेरो हिस्सो केरतां देते तै ज़मीन अशुद्ध नईं केरनि।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.