Bhadrawahi Bible
व्यवस्थाविवरण 25
बगैर तरफदारी ते दया
“अगर मैन्हु केरे दरमियाने मां कोई लड़ाई भोए, ते तैना न्यायेरे लेई हाकिमन कां गान, त तैना तैन केरो न्याय केरन, त बेकसूरे जो बेकसूरे ते दोषी जो दोषी ठहरन। ते अगर दोषी मार खानेरे काबल ठहरे, त हाकिम बिछ़ोड़तां अपने सामने ज़ेरो तैसेरो दोष भोए तैसेरे मुताबिक कोड़े गेनतां लुवाए। तै तैस 40 कोड़न तगर लुवेई सकते, इस करां जादे न लुवेई सके; एरू न भोए कि इस करां जादे बड़ी मार खाने सेइं तेरो ढ्ला तेरी नज़री मां घटिया ठहरे।
“अन्न मडते बार दांतेरू आशी न बेन्धथ।
मरोरे ढ्लाएरे लेई ज़िमेदारी
“अगर काही ढ्ला साथी रहते भोन, ते तैन मरां अक बगैर औलादां मेरि गाए, त तैसेरी कौन्श होरी केन्ची गोट्लेरे सेइं ड्लाह न बनाए; बल्के तैसारे मुन्शेरो ढ्ला तैस कां गेइतां तैस अपनि कौन्श बनाए, ते तैस सेइं मुन्शेरे ढ्लाएरो फर्ज़ पूरो केरे। ते ज़ैन पेइलू मट्ठू तैस कौन्शी भोए तैन तैस मरोरे ढ्लाएरे नंव्वेरू ठहरेलू, ज़ैस सेइं कि तैसेरू नवं इस्राएले मरां मिटी न गाए। अगर तैस कौन्शरे मुन्शेरे ढ्लाए तैस सेइं ड्लाह बनानो पसंद न भोए, त तै कौन्श नगरेरे फाटके पुड़ बुज़ुर्ग लोकन कां गेइतां ज़ोए, ‘मेरे मुन्शेरे ढ्लाए अपने ढ्लाएरू नवं इस्राएले मां बनोरू रखने करां इन्कार कियोरोए, ते मीं सेइं मुन्शेरे ढ्लाएरो फर्ज़ पूरो केरनो न चाहे।’ तैखन तैस नगरेरे बुज़ुर्ग लोक तैस मड़दे कुजेइतां समझ़ान; ते अगर तै अपनि गल्ली पुड़ बनोरो राए, ते ज़ोए, ‘मीं इस सेइं ड्लाह बनानो पसंद नईं,’ त तैसेरे ढ्लाएरी कौन्श तैन बुज़ुर्गां केरे सामने तैस कां गेइतां तैसारे पव्वन मरां जुट्टी खोल्ले, ते तैसेरे तुत्तरे पुड़ थुक्के; ते ज़ोए, ‘ज़ै मड़द अपने ढ्लाएरे खानदाने च़लानू न चाहे तैस सेइं एन्च़रे बर्ताव कियो गालो।’ तैखन इस्राएले मां तैस मड़देरू इन नवं पेलू, मतलब जुट्टी खोल्लोरे मड़देरू टब्बर।
बाकी कानून
“अगर दूई मड़द एप्पु मांमेइं लड़ते भोन, ते तैन मरां एक्केरी कौन्श अपने मुन्शे मारने बालेरे हथ्थे मरां छुटानेरे लेई तैस कां गाए, ते अपनो हथ अग्रोवं केरतां तैसेरो गुपत अंगन ट्लाए, त तैस कौन्शरो हथ केट्टी छ़डनो; तैस पुड़ तरस न खानो।
“अपनि थेली मां किसमे किसमेरे मतलब घट-बध तोल न रेखथ। अपने घरे मां किसमे किसमेरे, मतलब घट-बध नाप न रेखथ। तेरे तोल ते नाप पूरे-पूरे ते धर्मेरे भोन; एल्हेरेलेइ कि ज़ै मुल्ख तेरो परमेशर यहोवा तीं देते तैस मां तेरी उमर बड़ी लम्मी भोए। किजोकि एरे कम्मन मां ज़ेत्रे सखती केरतन तैना सब तेरे परमेशर यहोवारी नज़री मां भिट्टे आन।
अमालेकी लोकन करां बदलो
“याद रख कि ज़ैखन तू मिस्र मुल्खे मरां निस्तां एज्जी राहोरो थियो तैखन अमालेके तीं सेइं बत्ती मां कुन कियूं, मतलब तैस परमेशरेरो डर न थियो; इस वजाई तैनी ज़ैखन तू बत्ती मां थकोरो थियो, तैखन तीं पुड़ हमलो केरतां ज़ेत्रे कमज़ोर भोनेरे वजाई सेइं सेब्भना पत्रोवं थिये तैन सब मारे। एल्हेरेलेइ ज़ैखन तेरो परमेशर यहोवा तैस मुल्खे मां, ज़ै तै तेरो हिस्सो केरतां तेरे अधिकारे मां केरते, तीं च़ेवरे पासां केरे सब दुश्मन्न करां आराम दे, तैखन अमालेकेरू नवं धेरती पुड़ां मिटेई छ़ेडां; ते तुस इस गल्ली न बिसरथ।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.