Bhadrawahi Bible
व्यवस्थाविवरण 11
हुक्म मन्नेरू इनाम
“एल्हेरेलेइ तू अपने परमेशर यहोवा सेइं बड़ो जादे प्यार केरां, ते ज़ैन किछ तैनी तीं दित्तोरूए तैसेरू, मतलब तैसेरी विधि, नियमन, ते हुक्मन हमेशा मेन्नां। ते तुस अज़ इन सोचा समझ़ा (किजोकि अवं त तुश्शे बाल-बच्चन सेइं न ज़ोईं) ज़ैनेईं न त किछ लावं ते न ज़ानू कि तुश्शे परमेशर यहोवाए कुन-कुन हदैइत की, ते महिमा, ते ज़ोरे बालो हथ, ते अग्रोवं कियोरी पाखड़ हिराई, ते मिस्रे मां तैट्ठेरे राज़े फ़िरौने केरे-केरे निशान हिराए, ते तैसेरे सारे मुल्खे मां केरां-केरां चमत्कारेरां कम्मां कियां; ते तैनी मिस्रेरी सेनारे घोड़न ते रथ्थन सेइं कुन कियूं, मतलब ज़ैखन तैना तुश्शो पीछो केरि राहोरे थिये तैखन तैनी तैना लाल समुन्दरे मां डोबतां केन्च़रां सेइं नाश केरि छ़डे, कि अज़ तगर तैन केरो पतो नईं; ते तुश्शे इस ठारी मां पुज़ने तगर तैनी सुनसान ठैरी मां तुसन सेइं कुन-कुन कियूं; ते तैनी रूबेनी एलीआबेरू मट्ठू दातान ते अबीरामे सेइं कुन-कुन कियूं; मतलब ज़मीनां अपनु आशी खोलतां तैना घरान्न, ते डेरन, ते सब अपने सारे लोकन सने सब इस्राएली लोकां केरे हेरते-हेरते केन्च़रे निगली छ़डे; पन यहोवारां इनां सब बड्डां-बड्डां कम्मां तुसेईं अपने एछ़्छ़न सेइं हेरां।
“इस वजाई सेइं ज़ेत्रे हुक्म अवं अज़ तुसन शुनाताईं तैन सेब्भन मेन्नथ, एल्हेरेलेइ कि तुस ताकतबर भोइतां तैस मुल्खे मां ज़ेसेरे अधिकारी भोनेरे लेई तुस पार गानेरे लेई दाखल भोइतां तैसेरे अधिकारी भोइ गाथ, ते तैस मुल्खे मां बड़े दिहाड़े राथ, ज़ैस तुसन ते तुश्शे खानदाने जो देनेरी कसम यहोवाए तुश्शे दादे पड़दादन सेइं खेवरी थी, ते तैस मां दुद्ध ते मैछ़ेरी गड्डां1 बेगतिन। हेरा, ज़ैस मुल्खेरे अधिकारी भोनेरे लेई तुस गेई राहोरेथ तै मिस्र मुल्खेरो ज़ेरो नईं, ज़ैट्ठां निस्तां एवरेथ, ज़ैड़ी तुस बीज़ बेते थिये ते सब्ज़ शागेरां ऊडारां केरे तरीकेरे मुताबिक अपने पव्वन सेइं ढले बनेइतां सगते थिये; पन ज़ैस मुल्खेरे अधिकारी भोनेरे लेई तुस पार गाने बालेथ तैस मुल्खे मां पहाड़ां ते वैदी आन, ते अम्बरेरी झ़ेड़रे पैनी सेइं सेगोते; तै एरहो मुल्खे ज़ेसेरी तेरो परमेशर यहोवा देखभाल केरते ते सालेरे शुरू करां आखरी तगर तेरे परमेशर यहोवारी नज़र तैस पुड़ लगातार लगोरी रातीए।
“अगर तुस मेरे हुक्मन2 ज़ैना अज़ अवं तुसन शुनाताईं ध्याने सेइं शुन्तां, अपने पूरे मन ते सारे प्राणे सेइं, परमेशर यहोवा सेइं प्यार केरथ ते तैसेरी सेवा केरते राथ, त अवं तुश्शे मुल्खे मां बरसांतरे शुरू ते आखर दूईये वक्तां केरि झ़ड़ी अपने-अपने वक्ते पुड़ बखेइलो, ज़ैस सेइं तू अपनु अन्न, नंव्वो दाछ़रो रस, ते तेल जम्हां केरि सकेलो। ते अवं तेरे जानबरां केरे लेई उडारे मां घास उगालो, ते तू पेट भेरतां खाएलो ते राज़ी रालो। एल्हेरेलेइ अपने बारे मां खबरदार राथ, एरू न भोए कि तुश्शे मन धोखो खान, ते तुस टेपलोइतां होरि देबतां केरि पूज़ा केरने लगथ ते तैन कां झुकने लगथ, ते यहोवारो कोप तुसन पुड़ भड़के, ते तै अम्बरेरी झ़ड़ी बन्द केरे, ते ज़मीन अपनि फसल न दे, ते तुस तैस रोड़े मुल्खे मरां ज़ै यहोवा तुसन देते लूशी नाश भोइ गाथ। एल्हेरेलेइ तुस मेरे इना वचन अपने-अपने मन ते प्राणन मां धारण केरथ, ते निशानेरे रूपां मां अपने हथ्थन पुड़ बेन्धथ, ते तैना तुश्शी एछ़्छ़ी केरे मझ़ाटे टिकोवेंरू कम देन। ते तुस घरे मां बिश्शोरे, बत्तां च़लते, लेटते-उठते इन केरि गलबात केरतां अपने बच्चन शिखैलथ। ते इन्न अपने-अपने घरेरे दारेरे पल्लन ते अपने फाटकन पुड़ बा लिखत; एल्हेरेलेइ कि ज़ैस मुल्खेरे बारे मां यहोवाए तेरे सियानन सेइं कसम खेइतां ज़ोवरू थियूं, कि अवं तैस तुसन देइलो, तैस मां तुश्शी ते तुश्शे बच्चां केरि उमर लम्मी भोए, ते ज़ांतगर धेरतरू बेइयोवं अम्बर बनोरू राए तांतगर तैना भी टिकोरे रान। एल्हेरेलेइ अगर तुस इन सब हुक्मन मन्ने मां ज़ैना अवं तुसन शुनाताईं पूरी एतिहात केरतां अपने परमेशर यहोवा सेइं प्यार केरथ, ते तैसेरे सब बत्तन पुड़ च़लथ, ते तैस सेइं पलेटोरो राथ, त यहोवा तैन सब कौमन तुसन करां केढी छ़डेलो, ते तुस एप्पु करां बड्डी ते ताकतबर कौमरे अधिकारी भोइ गाले। ज़ैस-ज़ैस ठारी पुड़ तुश्शे पव पेन तैना सब तुश्शू भोइ गालू, मतलब सुनसान ठैरी करां लबानोने तगर, ते फरात नंव्वेरे समुन्दरे करां लेइतां पश्चिमेरे समुन्दरे तगर तुश्शी हद भोल्ही। तुश्शे सामने कोई भी खड़ो न रेइ सकेलो; किजोकि ज़ेत्री ज़मीनी पुड़ तुश्शे पव पेले तैस पुड़ सब रानेबालां केरे मने मां तुश्शो परमेशर यहोवा अपने वचनेरे मुताबिक तुश्शे वजाई सेइं तैन मां डर ते थर्क लगनी पैदा केरेलो।
“शुना, अवं अज़्ज़ेरे दिहाड़े तुश्शे सामने बरकत ते लानत दूईये रखताईं। मतलब अगर तुस अपने परमेशर यहोवारे इन हुक्मन ज़ैना अवं अज़ तुसन शुनाताईं मन्नथ, त तुसन पुड़ बरकत भोल्ही, ते अगर तुस अपने परमेशर यहोवारे हुक्मन न मन्नेले, ते ज़ैस बत्तरे हुक्म अवं अज़ शुनाताईं तैस शैरतां होरि देबतन पत्ती भोइ गाले ज़ैन तुस न ज़ानथ, त तुसन पुड़ लानत पेली। ते ज़ैखन तेरो परमेशर यहोवा तीं तैस मुल्खे मां पुज़ालो ज़ेसेरो अधिकारी भोनेरे लेई तू गाने बालोस, तैखन बरकत गिरिज्जीम पहाड़े पुड़ेरां ते लानत एबाल पहाड़े पुड़ां शुनानी। कुन तैना यरदनेरे पार, दिहाड़ो डुबनेरे पासे, अराबारे रानेबाले कनानी लोकां केरे मुल्खे मां, गिलगाल नगरेरे सामने, मोरेरे बंज़ेरे बुट्टे कां नईं? तुस त यरदने पार एल्हेरेलेइ गाने बालेथ, कि ज़ै मुल्ख तुश्शो परमेशर यहोवा तुसन देते तैसेरे अधिकारी भोइ गाथ; ते तुस तैसेरे अधिकारी भोइतां तैस मां बस्सथ; एल्हेरेलेइ ज़ेत्री विधि ते नियम अवं अज़ तुसन शुनाताईं तैन सेब्भी केरे मन्ने मां होशियारी केरथ।
Source notes (2)
- Footnote दुद्ध ते मैछ़ेरी गड्डां फलदार ज़मीन
- Footnote मेरे हुक्मन या यहोवारे हुक्मन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.