Bhadrawahi Bible
व्यवस्थाविवरण 10
घोड़ेरी नेव्वीं तेख्ती
“तैस वक्ते यहोवाए मीं सेइं ज़ोवं, ‘पेइली तेख्ती केरि ज़ेरि घोड़ां केरि दूई होरि तेख्ती बना, ते तैना एन्हतां मीं कां पहाड़े पुड़ एई, ते लेकड़रो अक सन्दूख भी बना। ते अवं तैन पेट्टन पुड़ तैन्ना वचन लिखेलो, ज़ैना तैन पेइली तेख्ती पुड़ लिखोरे थिये, ज़ैना तीं ट्लोड़ी छ़ेडी, ते तू तैन तैस सन्दूखे मां रेखां।’ तैखन मीं किकरेरे लेकड़रो अक सन्दूख बनावाव, ते पेइली तेख्ती केरि ज़ेरि घोड़ेरी दूई होरि तेख्ती बनेई, तैखन तैन हथ्थन मां ट्लेइतां पहाड़े पुड़ च़ेढ़ी जेव। ते ज़ैना दश वचन यहोवाए सभारे दिहाड़े पहाड़े पुड़ अग्गी मरां तुसन सेइं ज़ोवरे थिये, तैन्ना तैनी पेइलेरे ज़ेरे तैन तेख्तन पुड़ लिखे; ते तैना मीं दित्ते। तैखन अवं पहाड़े पुड़ेरां उन्ढो ओस्सो, ते तेख्ती अपने बनेवरे सन्दूखे मां रेखी; ते यहोवारे हुक्मेरे मुताबिक तैना तैट्ठी रेखी।
“(तैखन इस्राएली लोक याकानी लोकां केरे खुहे करां च़ेलतां मोसेरा तगर आए। तैड़ी हारून मेरि जेव, ते तै तैड़ी दब्बो जेव; ते तैसेरू मट्ठू एलीआजर तैसेरे ठारी पुड़ याजकेरू कम केरने लग्गो। तैना तैट्ठां च़ेलतां गुदगोदा जो जे, ते गुदगोदा मरां योतबाता जो च़ले, इस मुल्खे मां पैनेरे दरिया आन। तैस वक्ते यहोवा लेवी गोट्ल एल्हेरेलेइ अलग कियो कि तैना यहोवारे करारेरो सन्दूख छ़ून, ते यहोवारे सामने खड़े भोइतां तैसेरी सेवा केरन, ते तैसेरे नंव्वें सेइं आशिर्वाद देन, ज़ैस तरीके सेइं अज़्ज़ेरी दिहाड़ी तगर भोइ राहोरूए। इस वजाई सेइं लेवी लोकन अपने ढ्लान सेइं साथी कोई अपनो अंश या अपनो हिस्सो न मैल्हो; यहोवा तैन केरो अपनो हिस्सोए, ज़ेन्च़रे कि तेरे परमेशर यहोवाए तैन सेइं ज़ोवरू थियूं।)
“अवं त पेइलेरो ज़ेरो तैस पहाड़े पुड़ 40 दिहाड़े ते 40 रात रुकोरो राव, ते तैस बार भी यहोवाए मेरी शुनी, ते तीं नाश केरनेरो इरादो शारो। फिरी यहोवा मीं सेइं ज़ोवं, ‘उठ, ते तू इन लोकन अग्रोवं च़ला, ताके ज़ै मुल्ख देनेरी मीं तैन केरे सियानन सेइं कसम खेइतां ज़ोवरू थियूं तैस मां तैना गेइतां तैस अपने अधिकारे मां केरन।’
परमेशरेरी मांग
“हुनी, हे इस्राएल, तेरो परमेशर यहोवा तीं करां इसेरे अलावा होरू कुन चाते, कि तू अपने परमेशर यहोवारो डर मन्नस, ते तैसेरे सारे बत्तन पुड़ च़लस, तैस सेइं प्यार केरस, ते अपने पूरे मने ते अपने सारे प्राणे सेइं तैसेरी सेवा केरस, ते यहोवारे ज़ैना-ज़ैना हुक्म ते विधि अवं अज़ तीं शुनाताईं तैन्न मन्नस, ज़ैस सेइं तेरू भलू भोए? शुन, सुर्ग ते सेब्भन करां उच्चु सुर्ग भी, ते धरती ते तैस मां ज़ैन किछ आहे, तैन सब तेरे परमेशर यहोवारू आहे; फिरी भी यहोवा तेरे सियानन सेइं हमदरदी ते प्यार कियो, ते तैन केरे बाद तुसन लोकन ज़ैना तैन केरि औलाद आथ सब मुल्खां केरे लोकन मरां च़ुनोरेथ, ज़ेरू कि अज़्ज़ेरी दिहाड़े भी बांदू आहे। एल्हेरेलेइ अपने-अपने दिलेरो खतनो केरा, ते अग्रोवं जो ढीठ न राथ। किजोकि तुश्शो परमेशर यहोवा तैए ईश्वरां केरो परमेशर ते प्रभुआं केरो प्रभुए, तै बड़ो शेक्ति बालो ते डरेरे काबल परमेशरे, ज़ै कोन्चेरी तरफदारी न केरे ते न रिश्पत ने। तै अनाथां ते विधवारो न्याय केरते, ते परदेशी सेइं एरहो प्यार केरते कि तैन्न रोट्टी ते लिगड़ां देते। एल्हेरेलेइ तुस भी परदेशी लोकन सेइं प्यार केरथ; किजोकि तुस भी मिस्र मुल्खे मां परदेशी थिये। अपने परमेशर यहोवारो डर मन्नो; तैसेरी सेवा केरनि ते तैस्से सेइं पलैटोरू रानू, ते तैसेरे नंव्वेरी कसम खानी। तैए तुश्शी तारीफ़रे काबले; ते तैए तुश्शो परमेशरे, ज़ैनी तीं सेइं तैना बड्डां ते डरानेबालां कम्मां कियोरन, ज़ैना तीं अपने एछ़्छ़न सेइं लाहोरेन। तेरे सियाने ज़ैखन मिस्रे मां जे तैखन सिर्फ 70 मैन्हु थिये; पन हुनी तेरे परमेशर यहोवाए तेरी गिनती अम्बरेरे तारन बराबर बड़ी कियोरीए।1
Source notes (1)
- Cross-reference प्रेरित. 7:14;इब्रा. 11:12.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.