Bhadrawahi Bible
व्यवस्थाविवरण 12
परमेशरेरी सेवारी ठार
“ज़ै मुल्ख तुश्शे दादे-पड़दादां केरे परमेशर यहोवाए तुश्शे अधिकारे मां दित्तोरोए, तैस मां ज़ांतगर तुस धेरती पुड़ ज़ींते राथ तांतगर एन विधन ते नियमन मन्ने मां एतिहात केरथ। ज़ैन कौमां केरे तुस अधिकारी भोल्हे तैन केरे लोक उच्चे-उच्चे पहाड़न या टैपन पुड़, या कोन्ची किसमेरे सब्ज़ बुट्टे हैठ, ज़ेत्रे ठारन मां अपने देबतां केरि पूज़ा केरतन, तैन सेब्भन तुस पूरे तरीके सेइं नाश केरथ; तैन केरि वेदी डोलथ, तैन केरि मूरतन ट्लोड़ी छ़ेडथ, तैन केरि अशेरा नंव्वेरी मूरतन अग्गी मां फुकथ, ते तैन केरे देबतां केरि घेड़ोरि मूरतन केटतां बिछ़ोड़थ, कि तैस मुल्खे मरां तैन केरां नंव्वां तगर मिटी गान। फिरी ज़ेरू तैना केरतन, तुस अपने परमेशर यहोवारे लेई तेरहु न केरथ। पन ज़ै ठार तुश्शो परमेशर यहोवा तुश्शे सब गोट्लन मरां च़ुनेलो, कि तैड़ी अपनु नवं बनोरू रख्खे, तैसेरे तैस्से रानेरी ठारी कां गाते रेइयथ; ते तैट्ठी तुस एपनी होमबलि, ते मेलबेलि, ते दशोवं हिस्सो, ते सल्लोरी च़ढ़तल, ते बन्धू कियोरी चीज़ां, ते अपने मेर्ज़री बलि, ते बेछ़ी दांत ते भैड्डां-छ़ेल्ली केरे ज़ेठे नेते रेइयथ; ते तैड़ी तुस अपने परमेशर यहोवारे सामने रोट्टी खेइयथ, ते अपने-अपने टब्बरे समेत तैन सब कम्मन पुड़, ज़ैन मां तुसेईं हथ लेवरो भोए, ते ज़ैन पुड़ तुश्शे परमेशर यहोवारी बरकत मैल्होरी भोए, आनन्द केरथ। ज़ेन्च़रे अस अज़ काल इड़ी ज़ैन कम ज़ैस पसंद एइते तैन्ने केरते तेरहु तुस न केरथ; ज़ै आरामेरी ठार तुश्शो परमेशर यहोवा तुश्शे हिस्से मां देते तैड़ी तुस हुन्ना तगर त नईं पुज़ोरे। पन ज़ैखन तुस यरदने पार गेइतां तैस मुल्खे मां ज़ेसेरे हिस्सेदार तुश्शो परमेशर यहोवा तुसन केरते बेस्सी गाथ, ते तै तुसन च़ेवरे पासां केरे सब दुश्मन करां तुसन आराम देलो, ते तुस निडर राथ, तैखन ज़ै ठार तुश्शो परमेशर यहोवा अपने नंव्वेरू निवास ठहरानेरे लेई च़ुने तैस्से मां तुस एपनी होमबलि, ते मेलबलि, ते दशोवं हिस्सो, ते उठावरी च़ढ़तल, ते मिन्नतरी सब रोड़ी-रोड़ी चीज़न ज़ैना तुस यहोवारे लेई मन्नेले, मतलब ज़ेरि चीज़ां केरो हुक्म अवं तुसन शुनाताईं तैन सेब्भन तैड़ी नेइयथ। ते तैड़ी तुस अपना-अपना मट्ठां कुइयां ते नौकर नौकरेनन सने अपने परमेशर यहोवारे सामने आनन्द केरथ, ते ज़ै लेवी मैन्हु तुश्शे नगरे मां राए तै भी आनन्द केरे, किजोकि तैसेरो तुसन सेइं कोई अपनो हिस्सो या, अंश न भोल्हो। ते खबरदार रेइयां कि तू अपने होमबेलिन हर एक्की ठारी पुड़ ज़ै हेरने मां एज्जे न च़ैढ़थ; पन ज़ै ठार तेरे कोन्ची गोट्ल मां यहोवा च़ुनी तैड़ी अपने होमबेलिन च़ैढ़थ, ते ज़ैस-ज़ैस कम्मेरो हुक्म अवं तीं शुनाताईं तैस तैड़ी केरथ।
“पन तू अपने सब नगरन मां ते अपने दिलेरी इच्छा ते अपने परमेशर यहोवारी दित्तोरी बरकतरे मुताबिक जानबर मैरतां खेइ बटेलो, शुद्ध ते अशुद्ध मैन्हु दूईये खेइ सकेले, ज़ेन्च़रे कि चिकारे ते हिरनेरू मास। पन तैसेरो खून नईं खानो; तै पैनेरो ज़ेरो धेरती पुड़ उलटानो। फिरी अपनु अन्न, या नंव्वे दाछ़रो रस, या तेलेरो दशोवं हिस्सो, ते अपने बेछ़ी दांत या भैड्डां-छ़ेल्ली केरे ज़ेठे बच्चे, ते अपनि मिन्नतां केरि कोई चीज़, ते अपने मेर्ज़री बलि, ते च़ाढ़ोरी च़ढ़तल अपने सब फाटकां केरे अन्तर नईं खानी; तैन्न अपने परमेशर यहोवारे सामने तैस्से ठारी पुड़ ज़ैस तै च़ुने अपना मट्ठा-कुइयां ते नौकर-नौकरैनी केरे, ते ज़ैना लेवी तेरे नगरे मां राले तैन सेइं साथी खेइयां, ते तू अपने परमेशर यहोवारे सामने अपने सब कम्मन पुड़ ज़ैन मां हथ लेवरो भोए आनन्द केरां। ते खबरदार रेइयां कि ज़ांतगर तू धेरती पुड़ ज़ींतो रास तांतगर लेवी लोकन न शैरां।
“ज़ैखन तेरो परमेशर यहोवा अपने वचनेरे मुताबिक तेरो मुल्ख बधाए, ते तेरो दिल मास खानू चाहे, ते तू सोचने लग्गस, कि अवं मास खेइलो, तैखन ज़ैन मास तेरो दिल चाहे तैन्ने खेइ बटेलो। ज़ै ठार तेरो परमेशर यहोवा अपनु नवं बनोरू रखनेरे लेई च़ुनते तै ठार अगर तीं करां बड़ी दूर भोए, त ज़ै बछ़ी-दांत छ़ल्ली-भैड यहोवा तीं दित्तोरी भोन, तैन मरां ज़ैन किछ तेरो दिल चाहे, तैस मेरे हुक्मेरे मुताबिक मैरतां अपने नगरन मां खेइ बटेलो। ज़ेन्च़रे चिकारे ते हिरनेरू मास खव गाते तेन्च़रे तैन्न भी खेइ बटेलो, शुद्ध ते अशुद्ध दूईये किसमां केरे मैन्हु तैन केरू मास खेइ सकेले। पन तैन केरो खून कोन्ची किसमे सेइं न खेइयां; किजोकि खून ज़ै आहे तै प्राणे आहे, ते तू मासे साथी प्राण कधी भी न खेइयां। तैस न खेइयां; तैस पैनेरे ज़ेरो धेरती पुड़ उलटेइयथ। तू तैस न खेइयां; एल्हेरेलेइ कि तैन कम केरने सेइं ज़ैन यहोवारे नज़री मां ठीके तेरू ते तेरां बाद तेरे खानदानेरू भी भलू भोए। पन ज़ैखन तू कोई चीज़ पवित्र केरस, या मिन्नत मन्नस, त एरी चीज़ नेइतां तैस ठारी जो गेइयां ज़ैस यहोवा च़ुने, ते तैड़ी अपने होमबलि केरू मास ते खून दूईयन अपने परमेशर यहोवारे वेदी पुड़ च़ैढ़थ, ते मेलबलि केरो खून तैस्से वेदी पुड़ उलटेइतां तैन केरू मास खेइयथ। इन गल्लां ज़ैन केरो हुक्म अवं तीं शुनाताईं मन लेइतां शुन, कि ज़ैखन तू तैन कम केरस ज़ैन तेरे परमेशर यहोवारी नज़री मां भलू ते ठीके, तैखन तेरू ते तेरे बाद तेरे खानदानेरू भी हमेशा भलू भोतू रालू।
मूरती केरि पूज़ारे खलाफ खबरदारी
“ज़ैखन तेरो परमेशर यहोवा तैन कौमन ज़ैन केरो अधिकारी भोनेरे लेई तू गेइ राहोरोस तेरे सामनेरां नाश केरे, ते तू तैन केरो अधिकारी भोइतां तैन केरे मुल्खे मां बेस्सी गास, तैखन खबरदार रेइयां, कोन्च एरू न भोए कि तैन केरे नाश भोनेरां पत्ती तू भी तैन केरो ज़ेरो फेसी गास, मतलब इन ज़ोइतां तैन केरे देबतां केरे बारे मां ई पुछ़ गन न केरां, कि तैन कौमां केरे लोक अपने देबतां केरि सेवा कोस तरीके केरते थिये? अवं भी तेन्च़रे केरेलो। तू अपने परमेशर यहोवा सेइं एरहो सलूख न केरां; किजोकि ज़ेत्रे किसमां केरे कम्मन सेइं यहोवा नफरत केरते ते बैर रखते, तैना सब तैनेईं अपने देबतां केरे लेई कियोरन, इड़ी तगर कि अपना मट्ठा-कुइयां भी तैना अपने देबतां केरे लेई अग्गी मां छ़ेडतां फुकतन।
“ज़ेत्री गल्लां केरो अवं तुसन हुक्म देताईं तैन्न ध्याने सेइं मन्ना; ते न त किछ तैन मरां बधेइयथ ते न तैन मरां किछ घटेइयथ।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.