आमोस

आमोस

लिखने बालो

अमोस 1:1 लिखने बालेरे रूपे मां आमोस नबी पिशान केरते। आमोस नबी तकोआ झ़ल्‍लोवें मां पुहालन सेइं साथी रहतो थियो। आमोस इस गल्‍ली साफ केरते कि तै नेबी केरे परिवारे मरां नईं ते न तै अपने आपे जो नबी मन्तो थियो। परमेशरे टिट्टां ते अग्गरे ज़िरिये सज़ाह देनेरी खबरदारी दित्तोरी थी पन आमोस नेबेरी प्राथना इस्राएल बच़ावरो थियो।

लिखनेरी तारीक ते जगाह

लगभग 760-750 ई. पू.

आमोस बेतेल ते सामरियारे-उत्तरी रियासती मां प्रचार केरतो थियो।

शुन्ने पढ़नेबाले

उत्तरी रियासत इस्राएलेरे लोक ते एजने बाले वक्ते मां पवित्रशास्त्र पढ़नेबाले लोकां केरे लेई ई किताब लिखी जेई।

मकसद

परमेशर घमण्ड केरनेबालन सेइं नफरत केरते। तैना लोक अपने आपे पुड़ निर्भर थिये, ते तैनेईं परमेशरे करां मैल्होरी हर अक गल बिसरोरी थी। परमेशर सेभी केरो खियाल रखते, ते गरीबन सेइं बुरे बरतावेरे खलाफे खबरदारी देते। आखरकार, परमेशरे सच़्च़ी आराधना लोड़े ज़ैस सेइं तैसेरे लेई आदर भोए। आमोसेरे ज़िरिये परमेशरेरू वचन इस्राएलेरे खास अधिकार हासिल लोकां केरे खलाफ अऊं, तैन मां अपने पड़ोसी केरे लेई प्यार न थियो। तैना होरन करां फैइदो उठाते थिये ते सिर्फ अपनो मतलब कढते थिये।

खास मुद्दो

न्याय

रूपरेखा

1. गैर कौमां केरो नाश

2. नेबी केरि बुलाहट

3. इस्राएलेरी सज़ाह

4. दुबारां आबाद भोनू