Bhadrawahi Bible
आमोस 8
फलन सेइं भेरतां टोकरारू दर्शन
फिरी परमेशर यहोवाए मीं एन भी हिरावं: कि, रितरे फलन सेइं भेरतां अक टोकरीए। ते तैनी पुछ़ू, “हे आमोस, तीं कुन लेइहोते?” मीं जुवाब दित्तो, “रितरे फलन सेइं भेरतां अक टोकरीए।” तैखन यहोवाए मीं सेइं ज़ोवं, “मेरे इस्राएली लोकां केरो अन्त एवरोए; अवं हुनी तैस न छ़डेलो।” परमेशर यहोवा एन ज़ोते, “तैस दिहाड़े राज़ मन्दरेरां गीतां हाहाकारे मां बेदलोई गालां, ते लाशां केरो बड़ो ढेर लग्गेलो; ते सब जगान मां तैना च़ुपच़ारे शारे गाले।”
एन शुना, तुस ज़ैना गरीबन पुड़ ज़ुलम केरतथ ते मुल्खेरे हलीम लोकन नाश केरने चातथ, ज़ैन ज़ोतथ, “नंव्वो चाँद केइस बीतेलो कि अस अन्न बेच़ी सखम? ते थैकरी दिहाड़ी केइस बीते, कि असां अन्नेरे कोठार खोल्लम ते एपा घट ते शेकेल भारी केरम, ते बेइमैनरी ट्लेकड़ी सेइं धोखो देम, कि अस कंगालन रुपेइये देइतां, ते गरीबन अक ज़ोड़ी जुट्टी देइतां तैन गुलाम बनाम, ते खराब अन्न बेच़म?”
यहोवा, ज़ैस पुड़ याकूबे घमण्ड केरनू जाइज़े, तै अपनि कसम खेइतां ज़ोते, “अवं तुश्शे कोन्ची भी बुरे कम्मे कधी न बिसरेलो। कुन एस वजाई सेइं ज़मीन न हिल्लेली? कुन तैस पुड़ रानेबाले सब मातम न केरेले? ई सारो मुल्ख मिस्रेरे नील दरियारे ज़ेरो भोल्हो, ज़ै बद्धते, ते फिरी छ़ेल्ही मारते, ते फिरी घेटी गाते।”
परमेशर यहोवा एन ज़ोते, “तैस मौके दिहाड़ो दुपहरेईं डुबी गालो, ते एस मुल्खे मां दीसां केरे दुपहरेईं आंधरू बनेइलो।1 अवं तुश्शे दादा पड़दादां केरां तिहारां दूर केरतां मातम करेइलो, ते तुश्शां सारा गीतां दूर केरतां मातमेरां गीतां ज़ुवेइलो; अवं तुश्शे सैरी केरे मझ़े मां टाट बन्धेइलो, ते तुश्शे सैरी केरे दोग्गेरे बाल कटेइलो; ते एरहो मातम करेइलो ज़ेरो कोई एकलौते मट्ठेरे लेई केरते, ते तैसेरो अन्त सखत दुखेरे दिहाड़ेरो ज़ेरो भोल्हो।”
परमेशर यहोवा एन ज़ोते, “हेर, एरे दिहाड़े एइतन, ज़ैखन अवं इस मुल्खे मां काल छ़डेलो; तैस मां न त अन्नेरी ढ्लुख भोल्ही ते न पैनेरी ट्लिश भोल्ही, पन यहोवारू वचन शुन्नेरी ढ्लुख ट्लिश भोल्ही। ते लोक यहोवारे वचनेरी तोपी मां एक्की समुन्दरे करां होरि समुन्दरे तगर ते उत्तरे करां पूरबे तगर दरबदर फिरेले, पन तैन न मैल्ही बटेलु।
“तैस मौके खूबसूरत कुइयां ते जुवान मड़द दूईये ट्लिशी सेइं बेहोश भोइ गाले। ज़ैना लोक सामरियारे दोष देबतेरी कसम खातन, ते ज़ैना ज़ोतन, दान नगरेरे देबतेरी कसम, ते बेर्शेबा नगरेरे पन्थेरी कसम, तैना सब बिछ़ड़ी गाले, ते फिरी न उठी बटेले।”
Source notes (1)
- Cross-reference मत. 27:45;मरक. 15:33;लूक. 23:44-45.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.