Bhadrawahi Bible
आमोस 2
मोआब
यहोवा एन ज़ोते: “मोआबेरे ट्लाई बल्के च़ेवर पापां केरे वजाई सेइं अवं तैस ज़रूर सज़ाह देइलो; किजोकि तैनी एदोमेरे राज़ेरी हेड्डी फुकतां भस्म की। एल्हेरेलेइ अवं मोआब मुल्खे मां अग लेइलो, ते तैस सेइं करिय्योत नगरेरे क़िले भस्म भोइ गाले; ते मोआबे मां शोर ते ललकार ते नरशिंगेरी आवाज़ शुन्ते-शुन्ते मेरि गालो। अवं तैसेरे दरमियान न्यायी नाश केरेलो, ते साथी-साथी तैसेरे सब हाकिमन भी मारेलो,” यहोवा एन्ने ज़ोते।
यहूदा
यहोवा एन ज़ोते: “यहूदारे ट्लाई बल्के च़ेवर पापां केरे वजाई सेइं अवं तैस ज़रूर सज़ाह देइलो। किजोकि तैनेईं यहोवारो कानून निकम्मो समझ़ो ते मेरी विधि न मेन्नी; ते अपने झूठे देबतां केरे वजाई सेइं ज़ैन केरि तैन केरे दादे पड़दादे पूज़ा केरते थिये, तैना भी भेटकी जेवरेन। एल्हेरेलेइ अवं यहूदा प्रदेशे मां अग लेइलो, ते तैस सेइं यरूशलेम नगरेरे क़िले भी भस्म भोइ गाले।”
इस्राएल मुल्खेरो न्याय
यहोवा एन ज़ोते: “इस्राएलेरे ट्लाई बल्के च़ेवर पापां केरे वजाई सेइं अवं तैस ज़रूर सज़ाह देइलो; किजोकि तैनेईं बेकसूर रुपेइयां केरे लेई ते गरीब अक ज़ोड़ी जुट्टी केरे लेई बेच़ी छ़डे।1 तैना कंगालां केरे दोग्गे पुड़ धूड़रू भी लालच़ केरतन, ते हलीम लोकन बत्ती करां भी दूर केरतन। ते बाजी ते मट्ठू एक्की गुलाम कुइये कां गातन, ज़ैस सेइं मेरू पवित्र नवं अपवित्र भोते। तैना हर एक्की वेदी कां बन्धे रखोरे लिगड़न पुड़ झ़ुलतन, ते सज़ाहरे रुपेइये सेइं घिन्तां दाछ़रो रस अपने देबतेरे मन्दरे मां पीतन।
“मीं अपने इस्राएली लोकां केरे सामनेरां एमोरी लोकां केरो नाश कियोरोए, ज़ैन केरि लम्बाई गैइड़ेरे बुट्टां केरि ज़ेरि थी, ते ज़ैन केरि ताकत बंज़ेरे बुट्टां केरि ज़ेरि थी। फिरी भी मीं बह तैसेरे फल, ते बुन्ना तैसेरू ज़ील भी खतम केरतां छ़डू। ते मीं तुसां मिस्र मुल्खेरां केढतां आनोरेथ, ते सुनसान ठैरी मां 40 सालन तगर फिरतो राव, कि तुस एमोरी लोकां केरे मुल्खेरे मालिक भोइ गाथ। ते मीं तुश्शे मट्ठन मरां नबी भोनेरे लेई ते तुश्शे किछ जुवानन मरां नाज़ीर2 भोनेरे लेई ठहरावरेन। हे इस्राएली लोकव, कुन इन सब सच़ नईं?” यहोवा एन ज़ोते।
पन तुसेईं नाज़ीरन दाछ़रो रस पियाव, ते नबी लोकन हुक्म दित्तो कि नबूवत न केरन।
“एल्हेरेलेइ हेरा, अवं तुसन एरहो दबेइलो, ज़ेन्च़रे फेक्कन सेइं गड्डी ज़ेन्च़रे ऊँढी दबेइ गैतिन। एल्हेरेलेइ तेज़ दौड़ने बाले नशनेरे लेई बत न मैल्हेली, ते ताकतबरेरी ताकत भी किछ कम्मे न एज्जेली; ते न जंगी सिपाही अपने प्राण बच़ेइ सकेलो; तीर च़लनेबालो खड़ो न रेई बटेलो, ते जल्दी दौड़ने बालो न बच़ेलो: घुड़सवार भी अपने प्राण न बच़ेइ सकेलो; ते ज़ै शूरबीरन मां सेभन करां ताकती बालो भोए, तै भी तैस दिहाड़े नग्गो नेश्शी गालो3,” यहोवा एन ज़ोते।
Source notes (3)
- Footnote इस्राएली न्यायी या कर्ज़ो देनेबाले एन्च़रे केरते थिये।
- Cross-reference नाज़ीर गिन. 6:1-21.
- Footnote नग्गो नेश्शी गालो मतलब अपने हथियार शैरतां नेश्शी गालो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.