Bhadrawahi Bible
2 शमूएल 20
दाऊदेरे खलाफ शेबारी बगावत
कुदरती तैड़ी अक शेबा नंव्वेरो बिन्यामीनी रहतो थियो, तैसेरे बाजी केरू नवं बिक्री थियूं; तै दुष्टी थियो ते तै नरशिंगो बज़ेइतां ज़ोने लगो, “दाऊदे मां इश्शो कोई हिस्सो नईं, ते न यिशैरे मट्ठे मां इश्शो कोई हिस्सोए; हे इस्राएली लोकव, अपने-अपने डेरे जो च़ले गाथ!” एल्हेरेलेइ सारे इस्राएली मड़द दाऊदे पत्ती च़लनू छ़ेडतां बिक्री एरे मट्ठे शेबा पत्ती च़ले जे; पन सारे यहूदी मड़द यरदन दरियाए करां यरूशलेम नगरे तगर अपने राज़े दाऊदे सेइं साथी राए।
तैखन दाऊद यरूशलेम नगरे मां अपने मेहले मां अव; ते राज़े तैना दश रखैलां, ज़ैन तै मेहलेरी निगरानी केरनेरे लेई छ़ेडतां जेवरो थियो, अलग एक्की घरे मां रेखी, ते तैन केरि देखभाल केरतो राव, पन तैन कां न जेव। एल्हेरेलेइ तैनेईं विधवा हालती मां अपनि उमर गुज़ारी ते नज़र बैंदी मां तैन केरि मौत भोइ। एक्सां राज़े अमासा सेइं ज़ोवं, “यहूदी सेना ट्लाई दिहाड़न करां पेइले मीं कां कुजा, ते तू भी इड़ी हाज़र भो।” तैखन अमासा यहूदन कुजाने जेव; पन तैसेरे रखोरो वक्ते करां जादे च़िर लेग्गी जेवं। तैखन दाऊदे अबीशै सेइं ज़ोवं, “हुनी बिक्री एरू मट्ठू शेबा अबशालोमे करां भी जादे इश्शो नुकसान केरेलो; एल्हेरेलेइ तू अपने मालिकेरे लोकन साथी नेइतां तैसेरो पीछो केरा, एरू न भोए कि तै क़िले बाले नगरे मां पुज़तां असन करां छ़ेप्पी गाए।” तैखन योआबेरे सिपाही, ते करेती ते पलेती लोक, ते सब शूरबीर तैस पत्ती जे; ते बिक्री एरू मट्ठू शेबा तोप्पने यरूशलेम नगरे मरां निस्से। तैना गिबोन नगरे मां तैस बड्डे घोड़े कां मसां पुज़ोरे थिये, कि अमासा तैन सेइं एइतां मिलो। योआबे त जंगी लिगड़ां लेवरां थियां, ते तैनी मझ़ बंधेरू थियूं तैसेरे म्याने मां अक तलवार लटकती थी; ते ज़ैखन तै च़लो, तैखन तै तलवार निस्तां बिछ़ड़ी जेई। योआबे अमासा पुछ़ू, “हे मेरे ढ्ला, तेरो कुन हाले?” तैखन योआबे अपनो देइनो हथ अग्रोवं केरतां अमासा फुम्मड़ी देनेरे लेई तैसेरी दाढ़ी ट्लाई।
पन अमासा तैस तलवारारी कोई परवाह न की ज़ै योआबेरे हथ्थे मां थी; ते तैनी तै तलवार अमासारे पेटे मां डोबी, ज़ैस सेइं तैसेरी एंट्लोड़ी निस्तां ज़मीनी पुड़ बिछ़ड़ी, ते तैनी तैस दूइयोवं फेरे न बाई; ते तै मेरि जेव। तैखन योआब ते तैसेरो ढ्ला अबीशै बिक्री एरू मट्ठू शेबारो पीछो केरनेरे लेई च़ले। योआबेरो अक सिपाही अमासारे लाशी कां खड़ो भोइतां ज़ोने लगो, “ज़ै कोई योआबेरे पासे ते दाऊदेरे पासे तै योआबे पत्ती च़ले।” अमासारी लाश सड़करे मझ़ाटे खूने मां पेवरी थी। ज़ैखन तैनी मैन्हे हेरू कि सारे लोक खड़े भेवरेन, तैखन अमासारी लाश सड़की मरां सैल्तां मैइदाने मांजो छ़ुइतां नेइ, किजोकि हेरू कि ज़ेत्रे तैस कां एइतन तैना खड़े भोइ गातन, तैखन तैनी तैस पुड़ अक कपड़ो छ़ेडी दित्तो। तैसेरे सड़की मरां नेनेरे बाद, सारे लोक बिक्री एरे मट्ठे शेबारो पीछो केरनेरे लेई योआबे पत्ती च़ले जे। शेबा सारे इस्राएली गोट्लन मां भोइतां आबेल ते बेतमाका ते बेरी लोकां केरे नगरे तगर पुज़्ज़ो; ते तैना भी अकोट्ठे भोइतां तैस पत्ती च़ले जे। तैखन योआबेरे सिपैहेईं इन शुन्तां तै तैस्से नगरे मां घेरो; ते नगरेरे सामने अक मित्तरो ढेर खड़ो कियो ज़ै शहरपनाही करां उच्चो थियो; ते योआबेरे साथे बाले लोक शहरपनाही बिछ़ोड़नेरे लेई धक्के देने लगे।
दाऊदेरी पलिश्तन पुड़ ज़ीत
तैखन एक्की अक्लमन्द कौन्शां नगरे मरां ज़ोरे सेइं हक देइतां ज़ोवं, “शुना! शुना! योआबे सेइं ज़ोथ, कि इड़ी एज्जे, ताके अवं तैस सेइं किछ गल्लां केरीं।” ज़ैखन योआब तैस कां नेड़े जेव, तैखन कौन्शां पुछ़ू, “कुन तू योआब आस?” तैनी ज़ोवं, “हाँ, अवं तैए आईं।” फिरी तैसां तैस सेइं ज़ोवं, “अपनि दैसरी गल शुन।” तैनी ज़ोवं, “अवं शुनी राहोरोइं।” तै ज़ोने लगी, “पुराने ज़माने मां लोक ज़ोइयां केरते थिये, ‘अगर सलाह नेनीए त आबेल नगरे मां गाथ,’ ते एन्च़रां सेइं लोक लड़ाई खतम केरते थिये। अवं त मेल मिलापे बाले ते भरोसेरे काबल इस्राएलन मरां आईं; पन तू अक प्रधान नगर नाश केरनेरी कोशिश केरतस; तू यहोवारे हिस्से किजो निगलनो चातस?” योआबे जुवाब देइतां ज़ोवं, “एन मीं करां दूर राए, दूर, कि अवं तैस निगली या नाश केरीं! गल एरी नईं। पन शेबा नंव्वेरो एप्रैमेरी पहाड़ी प्रदेशेरो अक मड़द ज़ैन बिक्री एरू मट्ठूए, तैनी दाऊद राज़ेरे खलाफ हथ खड़ो कियोरोए; एल्हेरेलेइ तुस लोक सिर्फ तैस्से इश्शे हवाले केरा, तैखन अवं नगरे छ़ेडतां च़लो गेइलो।” तैस कौन्शां योआबे सेइं ज़ोवं, “तैसेरो दोग शहरपनाही पुड़ेरां तीं कांजो शारो गालो।” तैखन कौन्श अपने अक्लमन्द लोकन कां जेई। तैखन तैनेईं बिक्री एरे मट्ठे शेबारी क्रोड़ी केटतां योआबे कांजो शारी। तैखन योआबे नरशिंगो बज़ाव, ते सारे सिपाही नगरे मरां अलग-अलग भोइतां अपने-अपने डेरे जो च़ले जे ते योआब यरूशलेम नगरे मां राज़े कां वापस जेव।
दाऊदेरे अधिकारी
योआब त सारे इस्राएली सेनारो प्रधान थियो; ते यहोयादारू मट्ठू बनायाह करेती केरो ते पलेती केरो प्रधान थियो; ते अदोराम गुलामन मज़दूर पुड़ प्रधान थियो; ते अहीलूदेरू मट्ठू यहोशापात इतिहास लिखने बालो थियो; ते शवा मंत्री थियो; ते सादोक ते एब्यातार याजक थिये; ते याईर नगरेरो ईरा भी दाऊदेरो अक याजक थियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.